ئەمە بڵاوبكەوە
FaceBook  Twitter  

تشتێ‌ من ژ نێرینا وی فامكری، ئیسلام خوەدی تێكستێن نەگوهرە، هەلگرا بەرسڤێن ئامادەكریە بو تێكرایا پرسان، بەرسڤێن وێ‌ ب پیرۆزی دهێنە حەسباندن، واتە كەسەكێ‌ ماف نینە تێكست و بەرسڤێن وێ‌ راگێشیتە بەر گەنگە و گوهرینان، ئولێ‌ ئیسلامێ‌ ئولەكێ‌ كەڤنارە بەری هەزار و چوار سەد سالان شیایە خوە ب هێز ئیفادەكەت، د گەلەك قووناغێن سەخت و دژوار دە كاروانێ‌ خوە دایە مەشاندن، هەتا ئیرۆژی ب هەمان نێرینا كەڤنار ل ژیانێ‌ د نێرن، ئێك ملیم ژ نرخاندنا خوە لهەمبەری هەموو پرسێن گرێدایی (ژیانێ‌، هزرێ‌) نەداینە گوهارتن..!

ئەو وەسا بۆ دچن، كۆ ئێدی هەوجەناكەت مرۆڤ زێدە (هزر بكەت .. پرسان ئاراستەكەت .. ل بەرسڤێن وان بگەریت) لگور نرخاندنێن وان بەرسڤێن هەموو پرسان ب تێكستێن نەگوهر یێن ئامادەكرینە، پێنەڤێت كەسەك خوە شەپرزە و ماندیكەت، د فەلسەفا ئولی دە تنێ‌ تشتەك هەیە، ئەو ژی كاركرنە ژبوی جیهانەكا دن، د جیهانا دن دە دو جه هەنە: 1) جەهنەمەكا تەژی ئاگر. 2) بەهەشتەكا مشت ژ هەموو پێتڤیاتێن مرۆڤی، تاكە رێكا لپێشیا مرۆڤی ئەوە، شەرت و مەرجێن ئولێ‌ ئیسلامێ‌ ب باشترین شێوە جیبەجیكەت، داكو ژ جەهنەما تەژی ئاگر رزگار ببیت و شادببیت ب بهەشتا مشت ژ هەموو پێتڤیاتیان.

كەسێن باوەری هەی ب فەلسەفا ئولێ‌ ئیسلامێ‌ مافێ‌ وانە ئەو دەرفەت بو بهێتە رەخساندن ژبوی هندێ‌ هەموو ئەركێن خوە ب ئازادانە جیبەجیكەن، داكو بەرامبەری جیهانەكا دن قەردار دەرنەكەڤن، ئەڤ جیهانا نها ئەم تێدا ژبوی وان جیهانەكا دەمكی یە، جیهانا هەتا هەتایی جیهانەكا دنە، ئەو ب هەموو هێزا خوە ژبوی ئەوێ‌ جیهانێ‌ كاردكەن، گوهرین دڤێ‌ جیهانێ‌ دە بو وان زێدە نەدگرنگن ..!

لهەمبەری فەلسەفا ئولێ‌ ئیسلامێ‌ فەلسەفەك دن هەیە، لگور فەلسەفا دن ژی تشتەك دڤێ‌ جیهانێ‌ یێ‌ (پابت) نینە، پرسێن گرنگ ژی هەتا نها دبێ‌ بەرسڤن و ب مێكشێن ئەكتیف لێگەرینا بەرسڤا پرسان ئەنجامدەن، ژبوی ئەڤێ‌ فەلسەفێ‌ پێتڤیاتیا پرۆسەیا ژیانێ‌ ب گوهرینێن بەردەوام هەیە، ئەڤ جیهانە ب جیهانەكا سەرەكی دهێتە زانین، گوهرینا ئەڤێ‌ جیهانێ‌ و پێشدابرنا پرۆسەیا ژیانێ‌ ئەركێ‌ هەر كەسەكێ‌ یە ئازادانە بهزریت و لێگەرینا خوە د هەر واری دا پێكبینیت.

