ئەمە بڵاوبكەوە
FaceBook  Twitter  

له‌ ستایشی لیژنه‌ی کاری هه‌ره‌وه‌زی خانه‌قین

 

د. هەردی مێد- پاریس

له‌ ماوه‌کانی ڕابردوو له‌ یه‌ک دوو پۆستدا ئاماژه‌م به‌ دینامیک و بزاوتی هه‌ره‌وه‌زی له‌ شاری خانه‌قین کرد. ئه‌م دینامیکه‌ له‌ لایه‌ن کۆمه‌ڵێک که‌سی خۆبه‌خشه‌وه‌ که‌وتۆته‌ سه‌رپێ و هه‌موو کار و چالاکییه‌کانیشیان وا ده‌ریده‌خات که‌ له‌ گه‌شه‌کردن و نەشونمایه‌کی به‌رچاودان‌. کار و چالاکییه‌کانی ئه‌ندامانی لیژنه‌ی هه‌ره‌وه‌زی فره‌ فۆرمن و زۆر لایه‌ن و بواری ژیان و کۆمه‌ڵگایی له‌ خۆده‌گرن. هه‌ر له‌ نوژه‌نکردنه‌وه‌ی شوێنه‌ گشتییه‌کانه‌وه‌ بگره‌ (وه‌ک خوێندنگا، شه‌قام، ڕێگاوبان…)، تا بواری تایبه‌ت وه‌ک نوژه‌نکردنه‌وه‌ی شوێنی نیشته‌جێی خێزانی که‌م ده‌رامه‌ت، هاوکاریکردنیان… به‌ هه‌رحاڵ، لیژنه‌ی هه‌ره‌وه‌زی خانه‌قین پرۆژه‌گه‌لێکی دی گرنگیان له‌ به‌رده‌ستدایه‌ وه‌ک دروستکردنی نۆڕینگه‌یه‌کی خۆبه‌شی هه‌ره‌وه‌زی، تد.

سه‌ره‌ڕای گیانی خۆبه‌شی، زۆری کاره‌کانیان و سه‌نگینی پرۆژه‌کانیان لیژنه‌ی هه‌ره‌وه‌زی خانه‌قین سوودی له‌ که‌مترین ئاوڕدانه‌وه‌ی میدیا و ڕۆژنامه‌کان نه‌بینیووه‌. له‌ کاتێکدا، شێوازی کارکردن و چوونه‌ ڕێوه‌ی ئه‌م بزاوته‌ خۆبه‌خشه‌ هه‌ره‌وه‌زییه‌ له‌ خانه‌قین زۆر له‌وه‌ زیاتره‌ که‌ ته‌نیا له‌ دیدگای پرۆژه‌یه‌کی هه‌ره‌وه‌زییه‌وه‌ ته‌ماشا بکرێت. له‌ ڕاستیدا ئه‌م بزاوته‌ زۆرینه‌ی سیفه‌ت و توخمه‌کانی ده‌ستگای تێدایه‌. ئه‌م بزاوته‌ بۆته‌ دامه‌زراوه‌ و له‌ لیژنه‌یه‌کدا ڕێکخراوه‌. ئه‌م لیژنه‌یه‌ کۆبوونه‌وه‌، به‌رنامه‌، ڕۆژمێری کار، تد تایبه‌ت به‌ خۆی هه‌یه‌. جگه‌ له‌ بوونی دیاریکردن ڕۆڵ بۆ هه‌ر ئه‌ندامێکی پاشان ئاماده‌یی دابه‌شکردنی کار و چالاکی له‌ نێوان که‌سه‌ خۆبه‌خشه‌کانی.

