ئەمە بڵاوبكەوە
FaceBook  Twitter  

نها دورا هەرفاندنا كوچكا دكتاتورێ‌ توركیا یە .. كورد دێ‌ رێبەراتیا گوهریان كەن ..!

 

گوهرین د پلانێن وەلاتێن زلهێز دە:

رۆژهەلاتا ناڤین لهەمبەری گوهرینێن گرنگە، بەلانسا شێوازێ‌ گوهرینان دبن باندورا وەلاتێن زلهێزە نەمازە (روسیا، ئەمریكا) وەلاتێن هەریمی مینا (توركیا،ئیران) نە فاكتەرێن بالكێشن د هاوكێشەیا دیزاینكرنا نەخشێ‌ نوی یێ‌ رۆژهەلاتا ناڤین، ئەو گوهرینێن دهێنە پێشبینیكرن لداویێ‌ دێ‌ وان ژی وەكە (عیراق، سوریا) ڤەگریت، واتە گوهرینێن مەزن دئارادانە، بێگومان نەخشێ‌ گوهرینان ممكن نینە یێ‌ (جزئی) بیت بەلكو دێ‌ ب تەمامی یێ‌ گشتگیر بیت..!

پرۆسەیا گوهرینان پرۆسەیەكە پێتڤیاتیا وێ‌ زێدە ب دەمی یە، سرۆشتێ‌ ئەڤێ‌ پرۆسێ‌ لەزاتیێ‌ ناپەژرینیت، گوهرینێن كو د پلاندانە نەبو سالەك و دوسالانە هەتا بێژین پرۆسەیا گوهرینان یا دەمكییە، هێزێن زلهێز ناخوازن بریارێ‌ لسەر گوهرینەكێ‌ بدەن، پشتی دەمەكێ‌ كێم تەڤلیهەڤی تێدا پەیداببیت د ئەنجام دا ئەبدەیتكرنێ‌ ب زوری لسەر وان بسەپینیت، وەلاتێن زلهێز دخوازن كارەكێ‌ وەسا بكەن تەمەنێ‌ وێ‌ زێدەتر بیت ژ چاخەكێ‌، بەرژوەندێن وان سەد ژ سەدێ‌ یێن گرەنتیكریبن دبن رەۆشەكا سەقامگیر و رحەت دە. 

وەلاتێن هەرێمی نەفاكتەرن د گوهرینان دە:

راستە وەلاتێن هەریمی دناڤا لڤ و تەڤگەرەك ئازریایی دانە، ئەو دوێ‌ باوەرێ‌ دانە گوهرین یێن حەتمینە، ناهێتە چاڤەرێكرن ئەو وەكە جاران هەر بمینن وەلاتێن هەریمی یێن خوەدی كاریگەری، دەولەتێن هەریمی باش دزانن ئەو ژی ئارمانجا گوهینانە، تشتێ‌ ئەو بزاڤێ‌ بو دكەن گیروكرنا پرۆسەیا گوهرینایە و پاراستنا هن بەرژوەندیان لدەڤەرێ‌، ئەڤە ژی هند كارەكێ‌ ئاسان نینە، ژبەركو ئەڤ وەلاتە د هندرێ‌ خوەدا خوەدیێن دەهان پرسگرێكێن مەزنن یێن كو ب سالانە ناخوازن چارەسەركەن و بەردەوام سیاسەتا زولم و ستەمێ‌ لهەمبەردا بكارتینن.

ئەگەر ب ئاوایەكێ‌ خوەیاتر مرۆڤ رەوشا وان ئەنلیزەكەت، ئەو چەند زەلالدبیت كو وەلاتێن هەریمێ‌ دناڤا رەۆشەكا سایكولوجیا خراب دانە، ئەوان نە نها و نە پێشان ئنیەتێن چارەسەركرنا پرسگرێكان نە هەلبژارتینە، تاكێن وەلاتێن وان دهیچ سەردەمەكێ‌ دە نەشیانە یێن ئازادبن و ب ئازادنە نێرین و بوچوونێن خوە بینە زمان، ئەو ئەتموفەرێن كرێت ب درێژاهیا سالان رەۆشا وان د هەر بیاڤی دە داپوشییە.

