ئەم هەواڵە بڵاوبكەوە
FaceBook  Twitter  

 

 بەهۆی ئەو بارودۆخە ناهەموارەی( مسوڵمانانی ڕۆهینجا) لە میانمار تووشی هاتوون ، د. عەلی قەرەداغی ئەمینداری گشتی یەكێتی جیهانی زانایانی مسوڵمان، نارەزایی خۆی و یەکێتییەکەی بەتووندی دەربری لەمەر ئەو بارودۆخە ناهەموارەی (مسوڵمانانی ڕۆهینجا )لە میانمار تووشی هاتوون ، هەروەها بەتوندیش پرۆتستۆی بێدەنگی وبێ هەڵوێستی جیهانی ئیسلامی دەکات ،و داواش لە هەموو موسوڵمانانی جیهان و هەموو ئازادیخوازانی جیهان دەكات كە پشتیوانی لە ستەملێكراوانی بۆرما بكەن بۆ ئەوەی ڕێگەبگرن لە و هێرشە دڕندانەی كە رووبەڕووی مسوڵمانان بووەتەوە. 

بەرێزیان داواش لە هەموو ولاتانی عەرەبی و ئیسلامی و ڕێكخراوی هاریكاری ئیسلامی و نەتەوە یەكگرتووەكان و ئەنجومەنی ئاسایش و كۆمەڵگەی نێودەوڵەتی دەكات كە بێدەنگی بشكێنن و لە ئاست ئەو كۆمەڵكوژیەی كە ئێستا دژ بە (مسوڵمانانی ڕۆهینجا )بە ڕێوەدەچێت و هەڵوێستێكی ئازایانە بگرنە بەر لە پێناو ڕاگرتنی ئەو هێرشە دڕندانە و پاراستنی مافەكانی مرۆڤ لەو هەرێمەداو گەڕانەوە بۆ هەستێكی مرۆڤ دۆستانە لە بەرامبەر ئەو كارە نامرۆڤانەدا. 

قەرەداغی بەوەندەش ناوەستێت ، بەڵکو بەدلێکی گەرمەوە داوا لە ڕێكخراوە فریاگوزاری و خێرخوازییەكانیش دەكات لەسەر ئاستی جیهانی و ئیسلامیدا كە بە پەلە بەدەم (مسوڵمانانی ڕۆهینجا )لە میانمار بچن و هاوكاری بەپەلەیان فریا بخەن. 

من لێرەدا نامەوێ ئەسڵی کێشەکەو چونییەتی سەرهەڵدانیی و باسی گروپ و باندە تیرۆریستەکانی ئەوهەرێمە کە خۆشکەری ئاگری ئەم کوشت و بڕەن بکەم ، بەڵکو ئەوەی لێرەدا مەبەستمە بە کورتی بیوروژێنم ئەوەیە : من خۆم دژی کوشتنی مرۆڤم و هیچ بیانوویەک ناتوانێت ببێتە پاساوێک بۆ کوشتن و بێدەنگ کردن و چەوساندنەوەو خەفە کردنی مرۆڤ ، لە هەر کون و قوژبنێکی ئەم دونیا پان وبەرینەیشدا هەر مرۆڤێک بەهەر بیانوەک ئازاردرابێت و لەسەر زێدی خۆی دەرکرابێت ، دڵم بۆی ژانی کردووەو بەتوندیش پرۆتستۆم کردوە ، بەڵام ئەوەی جێگای ئاماژەیە و بگره هەڵوەستەیە، قەرەداغی و یەکێتییەکەی بۆ ( موسڵمانانی ڕۆهینجا) دادوبێدادو بابەرۆیانە ، کەچی بەرامبەر کۆمەڵکوژی ( ئەردۆگان ) لە باکووری کوردستان لەبەفریش ساردترن ؟ 

بەڵێ یەكێتی جیهانی زانایانی مسوڵمان خۆیان لە تۆپبارانی تورکیا و کۆماری سێدارەی ئیسلامیدا و لەکاوڵکردن و کوشتنی خەڵکی سڤیلی دێهاتەکانی باشووری کوردستان گێل کردووەو وەک ئەوەی نەبایان دیبێت نەباران . 

لێرەدا دەپرسم : ئایا بەراست ، قوربانیانی دەستی ریژێمی تورکیای فاشی ( مرۆڤ نین ؟ ئایا ئەوان موسڵمان نین ) ؟ ، باشە ئەی بۆ یەكێتی جیهانی زانایانی مسوڵمان بەرامبەر قەتلوعامی موسلمانانی رۆژهەڵاتی کوردستان و دژی کوشتنی کۆڵبەران لە(بانە)ی زامدار بێدەنگە و نوقەی لێ نایەت ؟ ئایا کوردانی رۆژهەڵاتیش وەک موسڵمانانی ( ڕۆهینجا لە میانمار ) مرۆڤ نین ، یان برینی جەستەی ( موسڵمانانی ڕۆهینجا) خوێنی لێ دەروات و برینی کوردە نازدارەکانی رۆژهەلات و باکوورو باشوورو رۆژئاوای کوردستان ئاوی لێ دەروات ؟ 

جێی داخە کە یەكێتی جیهانی زانایانی مسوڵمان نەک تەنها بێدەنگە لەئاست تاوانەکانی تورکیا و ئێران دژ بەگەلی کورد ، بەڵکو تاوانەکنیشیان پەردەپۆش دەکەن و دوعای خێرو سەرکەوتنیان بۆ دەکەن . 

بەراستی سەیرە یەكێتی جیهانی زانایانی مسوڵمان فرمێسک بۆ ( موسڵمانانی ڕۆهینجا)دەبارێنێت و لە الله دەپارێتەوە بیانپارێزێت ، لەهەمان کاتیشدا لەمەر زوڵم و زۆری و کۆمەڵکوژی و تاوانی دژە مرۆڤی هەردوو ریژێمی ( تورکیا و ئێران ) بەرامبەر ( کوردی موسلمان ) بێهەڵوێست و ڵاڵ و کەڕ و کوێرە .