هەڤالێ‌ من یێ‌ زێدە هێژا (عەبدال نوری) یێ‌ كو ئەز گەلەك حەژ (هزر .. نێرین ..كەسایەتی) یا وی دكەن، ئەوی د بەرسڤێن خوەدا ئەو چەند خوەیا كر، كو ئیسلام ئولەكە گوهرینا ناپەژرینیت و دڤی بیاڤی دا یێ‌ خوە ئێلایی كری، ئەگەر بەحس ل جیهانەكا ڤەكری و مودێرن بكەین، كو تەژی شارستانیەت و پێشكەڤتن ببیت، گەرەكە ئولێ‌ ئیسلامێ‌ تەرەف نەبیت تێدا، فعلەن ژی وەسایە، نابیت ئەو تێكەلی شارستانیەتا سەردەم بیت، چونكە شارستانیەتا سەردەم رێكا وێ‌ یا ڤەكریە و چ پیروزیان ل پێشیا خوە نابینیت، ئارمانجا وان گوهرینا هەر تشتی یە بەرف باشتر و گەشتر..!

دەمێ‌ ئەڤ بەرنامە هاتیە پێشكێشكرن، زانایەكێ‌ ئولێ‌ ئیسلامێ‌ ژی دناڤا بەرنامەی دا یێ‌ بەرهەڤ و ئامادە بو، ئەوژی لگور شیانێن خوە بەرسڤێن خوە ب رەنگەكێ‌ جوان دان و نێرینا ئیسلامێ‌ دایە شرۆڤەكرن، ئەڤا مرۆڤی دناڤا بەرنامەی دا دیتی، گوپیتكا شارستانیەتێ‌ بوویە ژبوی جڤاكێ‌ مە، ژبەركو دو هزرێن ژ هەڤدو جودا مژارێن گرنگ و هەستیار گەنگەشەكەن، بەرنامە ب سەركەفتانە و بێ‌ گرفت بداوی بێت، راستی مرۆڤ بڤێ‌ چەندێ‌ گەلەك دلخوەش دبیت، ئەڤە وێ‌ رامانێ‌ دگەهینیت مەژی جهێ‌ خوە د گوهرینان هەیە هەتا رادەكێ‌..!

ئەڤا ل تورێن كومەلایەتی رویدای، زمانێن كرێتكرن و نەشارستانی بكارئینای، ئەز دوێ‌ باوەرێ‌ دامە كو ئەڤ مرۆڤە یێن ئاراستەكری بن، ب هیچ رەنگەكێ‌ نە مرۆڤێن نورمالێن دیندارن واتە نە خەلكەكێ‌ سادەیە، بەلكو زێدە ئەو كەسن یێن لپشتا وان هێزێن تاری هەی، ئولی بو مەبەستێن خوە یێن سیاسی بكارتینن، دخوازن لهەمبەری ئازادی یا هزركرنێ‌ سیاسەتا ترساندنێ‌ پەیرەوكەن، پاراستنا ئازادی یا هزركرنێ‌ ئەركێ‌ دامودەزگەهێن حكومەتێ‌ یە، پێتڤی یە حكومەت لهەمبەری ئەو كەسێن بكارێن تەشهیركرنێ‌ رادبن دۆز لسەر بهێنە توماركرن، داكو جارەكا دن لهەمبەری هزركرنەكا دن یا ئازاد ئەڤ جورە بوویەرە نەهێنەڤ دوبارەكرن.