وەلاتێن هەرێمی یێن هەتا نها رەۆشا وان نەهاتیە هنگافتن ب شێوازەكێ‌ زەلال توركیا و ئیرانن، هەر ئێك ژوان ب رەنگ و شێوازەكێ‌ دبن گڤاشتنێن گران دانە یێن ناڤخوەیی و دەرەكی، گرفتێن وان یێن ناڤخوەیی گەلەك و گەلەك یێن مەزن و قورسن، د بیركرنێن وان دە تنێ‌ هەلبژارتنا رێكێن بكارئینانا هێز و شدەتێ‌ یە، زمانێن دانوستنادن و دایەلوكێ‌ لجەم وان یێ‌ وندایە و ب چ رەنگان باوەریێ‌ پێنائینن، پێلێن گوهرینان بێهنا وان یاتەنكری، ئەو چاك د وێ‌ باوەرێ‌ دانە كو گوهرین هنبانا وان بەرنادەن هەتا داویێ‌ ب قرالگەهێن وان نەئینن.

هەلبەت سەردەما ئیرۆ سەردەما دیموكراسیەتێ‌ یە، وەلاتێن زلهێز پتر ئالیگرێن هندێ‌ نە دیموكرایەت جهێ‌ خوە دناڤا هەر كومەلگەهەكێ‌ دابگریت، سیستەمێن دكتاتوری ئەو نرخ و بهایێن خوە د ستراتیژیەتا بەرژوەندێن وەلاتێن خوەدی هێزدا نەمایە، مخابن چەند وێڤە دچیت بتر ئەڤ وەلاتێن هەرێمی یێن پاشگەزدبن ژ دیموكراسیەتێ‌، زێدە یێ‌ خەونان ب سیستەمێن كلاسسیك و بسەرڤەچوویی دبینن، توركیا ڤێ‌ داویێ‌ هەر ب ئاشكرا ئەنجامێن هەلبژارتنان دانە ئالیەكێ‌ و كار پێنەكر، لجها نوینەرێن كوردان ب دارێ‌ زوریێ‌ قەیوم بنەجهكرن، پرانیا چالاكڤانێن سیاسی یێن ئوپوزیونێ‌ خستنە داناڤا زیندانان و بدەهان دوسیێن ڤالا ژ (وژدان و مرۆڤاتیێ‌) لسەر توماركرن، ئەڤێ‌ سیاسەتێ‌ ژبلی ناڤچوونێ‌ تشتەكێ‌ دن لبەندا وان نینە.

سیاسەتا بەرژوەندییان د هن داخویانیان دە: 

داخویانیێن داویێ‌ یێن سەرۆكێ‌ ئەمریكا ژبوی وان گەلەك یێن نورمالن، ئەو د وەلاتێن خوەدا دامەزراوەنە، ژبێخەمەت سەرەراستكرنا بەرژوەندێن وەلاتێن خوە هەر تشت لجەم وان یێ‌ ممكن و رەوایە، ژبوی مەژی داخویانیێن وان یێن سەیرن ..! ژبەركو ئەم د بنەكوكا خوەدا وەلاتێن فەودالین، مە ئاخڤتن و خەبەرێ‌ خوە یێ‌ ئێكلایكری هەیە، چ شاش یان راست ئەم لسەر قەسا خوە ناڤەگەرین ئەگەر هەموو دەستكەفتەكێ‌ ژی ژدەست بدەین، ئەڤەژی ئەنجامێن نەبوونا هوشیاریا خواندنەكا زانستییە د بیاڤێن سیاسی دە.

