ئەمە بڵاوبكەوە
FaceBook  Twitter  

 

 لاو داینەمۆی گۆڕانكارییەكانی هەموو كۆمەڵگاكانن. لەكوردستانیشدا لە سەردەمی شاخ و بگرە لەڕاپەڕینیشدا هەمان ئەو ڕۆڵە گەورەیەی بینی. بەڵام بەداخەوە لە دوای ڕاپەڕینەوە بەهۆی ژینگەی خراپی سیاسی و كۆمەڵایەتی و ئابووریی و كلتوورییەوە وایكردووە لاوان بكەونە پەراوێز و ئەو ڕۆڵە گەورەیە نەگێڕن، تەنانەت خاوەن ئیرادەی خۆیان نەبن.

لە ماڵەوە بەهۆی كلتوورەوە ڕۆڵیكی كارا بەلاوان نادریت و لەولاشەوە لە دەرەوەی ماڵ قوتابخانە و زانكۆكان لەم ساڵانەی دواییەدا بەهۆی چەندین هۆكارەوە وایكردووە نەتوانن ڕۆڵێكی گەورە بگێڕن لە پەرەپێدان بەتوانای لاوان. لەتەك ئەوانیشدا ڕێكخراوەكانی كۆمەڵگای مەدەنی گرنگییەكی ڕووكەشیان داوە بەلاوان و نەیانتوانیووە كە توانسازی بۆ توانای لاوان بكەن و ئیرادەی ڕاستەقینەی پێببەخشنەوە. حزب لەم وڵأتەی ئێمە دەستی خستۆتە هەموو سووچێكەوە و وایكردووە كە لاوان بێ ئیرادە بكات و پاشەكشە بە ڕۆڵیان بكات، نەك ڕۆڵیان پێ ببەخشێت و دەستیان بگرێت و دەرفەتیان بۆ بڕەخسێنێت تاوەكو لە ئێستاوە ببنە بەشێك لە ئایندەی بەڕێوەبەردنی هەرێم!

لەناو ئەو هەموو بێ ئیرادە كردنەدا، بەهۆی قەیرانی سیاسی و ئابووریشەوە ئەو لاوانەی كە كۆچ دەكەن دەیكەن و ئەوەش ژمارەیەكی زۆرە بەبێ ئەوەی كەس گوێ بەو مەترسییە بدات! ئەوەشی ناڕوات بەشێكیان ڕووبەڕووی تیرۆری سپی دەبنەوە كە ئێستا بەهۆی ئەو نامۆییەی كە لاوان تێیكەوتوون هەندێكیان پەنایان بردۆتە بەر بەكارهێنانی مادە هۆشبەرەكان و ڕۆژانە دەیانی پێوەدەگلێن!

هەربۆیە هەرچی زووە دەبێت حكوومەت و حزبەكان و ڕێكخراوەكانی كۆمەڵگای مەدەنی لەو كاتەی هەڵمەتی هۆشیاری بۆ بەكارنەهێنانی مادە هۆشبەرەكان دەست پێ بكەن. دەبێت حكوومەت ڕێگری تەواو بكات لەهاتنەناوەوەی ئەو مادە ترسناكانە! هەروەها دەبێت كاربكەن بەهەموو لایەك بۆ ئەوەی ئیرادەی لاوان بگەڕێننەوە و زەمینە بڕەخسێنن بۆ بەشداری تەواوی لاوان لەهەموو بوارێك و تەواوی پێویستی و خزمەتەكانیان بۆ دەستەبەر بكەن تا ئەوانیش بتوانن ڕۆڵی زیندووی خۆیان لە پێشخستنی وڵاتەكەیان ببینن.

  • 1