ئەم هەواڵە بڵاوبكەوە
FaceBook  Twitter  

ڕیفراندۆم مافێکی سیاسی و سروشتی هەموو نەتەوەو گەلانی جیهانە، ئەو مافەش لەسیاقی قانوونی نەتەوە یەکگرتووەکان جیێگیرکراوە. ڕیفراندۆمی هەرێمی کوردستان پیادەکردنی ئەومافەبوو بەڵام دوای ئەنجامدانی کۆمەڵێک دەرەنجام و ئاسەواری سلبی لێکەوتەوەو هۆکارەکانیشی ئەمەبوون 1- لەدەستووری عێڕاق هیچ ماددەیەک نیە ڕێگا بەکورد بدا ریفراندۆم بکات 2- دیبلۆماسیەتی کورد نەیتوانی ڕای گشتی جیهان و وڵاتانی زلهێز ی جیهانی بکاتە پاڵپشتی ئەو مافەی خۆی 3- لەسەرئاستی ئیقلیمی واتا تورکیاو ئێران و عێراق و بگرە وڵاتانی عەرەبی و ئیسلامی سەرسەختانە دژی وەستان بەتایبەتی وڵاتانی فرەنەتەوە کەترسان ئەو ئەزموونە بگوازرێتەوە بۆلای خۆیان 4- لەهەڵمەت وبانگەشەی ڕیفراندۆم ئیستیفزازی عێراق و تورکیاو ئێرانیش کرا و بگرە ئەوبانگەشەیە وای لەوان کرد کە ڕیفراندۆم بەمانای ڕاگەیاندنی دەوڵەتی سەربەخۆیە نەک پیادە کردنی ماف 5- لەسەرئاستی ناوخۆی کوردستان کۆدەنگی سیاسی بۆڕیفراندۆم نەبوو بگرە زۆرکەس ولایەنی سیاسی دژی وەستانەوە وئەمەش بیانووی دا دەست ناحەزانی کورد 6- کورد لەڕووی ئابووری و گوزەرانی خەڵک ئامادەباشی نەکردبوو کەباشیش دەیزانی ڕیفراندۆم دەرەنجامی ترسناکی دەبێت . بەداخەوە ڕیفراندۆم پێگەی سیاسی کوردی لەسەر ئاستی ئیقلیمی و جیهانی لاواز کردو ئەگەر هەندێک گەمەی دبلۆماسی و پاڵپشتی ئەمەریکاو فەڕەنسانەبووایە جگە لەلەدەستدانی سەداپەنجای خاک بۆی هەبوو سەراپای ئەزموونی هەرێم دووچاری لەناوچوون ببوایەوە.
دەراوێشتە خراپەکانی ڕیفراندۆم کاریگەریەکی نەرێنی زۆری هەبوو لەسەر دەروونی هەرتاکێکی کورد،بەهەموو چین و توێژەکانیەوەتایبەت توێژی هونەرمەندوئەدیبان و ڕوشنبیران، کەلەتوێژەکانی ترهەستیارترن،ئەوتوێژە بەرلەڕیفراندۆم دوای ئەنجامدانیشی بەرهەمەکانیان خستبووە خزمەت ئەو پڕۆسەیە.
سڕکردنی پڕۆسەی ڕیفراندۆم جۆرێک لەنائومێدی خستە دڵی تاکی کوردوسیاسیەکانیشی،خونەکانی کوردی بەو ئاقارێکی تر برد،کارەساتی 16ی ئۆکتۆبەریش ئەو نائومێدیەی زیاتر کرد،بەلەدەستدانی کەرکوک و ناوچە جێناکۆک و کێشەلەسەرەکان،کە مادەی 140ناسراوە،سڕکردنی ڕیفراندۆم دەستێکی هەرێمایەتی لەپشت بوو، تایبەت ئێران و تورکیا،لەهاوکاری کردنی سوپای حەشدی شەعبی لەعێراق، کەئەم سوپایە بەدڕەندانەترین شێوە خەڵکی سیڤیل و چالاکوانی مەدەنی و چین وتوێژەکانی کۆمەڵگای کردە ئامانج، بەتیرۆرکردن و بێسەروشوێنکردن و سزادان و زیندانیکردنیان، نمونەش زۆرن، لەوانە تیرۆرکردنی ڕاگەیاندکارو کامیرامان ( ئەرکان شەریف) لە 29/30ی مانگی تشرینی یەکەمی ساڵی 2017کە بەدڕندانترین شێوە لەبەردەم ماڵ و منداڵی شەهیدیان کرد ،هەروەها ترس و تۆقاندیان ئاراستەی هەریەک لە( هە ـ غ) و ( خـ ـ ڕ ٓ) ڕاگەیاندکاران زیاتر ئامانجی ئەو سوپای بوون، چونکە ڕوماڵی چالاکیەکانی ڕیفراندۆمیان کردبوو.بۆیە بەپێت ناوم هێناون لەبەرسەلامەتی گیانیان.