هێزێن سەرەكی ل دەڤەرێ‌ یاریا پتر بدەستختنا قازانجێ‌ دكەن، د ئەڤێ‌ یاریێ‌ دە هەموو جورە تەكتیكەك یا موحتەمەل و مولەتدایە، هەر رێكەكا ئەو زێدەتر دەستكەفتان تێدا ببینن بێ‌ دودلی دێ‌ هەلبژێرن، هندی بێژی ئەو یێن گرێدایی وەلاتێ‌ خوەنە، چ تشتەكێ‌ ئەو لسەر وەلاتێ‌ خوە را ب پیرۆزی ناهەژمێرن، بەرژوەندێن گەل و وەلاتی لنیك وان سەرپشكا هەر بژاردەیەكێ‌ یە، بڤی ئاوای ئەو سیاسەتا خوە لجیهانێ‌ ددەنە پەیرەوكرن، فەرە ئەم ئەڤێ‌ راستیێ‌ تێبگەین.

تاكە جهێن ئەمریكا شیایی هەبوونا خوە لێبپارێزیت و ب پراكتیك كارێن خوە یێن هەڤپەیمانیێ‌ بدەتە مەشاندن ئەوە ئەڤا ل رۆژئاڤایێ‌ كوردستانێ‌ بەردەوامی دایێ‌، بریارا ڤەكێشان هێزێن وێ‌ ئەگەر ب بیتە كریار ژی دێ‌ دەرفەتا بەرژوەندێن وێ‌ ب ئاوایەكێ‌ نیگەتیف هنگێڤیت، ئەز دوێ‌ باوەرێ‌ دامە هێزێن وێ‌ قەت ئەوێ‌ دەڤەرێ‌ چولناكەن، ئەو چ هەڤپەیمانەكێ‌ باشتر ژ دەسهەلاتا رۆژئاڤایێ‌ كوردستانێ‌ بخوە لدەڤەرێ‌ نابینن.

دەڤەرێن وەلاتێن زلهێز گومڤەكری و شەرێ‌ بەرژوەندییان لسەر دایە مەشاندن، وارگەهێن دێرینێن گەلێ‌ مەنە و ژیانا جڤاكێ‌ مە ل ئەڤێ‌ دەڤەرێ‌ یا گرێدایە، سیاسەتا ژ رێكخستنێن كوردستانی دهێتە خواستن پاراستنا بەرژوەندێن گەلێ‌ كوردستانێ‌ یە، چاوان ئەڤ هێزێن مەزن شەرێ‌ بەرژوەندێن خوە دكەن، ب هەمان شێوە هێزێن پاراستنا گەلێ‌ مەژی شەرێ‌ بەرژوەندێن خوە بكەن، پشتا خوە بگەلێ‌ خوە ڤە گرێدەت و تەكتیكێن خوە گونجادنێ‌ د چوارجوفەكێ‌ دیموكراسی دە لهەمبەری تێكرایا بویەرێن چاڤەرێكری بكاربینیت.

سەرەدەریا رژئاڤایێ‌ كوردستانێ‌ دگەل فاكتەرێن دەرەكی:

ئەڤ هەلویستێن ڤێ‌ داویێ‌ یێن ئەمریكا لهەمبەری رۆژئاڤایێ‌ كوردستانێ‌ نابیت مورالا كوردان دابەزینیت، هێزێن رۆژئاڤایێ‌ كوردستانێ‌ بەردەوام گوتیە و دبێژن ئەم ب گەلێ‌ خوە باوەرین و پشتا مە ب گەلێ‌ مە یا گەرمە، ئەڤ جورێ‌ سیاسەتێ‌ یێ‌ هەری راستە، شەرڤانێن وان ب كریار ژبوی جیهانێ‌ سەلماند، ئەو خوەدی ئیرادەك مەزنن، دڤان ماوێن دەرباسبوویی دە ئەو ژ ئالیێ‌ ئەمریكا دهاتنە پرچەكرن و وەكە دهێتە گوتن رێكەڤتنێن وان ژی د هن بیاڤان دا هەنە، بلا ئەم نەبێژن ئەڤە داویا چێروكێ‌ یە هێشت گەلەك گاڤ لپێشیا مەنە، ئیرادە و هەبوونا گەلێ‌ مە ل رۆژئاڤا یا بێ‌ ئەنجام نابیت.