ئه‌م بزاوته‌ ده‌ستگایه،‌ چونکه‌ زمانی تایبه‌ت به‌ خۆی هه‌یه‌: ئه‌وه‌تا له‌ جیاتی زاراوه‌ی <به‌خشین>، زاراوه‌ی <به‌شداری> به‌کارده‌هێنن. پاشان کار و چالاکییه‌کانیان له‌ خانه‌ی <خێر و حه‌سه‌نات>دا تۆمار ناکه‌ن، به‌ پێچه‌وانه‌وه‌ وه‌ک <هه‌ره‌وه‌زی>، <خۆبه‌خشی>…ده‌یناسێنن. ئه‌م بزاوته‌ ده‌ستگایه،‌ چونکه‌ لۆژیکی تایبه‌ت به‌ خۆشی هه‌یه‌. ئه‌وه‌تا کاری به‌خشین و هاوکاری له‌و دنیابینییه‌ زاڵه‌ دوور ده‌خه‌نه‌وه‌ که‌ هه‌موو <یارمه‌تی> و <کۆمه‌کێک> ده‌باته‌وه‌ بۆ دین و لۆژیکی <خێروخێرات>. به‌ مانایه‌کی دی، ئه‌م ده‌ستگایه‌ هاوکاری و پشتیوانێکانی بۆ ئه‌وانی دی ده‌کات‌ به‌ پرسێکی کۆمه‌ڵگایی بۆ ئه‌وه‌ی هه‌موو مرۆڤه‌کان به‌ده‌ر له‌ جوداییه‌ ئاینی و مه‌زهه‌بییه‌کان به‌ ده‌وری هاوکاری یه‌کتر و ده‌ستگرتنی یه‌کتردا کۆبکاته‌وه‌.

ئه‌م ده‌ستگایه‌ خودان دنیابینی تایبه‌ت به‌ خۆیه‌تی و ده‌یه‌وێت کۆمه‌ڵگا له‌ ئافاتی سه‌رمایه‌داری و لۆژیکی <هه‌ر که‌س بۆ خۆی> ڕزگار بکات. ئه‌م ده‌ستگایه‌ ده‌یه‌وێت کایه‌ی ئابووری لۆژیک و دنیابینی خۆی به‌ سه‌ر کۆی کایه‌کانی دیدا نه‌سه‌پێنێت، واته‌ ڕێگری له‌وه‌ بکرێت که‌ <لۆژیکی قازانج و که‌ڵه‌که‌بوون> ببێته‌ بنه‌ما و ڕێسای کۆی چالاکییه‌ مرۆییه‌کان. بۆیه‌ لیژنه‌ی هه‌ره‌وه‌زی خانه‌قین ده‌یه‌وێت کۆمه‌ڵگا به‌و ئاقاره‌دا ئاراسته‌ بکات که‌ خودی خۆی، خۆی ڕێکبخات، هه‌ر خۆی مشوری خۆشی بخوات. ڕاسته‌، هه‌ندێک ڕه‌خنه‌ له‌م جۆره‌ ده‌ستپێشخه‌رییانه‌ ده‌گرن و پێیان وایه‌ نابێت کۆمه‌ڵگا ببێته‌ جێگره‌وه‌ی ده‌وڵه‌ت و له‌ جیاتی ده‌وڵه‌ت به‌ هانای خۆیه‌وه‌ بێت. سه‌ره‌ڕای دروستێتی ئه‌م ڕه‌خنه‌یه‌، به‌ڵام ناشبێت له‌و شوێنه‌ی ده‌وڵه‌ت بێده‌ربه‌ستانه‌ مامه‌ڵه‌ له‌گه‌ڵ بێده‌رامه‌ت و بێلانه‌کانی کۆمه‌ڵگا ده‌کات، کۆمه‌ڵگا به‌ هانای ئه‌مانه‌وه‌ نه‌یەت. ناکرێت به‌ ناوی به‌جێهێشتنی په‌‌یوه‌ندییه‌ کۆمه‌کییه‌کان بۆ ده‌وڵه‌ت، کۆمه‌ڵگا له‌ ئاست که‌مده‌رامه‌ت و لانه‌وازه‌کانی بێده‌ربه‌ست و خوێنسارد بێت.

به‌ هه‌رحاڵ، ئه‌وه‌ی له‌ خانه‌قین ده‌گوزه‌رێت بۆته‌ ده‌ستگا و له‌ زۆر ڕووه‌وه‌ نوێیه‌ و خه‌سڵه‌تی پێشه‌نگی هه‌یه‌. بۆیه‌ ئومێده‌وارم میدیاکان به‌ چڕی ئاوه‌ڕ له‌ کار و چالاکییه‌کانیان بده‌نه‌وه‌‌.

 

  • 1