بەرلەئەنجامدانی ڕیفراندۆم و دوای ئەنجامدانیشی ، ژمارەیەک هونەرمەند وئەدیبی کوردستان لەشارەکانی هەولێر،سلێمانی ،دهۆک، کەرکوک بەشارو شارچکەکانیشیەوە، ڕۆلێکی ئێجگار گەورەیان بینی لە پاڵپشتی کردنی ئەو پڕۆسەیە، بەبەرهەمەکانیان خۆیانکردە ئامانجی دوژمنان،ژیانی خۆیان خستە مەترسی، بەئەنجامدانی چەندین چالاکی گەورەو دیار کەدەنگدانەوەیەکی جەماوەری زۆری هەبوو، لەوانە هونەرمەند ( س . س . ئە) وچەندین هونەرمەندی تر،کە دەستیان خستە سەر بابەتێکی هەستیار و گرنگ لەشاری هەولێر، کە بەلای دۆژمنانی ئەو پڕۆسەیە بڤەوقەدەغە بوو،لەبەر سەڵامەتی گیانیان کوردستانیان بەجێهێشت بەرەو وڵاتێکی نادیارڕۆیشتن، گەلێ چالاکی و فیستیڤاڵی تر ئەنجامدران گرنگترینیان چالاکی (داری ئازادی ) و (فیستیڤاڵی ڕەنگەکان) کەپەیامێک بوون بۆ سەرخستنی پڕۆسەکە، ڕیفراندۆم ئەنجامدراو دەرهاوێشتە خراپەکانیشی ئێستاشی لەگەڵدابێ لەسەر هزرو بیری تاکی کورد هەرماوە.
ئێمە لە نێوان وڵاتە داگیرکەرەکانی و کوردستان و وڵاتانی زلھیز و بریاربەدەستی دونیا، وەک یوسفی کەنعان بووین، بەیەکەوە پیلانیان داڕشت بمانخەنە چاڵ و ھەر وایشیان کرد. ئێستاش کە جار جارە، وڵاتانی زلھیز دەستمان بۆ درێژ دەکەن، بۆ ئەوە نییە کە لە چاڵەکە دەرمان بھینن، بەلکو بۆ ئەوەیە وەک کارتی فشار و ترساندنی ڕژێمە داگیرکەرەکانی کوردستان بەکارمان بینن، بۆ ئەوەی زۆرتر و زیاتر ملکەچی سیاسەتە فراوانخوازییەکان بن.
ئێمە دوای سەدەیەک لە گرتن و کوشتن و ڕاوەدوونان، لە ئەنفال و کیمیابارانکردن و جینۆساید، لە خەبات و قوربانیدان، دوای ئەوەی ھەموو دونیای دووڕووی ئەوروپا و ڕۆژئاوا باسیان لە جوامێری و ئازایەتیی پێشمەرگە و کورد دەکرد، لەوەی کە لە بری ھەموو جیھان شەڕی جەھل و تیرۆر و تاریکی دەکەین، ویستمان ڕیفراندۆم بکەین و بڕیار لە چارەنووسی خۆمان بدەین، کەچی لە چاکەی ئەو شەرە بە وەکالەتەی ئیمە لە جیاتی جیھان دژی قاعیدە و داعش و ئەنسار و جوند و موشتەقاتە سەیر و سەمەرەکانی ناو جووڵانەوەی میلیشیایی ئیسلامیمان کرد، کەچی بێ شەرمان ئەو وڵاتانە ئیمەیان لەبەردەم گورگی ھاری ئێرانی پان شیعەگەر جێھێشت و نیوەی خاکەکەمانیان کە بە خوینی ھەزاران پێشمەرگە ئازاد کرابوو، خستە سەر سفرەی زێڕین بۆ حەشدی شیعی ئێرانی و حکوومەتی تایەفەگەری بەغدا.
خیانەتە گەورەکەی 16ی ئۆکتۆبەریش هەرگیز لە بیری کەس ناچێتەوە، جا هەر کەس و لایەنێک ئەنجامی دابێت
لای تاکی کورد کە ئیدی ترووسکایی ئومێدیک لەو جوگرافیا تاریکەی ڕۆژھەڵاتی ناوەڕاست (نەک ڕۆژھەڵات) شک نابردرێ، ناچارگەنجی کورد نیشتمان و خەونەکان و جانتای پشتیان وەک قەرەجێک سنوورەکانی دەبڕن و لە سەرزەمینێک دەگیرسێنەوە کە بڕێک ڕێز لە بوونی مرۆیی مرۆڤ بنێ و بەھا بۆ کەڕامەتەکەی دابنێ، خۆ ئەگەر ھەر نەگەیشتنە سەر ئەو بستەزەمینە یۆتۆپییە، لە شوێنێکدا دەمرن، چ لەوە خۆشترە قەرەج ئاسا و غەریب، بەسەر پشتی سەفەر و کۆچەوە بمری و بە مردنت گۆشەیەکی دیکەی دونیای بێ مۆڕاڵی دژە ئازادی و کەرامەتی مرۆڤ ڕیسواتر بکەیت. ئەوانە ڕیفراندۆمچی بوون تا دەشمرن هەر ئەو ناوەیان پێوەلکێنراوە، دەشزانن دان و ماشی برایەتیان ھەرگیز لەگەڵ شۆڤینیزم و فاشیزمی ئایینی نەکوڵاوەو ناکوڵێ ، ئیدی ڕیفراندۆم لای ئەوان تاکە چارەسەرو رزگاربوونە لەدەست زوڵم و ستەمی ئەوان؟!

2017-12-6
  • 1