ئەم هەواڵە بڵاوبكەوە
FaceBook  Twitter  

 

لە جەنگى یەکەمى جیهانەوە تا ئەمڕۆ ئەمە چوارەمین جارە کە دەوڵەتە ئیمپریالیەکان پشت ئەکەنە مافە ڕەواکانى گەلى کورد. لە دواى ئەو جەنگە کوردوستان لە نێوان عێراق و سوریا و تورکیادا. کەرت و پەرت کرا. بێجگە لە ئێران... ساڵى ٩٧٥ لە ژێرچاودێرى ئەمریکادا (سەدام) و (حەمە ڕەزاشا) هەرەسیان بە شۆرشەکەى کورد هێنا... لە ١٦/ ئۆکتۆبەر ٢٠١٧ لە عێراق دا ئەمریکا و هاوپەیمانەکانى لەناوچەکە و لە ئەوروپا دا خواستى کوردیان کردە قوربانى بەرژەوەندى ئیمپریالیانەى خۆیان. پاش ئەوەى شەڕى داعش ـ یان بەکورد کرد. ئەمڕۆیش لە سوریا دواى ئەوەى کورد کرا بە سەرقافڵەى بەربەرەکانى کردنى داعش و کۆرو کۆمەڵە تیرۆریستەکانى تر. لەبەر بەرژەوەندى خۆیان چەک و تفاقى شەڕیان پێدان. ڕوبەڕویان کردەوە لەگەڵ ڕژێمە فاشیەکەى (ئۆردوغان ) دا واتە کۆبانێ لە عەفرین دوبارە کرایەوە. چۆن ئەو ناوچەیە سوتێنراو کاول کرا عەفرین/ یش بەو جۆرە و خراپترلێ ئەکەن...

کۆبانێ و عەفرین و کەرکوک و دوز ناونیشانى ئاوات و خواستى نەتەوەیەکە کە لە لایەن سەرمایەدارى جیهانەوە پێ شێل ئەکرێ. حکومەتى تورکیا کورد واتەنى ((بەزەبرى کلکى)) کۆبانێ و عەفرین لە کوردوستان دابە ئاگر و ئاسن وێران ئەکات!!

ئەمریکا تا ئیشى بە کورد هەبو لە عێراق و لە سوریا. میدیاکانى جەنجاڵ کردبو بە پڕۆپاگەندە و پیاهەڵدانى کوردو قارەمانێتى ڕۆڵە جەنگاوەرەکانى. بەڵام کە ئیشى پێمان نەما ئەوە کۆبانێ و کەرکوک و دوز و ئەمەیش عەفرین!!

ئەمريكا بەڵێنى دابە (ئۆردوغان) کە ئیتر چەک نەدات بە هێزەکانى کورد لە سوریا. یان هێندەیان پێ بدات کە بەپێیى مەرام و مەبەستى خۆى بێ. بەڵام بەوەیش ڕازى نەبو. ئێستا ڕوبەڕوى هێرشى یەکێک لە دەوڵەتە شەڕەنگێزە دێکتاتورکەى پەیمانە ژوروى ئەتڵەسى (ناتۆ) ى کردۆتەوە. بە تۆپ و بە تانک و ناپاڵم و گازى کیمیایى ئەو ناوچەیەى کوردوستانى خۆرئاوا. ئەسوتێنێ و ئەڕوخێنێ و خەڵکەکەى ئەکوچێ و ئاوارە ئەکرێ بەبەرچاوى دەوڵەتانى (ناتۆ)وە بگرە بە ڕەزامەندى ئەوان... چونکە بەرژەوەندى داگیرکەرانەى ئەوان هەرگیز ئەوە قەبوڵ ناکات کە گەلى کورد وەک دەوڵەتێکى سەربەخۆ لەناوچەکەدا دابمەزرێ!!

ئەمە هەڵوێستى ئاسایى سەرمایەدارى جیهانە. بەڵام ئەوەى شایانى باسە جەماوەرێکى زۆرى خودى ئەو دەوڵەتانە هەڵوێستێکى تریان هەیە لە دەیان شارەکانى ئەوروپادا. تەنانەت لە دڵى ئیمپریالیەتى جیهان دا (ئەمریکا) خۆپیشاندانى ناڕەزایى دژى ئەو هێرشەى تورکیا و بۆ پشتیوانى خەڵکى عەفرین ئەچن بەڕێوەو بەردەوامە... جەماوەرێکى زۆر لەهەر چوار لاى کوردوستانەوە ئامادەن بچن بۆ یارمەتى دانى ـ خەڵکى عەفرین و کورد لە سوریا... بەواتایەکى تر جەماوەر هۆشیارى ئەوروپا سیاسەت و هەڵوێستى دەوڵەتەکانیان تاوانبار ئەەکن بەرانبەر بە کورد!!

هەڵوێستى حکومەتى تورکیا بەرانبەر بە کورد لەو ڕۆژەوە دەوڵەتى نوێى تورکیا دامەزراوە. هەر دوژمنانەو سەرکوت کردن بوە نەک هەر لە سنورى دەوڵەتەکەدا. بەڵکو پەلى دوژمنکارانەى بۆ کوردوستانى ئێران و عێراق و ئێستاش لە سوریا هاویشتوە. کەچى لەلایەن ئەمریکاو هاوپەیمانەکانیەوە دەست خۆشى لێ ئەکرێ!! تورکیا بەوە ڕازى نەبوە کە تەنها بەهێزى سوپاکەى خۆى هێرش بکاتە سەر عەفرین بەڵکو کۆمەڵێک هێزو رێکخراوى تیرۆیست و فاشستى تر کەتا دوێنێ سەربە (قاعیدە و داعش و نوسرە ) بوون چەکدار و تەیارى کردون بۆ بەشدارىکردن لەو هێرشەیدا ئەیەوێ ئەو ناوچەیە ڕادەستى ئەوان بکاتەوە.

بەڵام ئەم پەلاماردانەى تورکیا. دوابەدواى پەلاماردانى کەرکوک و دوزو ناوچەکانیان شان بەشانى سەرکوت کردن و دەم کوت کردنى کورد لەتورکیا و ناوچە کوردوستانیەکانى تر... واتە ئەم شەپؤلە بە گژداچونەوەى کورد لەوەوە هاتوە کە لە ماوەى ئەم (١٠-١٥) ساڵەدا بزوتنەوەى ڕزگاریخوازى کورد و بانگەوازى مافى چارەنوس و دامەزراندنى دەوڵەتى سەربەخۆ بوبو بە ئەمانجى هەمو گەلى کورد.

لە کۆتاییدا ئەڵێم شاى ئێران و سەدام حوسەین گۆربەگۆرکران و ئۆردوغان و (ترەمپ) یش گۆربەگۆر ئەکرێن. عەفرین و هەمو شوێنە داگیر کراوەکانى کوردوستان / یش رزگار ئەکرێنەوە و گەلى کوردیش نەک هەر ئەمێنێ بەڵکو مافى چارەنوسى خۆى هەر ئەسێنێ و بریار ئەدات.

 

 

 

 

 

  

  • 1