هێزێن رۆژئاڤایێ‌ كوردستانی ب ئاوایەكێ‌ گەلەك باش مامەلە دگەل فاكتەرێ‌ دەرەكی كریە و دكەن، ئەو یێن شیایی تاكێن خوە ئاڤاكەن و بكەنە خوەدی ئیرادەك مەزن، لەوما ژی رحا بەرخوەدانێ‌ لجەم وان گەلەك و گەلەك یا بلندە، باوەریا وان بگەلێ‌ وان زێدە یا بهێزە، ئەو تنێ‌ فاكتەرێن دەرەكی وەكە فاكتەرەكێ‌ هاریكار دبینن چ جارەكێ‌ وەكە ئەساس مامەلە دگەلدە نەكریە، هێزێن كوردستانی ل رۆژئاڤا بخوە باوەرن، دەما بریاران ددەن پشتا وان ل گەلێ‌ وانە، ئەو ب كارتێكرنێن نیگەتیف یێن چ داخویانیێن دەرەكی تەنگێن وان سستنابن. 

ئەمریكا چ ئەلترناتیفێن دن نینە ژبلی كوردان:

تاكە جهێن ئەمریكا شیایی هەبوونا خوە لێبپارێزیت و ب پراكتیك كارێن خوە یێن هەڤپەیمانیێ‌ بدەتە مەشاندن ئەوە ئەڤا ل رۆژئاڤایێ‌ كوردستانێ‌ بەردەوامی دایێ‌، بریارا ڤەكێشان هێزێن وێ‌ ئەگەر ب بیتە كریار ژی دێ‌ دەرفەتا بەرژوەندێن وێ‌ ب ئاوایەكێ‌ نیگەتیف هنگێڤیت، ئەز دوێ‌ باوەرێ‌ دامە هێزێن وێ‌ قەت ئەوێ‌ دەڤەرێ‌ چولناكەن، ئەو چ هەڤپەیمانەكێ‌ باشتر ژ دەسهەلاتا رۆژئاڤایێ‌ كوردستانێ‌ بخوە لدەڤەرێ‌ نابینن.

دەڤەر ب گشتی یا داپوشیی بوویە ژ پیروكێن پاشڤەرۆ یێن ئایدیالزمێ‌، ئەڤ بیرۆكە ب چ رەنگان هێزێن ئەمریكی ناپەژرینن، ئەو هەر تم وەكە گەڤە وان لسەر ئایندە و پاشەرژا خوە دبینن، كوردان ل رۆژئاڤا دویر ژ ئەڤان بیروكێن پاشڤەرۆ هێژا شورەشا خوە ئاڤاكر، وان لسەر ئایدیولوژیەكا تایبەت تاكێن خوە داینە پەروەردەكرن، رحا بەرخوەدانێ‌ لجەم وان ب باشی هاتیە بنەجكرن، نها ل ئاستێن هندێ‌ دانە هێزێن دن ب باوەریبون ڤە وەكە دوست و هەڤپەیمان مامەلێ‌ دگەلدا ئەنجامدەن، دڤان چەند سالان دە وان سەرنجا ئەمریكا بۆ ئالیێ‌ خوە راكێشایە.

