ئەمە بڵاوبكەوە
FaceBook  Twitter  

وزەو شۆڕشی چواردەی تەمموزی 1958 شیوعی و دیموكراس خوازو نیشتمان پەروەرەكانی عێراق و كوردستان بوون، بەڵام دواتر توندرەوەی ناسیونالستی و دكتاتۆرو شۆڤینیەكانی عێراق چوونە نێو بنج و بنەوان و كەلێن و خانەوردە سیاسیەكانی شۆڕش و دەستیان بەسەردا گرت و دواتریش لە شوباتی 1963 تەواوی شۆڕشەكەیان دزی خستیانە ناو چاڵە رەشەكانی مێژووی خۆیان، وزەو هەوێن و هێزی سەرەكی راپەڕینی گەلانی ئێران ساڵی (1979) شیوعی و دیموكراسیخوازو پێشكەوتووخوازەكانی ئێران بوو، زۆر كەس (ئیحسان تەبەری و كیان نوری) كە هەردووكیان دوو سەركردەی شیوعی بوون بە بیرمەندو دارێژەری ئەو راپەڕینە دەزانن و زۆربەی هەرەزۆری ئەوانەش لەو راپەڕینە شەهید بوون، بەڵام دواتر كۆمەڵێك مەلالی و عەمامەرەش و رابەری شیعە بەرهەم و دەستكەوتەكانی ئەو راپەڕینە مەزنەیان بۆ خۆ بردوو كردیانە بناغەی دامەزراندنی كۆماری ئیسلامی ئێران، ئینجا بەبڕیاری ئیمام خومەینی رابەری كۆمار هەموو ئەوانەی پێشەواو سەكردەی راپەڕین بوون خرانە كونجی زیندان و بەشی هەرە زۆریشان لەسێدارەدران، لەو چەند ساڵەی رابردوو لە بەشێكی وڵاتانی عەرەبی بەناوی بەهاری عەرەبی گەلانی ئەو وڵاتانە لە دژی دكتاتۆریەت و شۆڤینیەتی وڵاتەكەیان راپەڕین، ئەو راپەڕینانە وایان كرد، كەهەندێك دكتاتۆر لەژێر گوشاری هاتنە سەر شەقامی جەماوەرو زایەڵەی راپەڕینی خەڵك هەڵاتن و وڵات بەدەركران، بەڵام سەرەنجام ئیخوان المسلمین و گورپە ئاینی و سەلەفیەكان و دەست تێوەردانی وڵاتانی جیهان لە دۆخی سیاسی ئەو وڵاتانە راپەڕین و شۆڕش و قوربانیەكانی خەڵكی راپەڕیویان بەهەدەرداو شۆڕشەكانیان دزی، ئەو راپەڕینە جەماوەریانە نەك نەبوونە بەهاری عەرەبی، بەڵكو بەهاریان لە وەرزەكانی ساڵی ئەو وڵاتانەش بەیەكجاری سڕیەوە، لەو چەند رۆژەی رابردووش راپەڕینی هەردوو گەلی جەزائیرو سودان عەبدولعەزیز بوتەفلیقەو عومەر بەشیریان ناچار بەدەست لەكار كێشانەوە كرد، بەڵام لە ئەنجامی لاوازی هێزو حزبە چەپ و دیموكراسیخوازەكانی جەزائیرو سودان پێ‌ دەچێت، ئیخوان و گروپە توندرەوەكان بێت، چونكە سەرەڕای لەدەسەڵات نەمانی بوتەفلیقەو البشیر، بەڵام سەركردەو كادیرو رێكخستنی حزب و گروپە سەلەفی و دواكەوتووەكان ئامادەنین شەقام چۆڵ بكەن و لەناو دروشمەكانیش بەروونی ئەوە دەڵێن، ئێمە تەنها بۆ لەكارخستنی بەشیرو بوتەفلیقە رانەپەڕیون، بەڵكو دەمانەوێت جەزائیرو سودان بخەینەوە سەر هێڵی خەلافەتی ئیسلامی، هەڵبەت جەماوەری قارەمانی میسرو تونس و یەمەن و لیبیاو سوریا و جەزائیرو سودان، لەپێناوی نان و ئازادی و شكۆی مرۆڤانەی خۆیان راپەڕین، نەك بۆ گێڕانەوەیان، ئەو وڵاتانە بۆ ناو تونێلە تاریك و داخراوەكانی مێژووی چاخی بەردین، راپەڕینی جەماوەری جەزائیرو سودان تابڵێی دیمەنێكی شۆڕشگێڕانەی جوان و سەرنج راكێش بوو، منیش كە لەماڵی خۆم دانیشتووم بەدڵ لەگەڵ ئەوان چەپڵەم لێدەداو دروشمم دژی دكتاتۆری سودان دەگووتەوە، بەڵام دەشترسم گۆڕانكاریەكانی ئەم دوو وڵاتە خەون و هیواو ئامانجەمانی ئەو دوو گەلەش بخاتە ناو چاڵی نا ئومێدی و سەرەنجام سودان و جەزائیریش ببنە یەمەن و لیبیایەكی تری ئێستاو بچیتە سەر ئەو نەخشەی بێ‌ مانایەی پێی دەگوترێت نیشتمانی عەرەبی، چونكە دزینی شۆڕش بەشێكی گەورەیە لە كەلتوری سیاسی ئەو وڵاتانە.

  • 1