ئەمە بڵاوبكەوە
FaceBook  Twitter  

لەمانگی كانونی دووەمی ساڵی 1978 پسولەی گواستنەوەی حزبی هاوڕێ د. حبیب ئەلمالح لەلیژنەی محەلی نەینەوا بۆ محەلی هەولێر هات، لەپسولەكەدا هاتبوو، كە هاوڕێ ئەندامی لیژنەی محەلییەو، هاوڕێیەكی رێكوپێكەو، بایەخی تەواو بەجێبەجێكردنی ئەركی حزب دەدات و، لەكۆبونەوەكانی حزبی دواناكەوێ و ، بەگیانی هاوڕێیانە رەخنە لەژیانی حزبیدا بەكاردێنێ، لە بواری قوتابیان و لاواندا ئەزمونی باشی هەیە... هاوڕێ د. حەبیب ئەلمالح لەشارۆچكەی عەنكاوە ناسراو بوو، لاوێكی جوان و پاكو خاوێن بوو، باڵای مامناوەند بوو، زۆر سادەو بێ فیز بوو، لەپەیوەندی و هەڵسوكەوتیدا لەگەڵ هاوڕێیان و ئامادەیی بۆ كاری حزبی هەست نەدەكرا كە دكتۆرە، پەیوەندی پێوەكراو هەندێ جار دەهاتە بارەگای لیژنەی محەلی هەولێرو چاوەڕوانی وەرگرتنی ئەركێكی حزبی دەكرد، لەمەكتەبی محەلی هەولێر، ئەوكاتە هاوڕێی كۆچكردوو فاتیح رەسول سكرتێری محەلی بوو، دیراسەی باری حزبی دكتۆر كراو، بەباش زاندرا بەرپرسیارێتی لیژنەی قەزای قوتابیان لەناو شاری هەولێر وەربگرێت، لەم كاتەدا ژمارەیەكی زۆر لە قوتابیانی شیوعی لەناو شاری هەولێر هەبوون و، چالاكی فراوانیان ئەنجام دەدا، لەهەمان كاتدا بڕیاردرا كە پەلە نەكرێت لەوەرگرتنی بەرپرسیاری لیژنەی قەزای قوتابیان تا هاوڕێ دكتۆر هەندێ شارەزایی لەئیش و كارەكانی لیژنەی محەلی هەولێر پەیدا دەكات و، ئاشنایی لەگەڵ ئەندامانی محەلی دەبێت، هەر زوو پەیوەندییەكی توندوتۆڵم لەگەڵیدا رێكخست و، بۆم دەركەوت كە دكتۆر بەپەلەیە بۆ وەرگرتنی ئەركێكی حزبی، بەر لەوەی هیچ ئەركێك لەلیژنەی محەلی هەولێر وەربگرێت داواكرا بۆ سەربازی وەكو ئەفسەری ئیحتیات، بەبڕیاری حزب بۆ سەربازی چوو، هەموو پەیوەندییەكی لەگەڵ لیژنەی محەلی هەولێر لەسەر داوای حزب پچڕی و، لەلایەن ئەندامانی لیژنەی مەحەلی هەولێر بەباشی نەناسرا، كە چووە سەربازیش باسی نەكراو دووكەوتەوەو دیار نەما.

لەمانگی كانونی یەكەمی 1979 لەگەڵ هاوڕێیان غەفار جەمال و هیوای برای، بڕیار درا پەیوەندی بەهێزی پێشمەرگەی حزبەوە بكەین و، بۆ ئەم مەبەستە ئامادەكاری تەواومان كردو، هاوڕێ غەفار لەگەڵ كاك تارق سەید نوری، كە كەسایەتیەكی ناسراوبوو، لەگەڵ یەكێتی بوو، بەر لەدروست بوونی یەكێتی لەگەڵ باڵی م.س پارتیدا بوو، وە لەهەولێر بەرپرسێكی دیار بوو، وە كورێكی بەرێز و هێمن و مرۆڤدۆست بوو، بەداخەوە لەشەری ناوخۆدا شەهید بوو، رێككەوتین لە رێگای ئەوەوە بەرەو شاخ بچین.

شەوی 21/12/1979 بۆ نەخۆشخانەی جمهوری لە هەولێر چووم، كە دكتۆر حەبیب لەنەخۆشخانەكە دكتور بوو، یەكرتمان بینی و لەگەڵمدا هاتە دەرەوەو هەندێ قسەو باسمان كردو ئاگادارم كرد، كە بەندە لەم رۆژانە بەرەو شاخ لەگەڵ هاوڕێ غەفارو هیوا دەرۆین، هاوڕێ دكتۆر ووتی هیوادارم بەبێ گرفت بەهاوڕێیان بگەن و رێزم بۆ هاوڕێیان و ئاگاداربن، هەركاتێك حزب داوا بكات من ئامادەم و ئارەزووی زۆرم هەیە بۆ بوونە پێشمەرگە، هەروا ووتی سەیر بكە ئەوە پێڵاوی كالەم لەپێ كردووە بۆ كاتی پێویست بۆ ئەوەی بتوانم دەرباز بم، تكام لێكرد كە زۆر وریابێ و هەتاكو بكرێت و بتوانی لەناو شار بێت بۆ حزب پێویسترو گرنگترە، بەگەرمی و بەبێ دەنگی لەباوەشی گرتم و ماچی كردم، دیدارێكی زۆر كاریگەرو خۆش و پڕ خۆشەویستی بوو، بەرلەوەی لەیەكتر دابڕێین و دوپاتی ئەوەی كردەوە كە هەموو كات ئامادەیە بۆ جێبەجێكردنی بڕیارەكانی حزب، سڵاورێزم بۆ هاوڕێیان... داخی گرانم هاوڕێ د. حەبیب لەشار مایەوەو لەئەنجامدانی ئەركی حزبی بەردەوام بوو، تاكو گیراو بەدەستی پیاوانی ئەمن شەهید بوو، رۆژی دەرچونمان لەشاری هەولێر، كاك تاریق سەید نوری و كاك ئەنوەر، ناسرابوو بە انور كالە سەیارەیەكیان هێناو كاكە انور لێیخوڕی بوو، بەرەو سەنگەسەر بەرێكەوتین و چووینە ماڵێك كە دۆست و برادەری كاك تاریق و ئەنوەر بوون، پاشان لەرێگای ئەوانەوە گەیشتینە بارەگای حزب لەناوزەنگ، لەدوای راپەڕینەوە بەدیداری كاكە تاریق شاد بوومەوە بەڵام كاك ئەنوەرم نەبینیەوە و كۆچی دوایی كردبوو.

هاوڕێ غەفار ئەندامی قەزای قوتابیان بوو لەناو شاری هەولێرو هاوڕێیەكی وشیار و چاو نەترس بوو، لەتەمووزی ساڵی 1980 لەناوچەی چۆمان دەكەونە بۆسەیەكی جاشەكان و شەهید بوو، پاشان هاوڕێ هیواش شەهید بوو، ئەم خێزانە پێنج شەهیدی هەیە چوار براو باوكیان لەرێگای ئازادی و سەرفرازی گەلەكەیان و داكۆكی لە حزبەكەیان.

نەمری و سەربەرزی بۆ هاوڕێیانی شەهید د. حەبیب ئەلمالح و غەفار و هیواو كاكە تاریق سەید نوری

23-7-2019