بێگومان بەرژوەندێن چ وەلاتەكێ‌ زلهێز ل دەڤەرێ‌ ناهێنە پاراستن ئەگەر خوەدیێ‌ دوست و هەڤپەیمانەكێ‌ خوەدی ئیرادە نەبیت د هندرێ‌ ئەوێ‌ دەڤەرێ‌ دە، بەری هێزێن رۆئاڤا ئەمریكا هن دەستەك دایە ئوپوزسیۆنا سوریێ‌ لێ‌ گەلەك باوەرا وان بوان هێزان نەهات، لداویێ‌ دگەل هێزێن رۆژئاڤا كەڤتنە تێكەلیان، سەرەرای هەبوونا گەلەك داخویێن سەیر ژ رایەدارێن ئەمریكی سەبارەت پرسێن جودا جودا، هێشت ئەمریكا نەشیایە ئەلترناتیفەكێ‌ دن ببینیت لجها هێزێن رۆژئاڤا لسەر ئاستێن دەڤەرێن كوردنشین یێن سوریێ‌. 

هندرێ‌ توركیا دناڤا دوبەركیان دە دكەلیت:

رەۆشا توركیا هن یا هاریكار نینە، ئەو ئوپەراسیونەكا بەرفرەه ل دژی هێزێن رۆژئاڤایێ‌ كوردستانێ‌ ئەنجام دەن، دەسهەلاتا ئەردوغان یا تاكە كەسی مینا دكتاتوران ستەما وێ‌ ئەندامێن سەرەكی یێن پارتیا وی ژی ب دژواری ڤەگرتینە، ئەو دناڤا ململانەكا توند یا ناڤخوەیی دایە، هشێن نەرازی هەژمارا وان زێدە یا بلندە دناڤا توركیا دە، لێ‌ دژواریا زولم زوریا وی هەر تشت یێ‌ تەپەسەر و بێدەنگكری، هەر هێرەشەكا توركیا ئەنجامدەتن لدژی رۆژئاڤایێ‌ كوردستانێ‌ دێ‌ دەسپێكەك بیت هندرێ‌ توركیا بهێتە شلقاندن و تەڤلیهەڤیەك بەرفرەه بەروكێن وێ‌ بهنگێڤیت.

رۆژ ب رۆژ ئابورێ‌ وێ‌ بەرف هەلوەریانێ‌ دچیت، پێشبینیا هندێ‌ دهێتەكرن هێشت رەۆشا وێ‌ یا ئیكونومی خراب ببیت، دەمەكە توركیا دخوازیت كێشێن خوە یێن ناڤخوەیی پیشتگوه پێخیت و خەلكێ‌ خوە ب بوویەرێن دەرڤەی سنوران مژولكەتن، ئەڤ چەندە هەر یا بەردەوام نابیت، دێ‌ گەلێ‌ وان هەلویستێن خوە یێن نوی دبەرامبەر دا هەبن، گەلێ‌ توركیا هەتا داویێ‌ یێ‌ بێدەنگ نابیت، شەر یێ‌ بەرڤ ناڤمالا توركیا دچیت، ئەز باوەرم پشتی عیراق و سوریا دورا توركیایە ..!

هێزێن رۆژئاڤا ژی خوەدی نرخاندنن:

ئەم هەموو باش دزانین، هێزێن ئەمریكی ل دەڤەرێ‌ ژ ئازادیا گەلان ناگەرن، شەرێ‌ وان ل دەڤەرێ‌ شەرێ‌ بەرژوەندیانە، هەر هەلویستەكێ‌ ئەو وەرگرن د هەر دەربارەكێ‌ دە تنێ‌ دەربرینێ‌ ژ بەرژوەندێن وان دكەت، بریارا ڤەكێشانا هێزێن وان ل هن دەڤەرێن رۆژاڤایێ‌ كوردستانێ‌ ژبوی هێزێن رۆژئاڤایێ‌ كوردستانێ‌ تشتەكێ‌ (مفاجی‌و) نینە، هێزێن رۆژئاڤا گەلەك پشتا خوە ب فاكتەرێن دەرەكی نەبەستیە، هەتا دەستكەفتێن وان ب بریارەكا بڤی شیوەی بهێنە هنگافتن و لبەرێك بچن.