هەبوونا ئەڤان جورە بەرنامان گەلەك یا گرنگە، د جڤاكێ‌ مەدا كەسێن گەلەك شارەزا یێن هەین د وارێن ئولێ‌ ئیسلامێ‌ دا، دیسان ژی مە كەسێن زێدە فاما یێن هەین خوەدیێن بیركرنەكا سیكولارن، پێتڤیاتیا جڤاكێ‌ مە بهندێ‌ هەیە، د نیڤبەرا وان دا دایەلوكەكا شارستانی بهێتە ئەنجام دان، پێكئینانا ئەڤێ‌ دایەلوكێ‌ ئەركێ‌ كەسێن (ئولدار وسیكولارە) ئەڤێن ب زمانێ‌ جادێ‌ (شكاندن .. كرێتكرن .. تەشهیركرن) ێ‌ بكارتینن جهێ‌ وان د چ جڤاتان دا نینە.

ئەڤ مژارێن هزری بلا بو هزرڤانان بن، خەلكێ‌ دیتر ئەڤێن نورمال بلا خوە ب هن مژارێن دن ڤە مژویلكەن، مەبەست ل مژارێن دن ئەوە، ئەم یێ‌ د جڤاكەكێ‌ دە دژین، یاری ب سامانێن وی دهێتەكرن، دیاردێن دزی و گەندەلیێ‌ یێن گەهشتیە گوپیتكێ‌، بێ‌ دادی و یەكسانیا جڤاكی ب هیچ رەنگەكێ‌ هەست پێناهێتەكرن، ئازادی یا رادەربرینێ‌ بەردەوام ب رێكێن جودا جودا یا دهێتە سەركوتكرن، ل شونا وێ‌ گرنگە ئەم گوهرین و پێشڤەچوونا ژ دەسهەلاتێ‌ بخوازین، ئەڤان چەند خالێن مە لسەری ئاماژەكری هەموو یێن عەلەقەدارن ب ژیانا مەیا رۆژانەڤە،كەس لمە نینە ب دژواری پێنە هێتە هنگافتن.

لداویێ‌ دبێژم مانشێتێن مە یێن سەرەكی نە ئەوەن ئەم بێژین فلان دژی ئولی شاش ئاخفت یان بەرۆڤاژی ئولی د هزریت، ئەڤە ئازادی یا كەسی یە، چ پەیوەندی یا تاكێن دن پێڤە نینە، ئەڤێن هاورێ‌ (عەبدال) ئێشاندی، بلا بچن لێبورینێ‌ لێبخوازن، پێتڤیاتیا گەلێ‌ مە ب كەسێن خوەدی جسارەت و ئیرادە هەیە، ئەو ب راستی ژی مرۆڤەكێ‌ ئازادە د بیركرنێ‌ دە، ژبوی بەرژوەندێن بەرتەسك چ جاران خوە نە چەماندی یە، مرۆڤێن خوەدیێن ئەڤان ساخلەتان فەرە لجەم مە نرخێن خوە هەبن، لجها ئەم رێزێ‌ لێبگرین ئەم رێكا ئێشاندنێ‌ بكارتینین، ئەڤە حەقیقەت كارەساتەكا مەزنە و جهێ‌ داخێ‌ یە.

خەلك نا چێبیت رێكێ‌ بدەت، ئاراستەیا نەرازیبوونێن وان بهێنە گوهارتن، ئولێ‌ ئیسلامێ‌ هند زانا یێت هەین دشێن دڤان دبەیتان دا بەرەڤانیێ‌ لخوە و ئولێ‌ خوە بكەن، لجها ئەڤان تشتان ئەم بێژین مە (ئەرزانی، عەدالەت، یەكسانی، ئازادی یا رادەربرینێ‌، دابینكرنا پێتڤیاتێن ژیانێ‌ مینا ئاڤ و كەهرەبان، دامەزراویكرنا دامودەزگەهێن حكومەتێ‌، پێكئینانا گوهرینێن بنكەین) ئەڤە بلا ببنە درویشمێن نەرازیبوونێن مە د شەقام و تورێن كومەلایەتی دا، هیڤی دارین ئەم باش فێری هندێ‌ ببین رێزێ‌ ل نێرینێن جیاواز یێن بەرامبەری خوە بگرین، ئەو رێكا هەری دروستە و گەلێ‌ مە د وێ‌ چەندێ‌ دا دێ‌ سەركەڤیت. 

  • 1