ئەم هەواڵە بڵاوبكەوە
FaceBook  Twitter  

 

هەر کەس و لایەنێک بە چاکى لە واقعى سیاسى و کۆمەڵایەتى هەرێمى کوردوستان تێ گەیشتبێ. ئەبێ لێى ڕون بێ و بەلایەوە سەیرو سەمەرە نەبێ کە ساختەکارى بەهەر شێوەیەک سەربگرێ و سودى تایبەتى لێ وەربگیرێ بۆ هەر لایەن و پێکهاتەیەک بەهیچ جۆرێک کۆى لێ ناکرێ. بەڵکو چەمکێک ئەبێ لە کردەوەى  هەڵبژاردنەکە چونکە ئەم ساختەکاریە دەرهاویشتەى ململانێ سیاسى و چینایەتیەکەیە لە کۆمەڵگەکەدا. مێژوى هەڵبژاردنەکان لە ساڵى (٩٢) وە تا ئەمڕۆ ئەم ڕاستیە ئەسەلمێنێ. ئەم ساختەکاریانەش شان بەشانى بەرەو پێش هاتنى تەکنۆلۆژیاو ئامێرەکانى جیاکردنەوەى دەنگەکان شێوازى نوێتر وەرئەگرێ بۆ زامن کردنى شوێن و دەسەڵاتى سیاسى و ئابورى لایەنە زلهێزەکانى وڵاتەکە.

بە واتایەکى تر ئەنجامى ئەو هەڵبژاردنە هەرگیز لە خزمەتى ئەو کەس و لایەنانەدا نابێ کە بەتەنگ  زۆرینەى چەوساوەکانەوە بن . تەنانەت ئەگەر پشت بە هێزى جەماوەر ئەم کەس و لایەنانە چەند کورسیەک بە دەست بێنن ئەوا لە گۆماوى زۆرینەى نوێنەرانى ساختەکارەکان دا ئەخنکێنرێن.

لەم هەڵبژاردنەدا (١٢ ئایار ٢٠١٨) لە هەرێمى کوردوستان دا لایەنە چەپ و دیموکراسى خوازەکان. ئەو هێزە جەماوەریەیان نەبو کە دەسەڵات داران لێیان بترسن. ئەوەبو وەک دەرکەوت ساختەکاریەکە بە پلەى یەکەم دژى یەکترى بو واتە دەسەڵاتداران دژى یەکترى بە جۆرێکى بێ وێنە (تازە بابەت) پەیڕەویان کرد و هێندەى تر ناکۆکیەکانیان قووڵتر بوەوە. ئەمە لەلایەک لەلایەکى ترەوە چەپ و دیموکراسى خوازان ئەبێ ئەو ڕاستیەشیان لەلا ڕون بێ. کە ئەم هەرێمە کەوتۆتە نێو بەرداشى کێشمە کێش و ململانێى نێو دەوڵەتانەوە (دورو نزیک). واتە ئەو دەوڵەتانەش کە چاویان بڕیوەتە بازاڕ و سامانى ئەم هەرێمە و هەریەکەیان دەست و پێوەندى خۆى هەیە. بەبێ گومان ئەمانیش بەهەر جۆریک بۆیان بلوێ دەست لە شێوازى ساختەکاریەکان (بە جۆرێکى کاریگەرتر) وەرئەدەن لە پێناو سەرخستنى دەست و پێوەندەکانیان دا. یان بە واتایەکى تر لە پێناوى زامن کردنى بەرژەوەندى خۆیان دا. هەر بۆیە وەکو بڵاوکرایەوە یارى بە ئامێرە ئە لیکترۆنیەکان کرابو!!

ئا لێرەوە پێم وایە و دروست ترە کە چەپ و دیموکراسى خوازەکان بەم جۆرە واقعى سیاسى و کۆمەڵایەتى و چینایەتى و بەرژەوەندى دەوڵەتە بیانیەکان بخوێننەوە و تێى بگەن.. خۆیان و جەماوەرەکەیان ماندو نەکەن بە ئەرکێکەوە کە ئەنجامەکەى (ئەو سەرى) بە ئاشکرا دیارە. و ماندوبونەکەیان بەزایە نەچێ؟؟

بەڵکو خۆماندوکردنەکە ئەبێ ئێستا دەستى پێبکرێ. کێ ساختەکارى کردوە؟ لە پێناوى چى دا. چۆن ساختەکارى ئەنجام دراوە؟ ڕۆڵى دەوڵەتە بیانیەکان چى و چۆن بوە؟! ئەبێ خەڵکى ڕەنج و ماف خوراو لەم کارو کردەوانە تێ بگەیەنرێ؟ ئەم جۆرە ڕەفتارە ناڕوایە (یاریکردن بە چارەنوسى زۆرینە) کە ٢٦ ساڵە پەیڕەو ئەکرێ بۆ جەماوەرەکە ڕون بکرێتەوە. تێیان بگەیەنن کە ئەم هەراو بەزمە. ئەم هەڕەشە و گوڕەشەیە دژى یەکترى کە یەک ئەوەکەى تر بە ساختەکار دائەنێ. هەرگیز لەبەر خواست و ویستى کۆمەڵانى خەڵکەوە نیە. بەڵکو لە پێناوى هەریسەکە دایە!!

لەکۆتاییدا ئەڵیم: هێزو لایەنى چەپ و دیموکراسى خواز ئەبێ بە وردبینى واقعە سیاسى و کۆمەڵایەتیەکە بخوێنێتەوە و پێش بینی بکات ئەوسا هەڵوێستى خۆى دیارى بکات سەبارەت بەو ئەرکەى بەرەو پیرى دێت... لێکى بداتەوە کە ئاخۆ بەشدارى کردن تیایدا. سودى زیاترە یان زیان؟!

پێشینان وتویانە: ((قسەیەک بکە سەربگرێ, کارێک بکە بەر بگرێ))

 

                                                        

 

  • 1