بەری نها ژی رایەدارێن دەسهەلاتا رۆژئاڤایێ‌ كوردستانێ‌ دگوتن لجەم مە تشتەكێ‌ خوەیایە، كو هێزێن ئەمریكی نە ژبوی دوزا مە ل دەڤەرێنە، وان هند پشتا خوە ب هێزێن دەرەكی نە گرێدایە، ئەو پتر عەلەقەدارێن هێزا گەلێ‌ خوەنە، ئەڤەژی ب سیاسەتەكا سەركەفتیانە دهێتە حەسباندن، هێزێن رۆژئاڤا خوەدیێن ئیرادەكا مەزنن، جڤاكا نیڤدەولەتی بتایبەتی ئەمریكا ئەڤێ‌ راستیێ‌ باش دزانن.

ئوپەراسیۆنا توركیا یا پێشبینكری بوویە:

دڤان دەمێن دەرباس بوویی دە، هێزێن ئەمریكی ب شێوازەكێ‌ ژ شێوازان كوردێن رۆژئاڤا یێن پر چەكری، وان باوەری ب هێزێن رۆژئاڤا هەیە، كو ئەو لهەمبەری ئوپەراسیونێن حكومەتا توركیا بەرخوەدانەكا بێ‌ وێنە ئەنجامدەن، چونكە هێزێن وان وەكە دامەزراوە هێزەكا پروفیشیونال و خوەدی پرەنسیبێن تێكوشانێنە، توركیا ژی دوێ‌ باوەرێ‌ دایە ئوپەرایونەكا بڤی شێوەی هند كارەكێ‌ ئاسان نابیت و بێ‌ گرفت لسەر وان دەرباس نابیت.

بەرژوەندێن ئەمریكا ل دەڤەرێ‌ نەیێن دەمكینە بەلكو یێن بەردەوامن، هێێزێن ئەمریكی ممكن نینە هەبوونا خوە ل دەڤەرێ‌ بدەتە ونداكرن، هەر چەندە بریار دایە هێزێن خوە ل دەڤەرێن رۆئاڤایێ‌ كوردستانێ‌ ڤەكێشن، بەس ئەو چەند ناهێت وێ‌ واتێ‌ بەرژوەندێن وان بداویهاتبن، ژبوی وان هێزێن كوردی یێن گرنگن، ئەو ب ساناهی نكارن هەڤیەیمانەكێ‌ مینا كوردان ل دەڤەرێ‌ بخوە ببینن، ئەز باوەرم د هن بیاڤێن دن دە ئەمریكا كێلەكێن توركیا زختدەتن.

توركیا ژدەرڤەی ئەركێن ئەندامبوونا ناتویە:

رەفتارێن توركیا یێن ڤێ‌ داویێ‌ نە وەكە رەفتارێن ئەندامەكا هەڤپەیمانیا ناتوویە، نێزیكبوونا وان دگەل روسیا و بێمنەتیا وان ل هەڤپەیمانیا هێزێن ناتو، توركیا ب كریار دێ‌ راستی سزایێن مەزنبیتن، ئەمریكا ژبوی توركیا دەڤەرێ‌ چولناكەتن، بێگومان بویەرێن لپێشیامە دێ‌ هەر تشت باش هێنە زەلاكرن، ئوپەرایۆنا هەری مەزن یا حكومەتا ئەردوغانی ئەڤا دهێتە پێشبینیكرن بو سەر رۆژئاڤایێ‌ كوردستانێ‌، لگور نێرینا من دێ‌ دەستپێكەك بیت بو هەژاندنا هندرێ‌ توركیا، دەسهەلاتا ئەكەپێ‌ دێ‌ توشی گرفتێن مەزن بیت و دێ‌ باجیا هەموو زێدەگاڤیێن خوە دەتن. 

