ئەم هەواڵە بڵاوبكەوە
FaceBook  Twitter  

پێش هەموو كارێكی تر پێویستە هەوڵێكی یەكگرتوو و گشتی بخرێتە كار بۆ بەتاڵكردنەوە و ڕاماڵینی هەموو ئەو بڕیار و یاسا كۆنانەی كە ڕێگر بوون یان تا ئێستا ڕێگرن لە بڕیاردانی یاسایەكی هاوچەرخی شیاو بۆ كار و كرێكار و مافی پێكەوەنانی سەندیكای سەربەخۆ بۆ كرێكاران، چونكە تا ئەمڕۆ ئەوانە كراون و دەكرێن بە بەهانە!

لەم هەرێمەشدا ئەوەندەی حكوومەت دامەزراوە و ئەوەندەی حزبی شیوعی كوردستان هاتووەتە كایە سیاسییەكەوە داوای یاسایەكی دیموكراسیانەی كار و مافە ئاساییەكانی كرێكاران چەندین جار بەتایبەتی لە یادكردنەوەی ساڵانەی یەكی ئایاردا دەخرێنە ڕوو، دەدرێنە كاربەدەستانی پەیوەندیدار، كەچی نەك هەر جێبەجێ نەكراوە، بگرە ئاوڕی لێ نەدراوەتەوە، پێم وایە هۆی سەرەكی ئەوە دەگەرێتەوە بۆ نەبوونی پڕۆژەی گەورە و پێشكەوتوو لە هەردوو بواری پیشەسازی و كشتوكاڵدا كە بوون بە مایەی نەبوونی جەماوەرێكی كرێكاری هۆشیار، ئەگەر نەڵێم چینی كرێكاری ڕێكوپێك كە ئەو داواكارییانە بە مافی خۆی بزانێ و كار بۆ بە ئەنجام گەیاندنیان بكات.

ئەو كرێكارە زۆرەی هەرێم كە ئەمڕۆش بەدی دەكرێ، بەشی هەرەزۆری كرێكاری وەرزی (مەوسم)یە، كرێكاری بیناسازی و كەرەستەكانییەتی، یان جووتیار و سەپان و شوان و پاسەوانانی كشتوكاڵە، ئەویش هەر وەرزییە، ئەمانە بەدوای ئیش و كاردا دەگەڕێن، واتە بەدوای ناندا، هیچ هۆشیارییەكی یاسایی و دیموکراسیان نییە، نازانن كێ دەیانچەوسێنێتەوە، یان دەیانڕوتێنێتەوە.

هەر لەبەر ئەم بێكارییەشە كە ئەمڕۆ شەقامەكانی شارەكان پڕبوون لە دەستگێڕ و عەبارانە كێشكردن، یان كۆ كراونەتەوە لەو بوارانەدا كە كۆلكە مووچەیەكی لێ دەست دەكەوێ...

بەمانایەكی تر ئەمڕۆ لەم هەرێمەدا ئەو هێزە كرێكار و پێشكەوتووە پەیدا نەبووە كە بێتە سەر شەقامەكان و داوای مافەكانی خۆی بكات، كە هەرە پێویستییەكانی بڕیاردانی یاسای كارە بۆ ڕێكخستنی پەیوەندی نێوان كرێكار و خاوەنكار لەلایەكەوە و زامنكردنی مافەكانی تری كرێكاران (پێكەوەنانی سەندیكا) لەلایەكی ترەوە، ئەگەر بگەڕێینەوە بۆ مێژووی سەندیكاكان لە عێراق دا، دەبینین كە هەر هەموویان بە هێزی مانگرتن و خۆپیشاندان و بە قوربانیدان حكوومەتە یەك لەدوای یەكەكانی عێراقیان ناچار كردووە كە یاسای كار بڕیار بدات، لەلای سێیەمیشەوە ئەو كرێكارانەش كە پیشەیان هەر كرێكارییە و لەو چەند كارگە و پڕۆژانەدا كار دەكەن تا ئێستا دەستی لایەنێك، حزبێكی چەپ و شۆڕشگێڕیان پێ نەگەیشتووە كە هۆشیاریان بكاتەوە و ڕێچكەی تێكۆشانیان پیشان بدات و ئاڕاستەیان بكات.

لەبەر ئەمانە هەر داواكارییەك ئەگەر هێزی تایبەتی خۆی لەپشتەوە نەبێت و نەیكاتە بەرنامەكاری خۆی و هەتەر نەبێ لەسەر هێنانەدی هەرگیز ڕووناكی نابینێت.

لەمانەیش بەدەر بێجگە لە حزبی شیوعی كوردستان هیچ حزب و لایەنێكی تر بەتەنگ كێشەی كرێكارانەوە نییە، ئەگەر دژی نەبێت بە حوكمی ڕەچەڵەكی چینایەتی خۆی.

ئالێرە تەنیا ڕێگایەك بۆ سەپاندنی ئەو مافانەی كرێكاران، هۆشیاركردنەوە و جوڵاندنی هێزی كارە بە پشتیوانی ئەو جەماوەرەی كە پشتگیرییان دەكات.

  • 1