ئەمە بڵاوبكەوە
FaceBook  Twitter  

 

گرنگە لە دوونیای كولتوور و هونەردا زوها حەدید بناسین

زوها حەدید ئەندازیاری تەلارسازی بەناوبانگی جیهانە، ئەو بەڕەچەڵەك عێراقی –بەریتانییە،لە 31 ی ئۆكتۆبە‌ری ساڵی 1950 لە بەغدادی پایتەختی عێراق لە دایك بووە و لە تەمەنی 66 ساڵی دا و لە ساڵی 2016 لە مەیامی كۆچی دوایی كردووە، باوكی (محەمەد حەدید) یەكێك بوە لە سەركردەكانی حیزبی نیشتمانی دیموكراتی عێراقی، و وەزیری دارایی عێراق بووە لە نێوان ساڵانی 1958-1960 .

زوها خوێندنی لە بەغداد دەستپێكردووە و تا قۆناغی دواناوەندی، لەساڵی 1971 ماتماتیكی خوێندوە لە زانكۆی ئەمێركی لە لوبنان، لە ساڵی 1977 تەلارسازی تەواو كردووە لی بەریتانیا، دواتر بوە بە مامۆستا لەوێ و وەك مامۆستایەكی شارەزا وانەی لە زۆرێك زانكۆكانی ئەورووپا و ئەمێركا ووتوەتەوە، لەوانە نیۆیۆرك، هامبۆرگ، هارفێرد، شیكاگۆ، ئاوهایۆ، كۆلۆمبیاو ییل.

ستایڵی كاركردنی زوها لە تەلارسازیدا دەچێتە سەر رێبازی (هەڵوەشاندنەوە) یان (التفكیكییە)،كە گرنگی دەدات بە ستایڵی تازە لە ئەندازەی تەلارسازییدا، تا ئێستا نزیكەی 950 پرۆژەی ئەندازەیی لە 44 وڵاتی جیاجیادا ئەنجام داوە، زۆربەی كارەكانی بەوە بەناوبانگن كە كاریكردووە لەسەر خەون و خەیاڵ و هیچ بایەخی بۆ هێڵی رەقی ستوونی و ئاسۆیی دانەناوە لە دیزاینەكانیدا، بەجۆرێك كە هێڵی زۆرسەربەستی بەكارهێناوە و هیچ بەربەست و یاسایەك كارەكانی دوورنەخستۆتەوە لە ئاستە ئیستاتیكییە باڵاكانی، هەروەها لە كارەكانیدا ئاسنی زۆر بەكارهێناوە، بەتایبەتی لە تەلاری وێستگەی ئاگركوژێنەوە لە ئەڵمانیا ساڵی 1993 هەروەها تەلاری مۆزەخانەی هونەری تازە لە رۆما لە ئیتاڵیا ساڵی 2009 هەروەها پردی ئەبوزەبی و بنكەی لەندەن بۆ وەرزشە ئاوییەكان، و مەڵبەندی رۆشنبیری لە ئازەربایجان، و زۆری دیكە .

لە تەمەنی هونەرییدا زۆرێك لە خەڵات و رێزلێنانی زۆری وەرگرتووە، و لەلایەن شاژنی بەریتانیەوە رێزی لێنراوە، جگە لەوەی خەڵاتی بریتزكری وەرگرتووە لە ئەندازەی تەلارسازیدا كە لە مێژوودا یەكەمین جاربووە ژنێك ئەو خەڵاتە وەربگرێت لە ساڵی 2004، كە هاوتای خەڵاتی نۆبڵە لە ئەندازەسازییدا، هەروەها خەڵاتی ئیمپراتۆریەتی بەریتانی و ئیمپراتۆریەتی ژاپۆنی ساڵی 2016، كە ئەمەش یەكەمین ژن بووە لە مێژوودا ئەو خەڵاتانە وەربگرێت، هەڵبژێردراوە لە بەهێزترین ژنی ساڵی 2010 لەسەر ئاستی جیهان.

بەهۆی وەستانی دڵەوە لە 31ی ئاداری 2016 لە یەكێك لە نەخۆشخانەكانی هەرێمی مەیامی لە ئەمریكا گیانی سپاردووە.

 

  • 1