پشتی ڤان بوویەران دویر نینە پرسا دەرخستنا ئەندامبوونا توركیا ژ ناتو ببیتە ئێك ژ مژارێن رۆژاڤا سیاسی، توركیا د هەر واری دە یا بەرف گڤاشتنێن جودا جودا دهێت دویرنینە توشی شێوازەكێ‌ ئینعزالەكا نیڤدەولەتی ببیت، رۆیێ‌ راسستەقینەیێ‌ وان رۆژ ب رۆژ زێدەتر یێ‌ بو جڤاكا دەولی زەلال دبیت.

بەلانسا هێزێ‌ نە د بەرژوەندا توركیا دایە، پرانیا هێزێن مەزن یێن جیهانی و یێن ئەوروپی دلگرانن ژ سیاسەتا توركیا، هەتا لسەر ئاستێن ناڤخوەیی ژی باندورا وی یا خرابە و گەلێ‌ وان ب گومانڤە ژ رەفتارێن وان دنێرن، ئەو متمانە و باوەرا جاران توركیا دناڤا جڤاكا دەولیدا هەی نها یا ژدەست دای، ئەو رۆلێ‌ وێ‌ وەسا گرنگ ناهێتە دیتن و نرخێن وێ‌ هن نەمانە ..!

نرخاندنا رەۆشێ‌ ب كورتی: 

ب گورتی ئەمریكا ب ئاسانی دەڤەرێ‌ چولناكەت، بەرژوەندێن وێ‌ نە یێن كاتینە بەلكو یێن بەردەوامن د رۆژهەلاتا ناڤین دە، توركیا دێ‌ توشی گرفتێن مەزن بیت ئەگەر ئوپەراسیونەكا بەرفرەه یا بێسنور ل رۆژئاڤایێ‌ كوردستانێ‌ ئەنجامدەتن، هەم د هندرێ‌ توركیا دا دێ‌ گرفت بو پەیدابن هەم ژی دێ‌ ( اصگدام) ێ‌ كەتن لهەمبەری بەرژوەندێن ئەمریكا، هێزێن رۆئاڤاژی ب ئاوایەكێ‌ پرۆفیشیونال یێن ئامادەكرینە، ئیرادا وان یا بهێزە، توركیا نەشێت ب رحەتی كارەكێ‌ وەسا پێكبینیت، دێ‌ بەرسینگرتنا وان ژ ئالیێ‌ قەسەدێڤە یا دژواربیت.

لگور نرخاندنێن من پشتی ئەڤان بوویەران دێ‌ رەۆشەكا نوی هێتەپێش، هێزێن نوی یێن كو لدەڤەرێ‌ شیانە ببنە خوەدی هەبوون تنێ‌ كوردن، هەر گوهرینەكا لدەڤەرێ‌ رویدەتن بێ‌ هەبوونا كوردان یا واتەدار نابیتن، گوهرین دێ‌ دەولەتێن هەرێمی بێ‌ (اتپنا‌و) كەنە هەدەف ژبوی دیزاینا نوی یا نەخشێ‌ رۆژهەلاتا ناڤین، توركیا و ئیران بلا دلێ‌ وان خوەش نەبیت، سەرئێشیەكا مەزن لبەندا وایە..!

پشتی عیراق و سوریێ‌ دورا توركیا یە و داوی دەولەت دێ‌ ئیرانبیت ل رۆژهەلاتا ناڤین، چاوان عیراق و سوریا هاتنە شێلان و كەلهێن دكتاتورێن دوان هاتنە هەرفاندن، دێ‌ وەسا كوچكا ئەردوغان و هەڤبیرێن وی هێنە چولكرن و ژناڤبرن، د هنگاڤتنا توركیا دە كورد دێ‌ سەركێشیا گوهرینان كەن، ئەو سیاسەتا كورد ددەنە مەشاندن بناڤێ‌ (دیموكراتیا گەلان) دێ‌ یا ب باندوربیت، پرانیا گەلێن دەڤەرێ‌ دێ‌ دبن سیها ئەوێ‌ ئایدیولوژێ‌ دە رێبەراتیا پێلێن گوهرینان كەن.

 

 

  • 1