ئەم هەواڵە بڵاوبكەوە
FaceBook  Twitter  

  

‎قسەی پڕوپوچی كوردەكان لە بارەی مرۆڤبوونەوە.

 ‎ئینسانبوون یەكێكە لە دروشم و موژدەو یۆتۆپیاكانی ڕۆشنگەری و مۆدێرنەو ئەو تەوژمانەی كە لە هەناوی ڕۆشنگەری و مۆدێرنەوە سەرچاوەیان گرتووە، ئەم یۆتۆپیا ئەفسانەییە گوتاری ( پیاوە سپییەكە) بوو كە هەم لە ڕێگەیەوە دەیویست فۆرمیولەی پیاوە سپییەكە بكات بە وێنەو وێناكراوێكی گەردوونی و. یونیڤێرساڵی تا خۆی بەرهەمبهێنێتەوەو خۆی بكات بە سەنتەرێك و لەوێشەوە ئەوێتر و ئەوانیتر بكات بە پەراوێزو حاڵەتێكی دەروونی و ئەنترۆپۆلۆژی و شارستانی خوارەوەو هێشتنەوەیان لە ناو پەیوەندی ئاغا/ كۆیلەدا. بە واتایەكی تر دروستكردن و فۆرمیولەكردنی باڵاییەك و پارێزگاریلێكردنی تا لە ناو ئەم هیراكییەتەدا سەنتەر/ كەنار بمێنێت. تەنانەت ماركسیزمیش وەك گوتارێك لە مۆدێرنەداو ستراتیژێكی گوتاری مۆدێرنە لە بەرگریكردن و داكۆكیكردن لە مرۆڤبوون و مرۆڤایەتی هەر سەر بە خەیاڵ و كەڵكەڵەو ئارەزووی پیاوە سپییەكەیە. قسەوباسی نەتەوەو گەلانی سەردەستی كوردیش لە ناو گەمرو یاریدا باس و خواسیان لە سەر مرۆڤ و مرۆڤبوون بوو تا هەژموون و هەیمەنەو براگەورەیی خۆیان بپارێزن و بەرهەمی بهێننەوە.

 ‎دووەم

 ‎من نازانم مرۆڤبوون واتای چییە جگە ژە ئەبستراكت و ڕوت و قوتبوونەوەیەك كە تەنانەت ناكرێت لە خەیاڵیشدا وێنای بكەین. ناتوانێت بوونێكیش بێت لە خەیاڵدا بەو مانایەی خەیاڵ و خەیاڵكردنەكانیشمان كەڵەبوو و كەڵەكەكراوێكن لە ئەزموونە كۆمەڵایەتییەكانمان. مرۆڤ بە بێ پاشگرێك : مرۆڤی كوردی، مرۆڤی فەڕەنسی، مرۆڤی ئەڵمانی، مرۆڤێ ئەمریكی، مرۆڤی عەرەبی...نە بوونی هەیەو نە بوونی دەبێت. تۆتالیتێیەكی وەك (مرۆڤبوون و مرۆڤایەتی) نەك هیچ تەفسیر ناكات، بەڵكو دەبێت خودی ئەم گشتێتیە تەفسیر بكرێت. تەنانەت لە چوارچێوەی نەتەوەو و جڤاكێكیشدا ئێمە هاوڕێی ئاستی بچووكتری ناسنامەو بوونین لە ناو شارو گەڕەك و كۆڵانەكەی خۆیشماندا. ئێمە بڕێكی زۆر بەرهەمی كۆنتێكستگەلێكین. با تەماشای خورافەو خەیاڵپڵاوی مرۆڤێكی كوردی بكەین كاتێك دەچێت لە وڵاتێكێ ڕۆژئاوا دەژی، ئەگەر كوردەكەش دەسبەردای كوردبوونی ببێت، گوتارێكی ئایدیۆلۆژیی و دەزگا دەوڵەتی و دەزگا گوتارییەكانی ئەو وڵاتە ڕۆژئاواییە هەمیشەو بەردەوام لە ناو سەدان شێوازی مامەڵەو بەركەوتندا بە بیرت دێنێتەوە تۆ كوردێكیت و مناڵەكانیشت كوردن. مرۆڤبوون بە بێ پۆلێنكرن و كۆنكرێتیكردنەوە لە ناو ناسنامەو شوناسە ئاینیی، ڕەگەزی، جیهانییەكاندا قسەی پڕووپوچە. من نەمبینوە چەپێكی ئەڵمانی، فەڕەنسی، بەریتانی... هاندەری تیپێكی ئەفەریقای باشورو ئاسیا بن... ئەمە چیمان پێدەڵێت جگە لەوەی چەپ و ماركسسیەكیش كە لە ناو بانگەشەی یونیڤێرساڵی و. برایەتیدان، ناتوانن لە ناو جڤاك و كۆمیونیتێ و دەوڵەتەكەی خۆیاندا ناسیۆنالیست نەبن. ئەگەر وا بایەو مرۆڤبوون و ئایدیاو یۆتۆپیای مرۆڤبوون ناسنامەی ئێمە بایە لە كارت و پێناس و. ناسنامەی وڵاتەكان. دەنوسرا (مرۆڤ) نەك پاشگرێكی جڤاكیی و نەتەوەیی بۆ دابنرێت.

  • 1