ئەمە بڵاوبكەوە
FaceBook  Twitter  

لە ئەنجامی ڕاپرسە گشتیەكەی 25/9/2017 لە هەرێمی كوردستان و ناوچە دابڕێنراوەكاندا دانیشتوانی كورد لە خورماتوو و دەورووبەری بەپلەی یەكەم و لە كەركوك و دەورووبەری بەپلەی دووەم كەوتنە بەرهێڕشی دڕندانەی سوپا و (حشدی شەعبی – هەمە چیزە) بە شێوەیەكی بێ‌ هاوتا و بێ‌ نموونە ، تەنانەت لە زەمانی (صدام)یشدا .

ئەوە بوو ئەو شارە (خورماتوو) جارێكی تر بە (عەرەب) كرایەوە و هەرچی ماڵ و دووكانی كوردەكان هەبوو هەر هەموی تاڵانكرا و زیاد لە چوارسەد خانوو و ماڵ تەقێنرایەوە و سوتێنرا ، پاش ئەوەی كە خەڵكەكەی ئاوارەو دەربەدەركران ، یان دەستگیركران و كوژران و ئەشكەنجەدران !! .

وا خەریكە دووساڵ بەسەر ئەو كارەساتەدا تێئەپەڕێ‌ نەحكومەتی هەرێم / هەشتەم ، نەحكومەتی عادل عبدالمهدی نە حكومەتی نۆیەمی هەرێم هیچ لایەكیان خۆیان نەكرد بە خاوەنی ئەو خەڵكە لێقەوماوە دەربەدەر و ماڵ وێرانە لێرە باس لە هەڵویستی حكومەتی عبادی ناكەین چونكە خۆی تاوانكار و ئەنجامدرەی ئەو كارەساتەیە .

سەبارەت بە حكومەتی عادل عبدالمهدیش لەوە ئەچێ‌ ئەم گرفتەیش ئاوێتەی كێشەكەڵەكەبوەكانی نێوان (بەغداد و هەولێر) كرابێ‌ و كەوتبێتە گۆمەوە !!

واتە كێشەكە كەوتۆتە ئەستۆی حكومەتی هەرێم چونكە :

1. ئەو خەڵكە لێقەوماوە قوربانی ڕیفراندۆمن كە وەك خۆیان ئەڵێن 95% دەنگیان بۆ ئایندەی كورد دابوو .

2. لەبەرئەوەی ، تا ئەمڕۆش – پارتی و یەكێتی – ململانێیانە لەسەر ئەوەی كامیان لەو ناوچەیەدا باڵا دەست ببن .

خەڵكی ئەم قەزایە لەو كاتەوە ڕاستەوخۆ و ناڕاستەوخۆ چەندین جار پەنایان بۆ حكومەتی ڕابوردوو و نوێی هەرێم بردووە و سكاڵای حاڵی خۆیان كردوە هەرچەندە شاراوە چاویان بە كاربەدەستان كەوتووە ،بەڵام نەبەچاك نەبە خراپ وەڵامیان نەدراوەتەوە و ناشزانرێ‌ ئاخۆ ئەم كێشە تازە ئەم بە عەرەبكردنە تازە لەگەڵ حكومەتی بغداد باسكراوە یا نا ؟! 

خۆ نائبەكوردەكانیش لەپەرلەمانی عێراقدا ڕۆژێك لە ڕۆژان كێشەی ئەو هەزاران لێقەوماوەیان نەكرد پرسیارێك كە ئاراستەی حكومەت بكرێ‌ !! یان ئەمیش تێكەڵ بە ماددەی (140) كراوە كە تازە زیندوكراوەتەوە و كەس نازانێت چی بەسەر دێت !!

پرسیارەكە لێرەدایە : ئاخۆ ماوە دراوە ئەو خەڵكە دەربەدەركراوە بگەڕێنەوە بۆ شارەكەیان ؟ ئەگەر وایە ، خانوەكانیان ، دوكان و كەلوپەلی تاڵانكراویان بۆ گەڕێنرایەوە- بێگومان نەخێر !! ئەگینا بۆ هاواریان لێ‌ هەستاوە و پەنا بۆ حكومەتی هەرێم ئەبەن؟!

بەهەر حاڵ پێویستە لەسەر حكومەتی نوێی هەرێم كێشەی قەزای خورماتوو بكاتە خاڵێكی سەرەكی لەبەرنامەی كاریدا و زووبەزوو بچێت بەپیر داواكانیانەوە هەروەها پێویستە لەسەری كە ئەم كێشەیە وەك دەست درێژی و تاوانێك بەرانبەر بەكورد لەگەڵ حكومەتی بغداد باس بكات و بەهێند وەربگرێ‌ .

ئەوەی لە خورماتوو لەسەر دەستی (حشدی شەعبی)دا ڕویداوە تەواوكەری هەڵمەتی ئەنفالكردنەكەی صدام /ە نابێ‌ چاوپۆشی لێ‌ بكرێ‌ .

 

 

 

احمد حامد

3/9/2019

 

  • 1