ئەمە بڵاوبكەوە
FaceBook  Twitter  

2019/10/13 سێشەممە پەرلەمانی كوردستان كۆبوونەوەیەكی ئەنجامدا سەبارەت بە لەشكر كێشیەكەی توركیای داگیركەر بۆ سەر رۆژئاوای كوردستان ، بە كاوەخۆ و پاش حەوت رۆژ دوای بە دەنگەوە هاتنی وڵاتان لە سەرانسەری دنیا و شەرمەزاركردنی ئەو داگیركاریە. لە كۆتایی دانیشتنەكە پەرلەمان ( 12 ) خاڵی راسپاردەی راگەیاند ، وا پێدەچی لە ناو پەرلەمانیش لە ترسی توركی داگیركەر لەرزیان تێكەوتبێ و هەر بۆیەش زاتی ناوهێنانیاننەكرد !!! پرسیارەكە لێرەدا سەرهەڵدەدا ؛ سەیرە بۆ نەگەڕانەوە بۆ بڕیاری پەرلەمان ژمارە ( 37 ) ی ساڵی ( 2006 ) كە داوای چوونەدەرەوەی سوپای توركدەكا و بڕیاری ( 24 ) ی ساڵی (2014 ) كە هەرێم پابەندەكا بە داننان بە خۆسەرێتی رۆژئاوا و پاڵپشتی و كۆمەكیبكا ؟؟؟ مخابن بەرامبەر بەو كۆستە نەتەوەیی و نیشتمانی چارەنووسسازەدا دەبوایە هەڵوێستتان بوێرانەو دلێرانەتر بوایە . لە بری پێداگری لە سەر داخستنی ئیبراهیم خەلیل ، راگرتنی هەناردەی نەوت ( كە ماشێنە سەربازی ولەشكر كێشی و ستراتیژیەكەی بەوە بەستراوە ) ، بایكۆتكردنی كاڵای توركی ، قەدەخەكردنی فیلمی توركی ، واڵاكردنی دەروازەی سیمالكا بۆ بریندار و پەككەوتە و ژن و منداڵ و ئاوارە ، رەوانەكردنی هێز و داو و دەرمان و هاوكاری ، هەڵگرتنی ئابلۆقەی سەر كەمپی شەهید رۆستەم جودی كە خیانەتكارانە پتر لە سێ مانگە بەردەوامە ، رەوانەكردنی شاندێك بۆ چاوەدێری و هەڵسەنگاندن و بە دواداچوون و ....... .شەرمبتانگری ، ئەوەی شیری دایكی بە حەڵاڵی خواردبێتەوە ، خاوەن شەرەف و كەرامەت و شەهامەتە ، نەتانتوانی چاو نەترسانە لە خەمی خاك و شكۆی بەرزی نیشتمان و روحی شەهیداندابن ، وەك ئەندامانی HDP ە لە ناو گورگە بۆرەكان لە پەرلەمان بە دەنگی بەرز هوتاف بۆ شكۆی نیشتمان لێدەدەن و داگیركاری ریسوا و شەرمەزار دەكەن !! عەیامێكە كوردانی رۆژئاوا ناسنامەیان لێسەنراوەتەوە ، ئەوەتا ئەمجارەیان دەیانەوێ خاكەكەشیان لێبسێننەوە ، 12 راسپاردەكەتان وەك گاڵتە جاڕیەكەی بەروار و رێكەوتی بە ( ڕێ قەڵەو یا لاواز ) ەكەتان وا پیشانبدەن لە ناو ئێش و ئازاری رۆژئاوادان و فرمێسكی تیمساحیان بۆ هەڵدەڕێژن كە داگیركەر بە نوێترین و پێشكەوتووترین چەكی قوڕس روو بە رووی رۆژئاوا بووەتەوە ؟؟ لەو پرسە چارەنووسسازەدا دەبوایە دەنگی ئێوە دەنگی هەر چوار پارچە بوایە ، بتانسەڵماندایە پرسی كورد یەك پرسە و چەند مەسەلەیەك نیە و شێلگێرانە داكۆكیتان لێبكردایە ، پێتان وتبایە : توركیا ، ئەوە خاكی كوردانە و ئەو شێرانەش داكۆكی لە خاك و نیشتمانی خۆیاندەكەن ، نەتانكرد و بوو بە مێژوو و نەوەی داهاتووش دەزانن چی دەڵێن ! ئێوەی ترسنۆك لەبەر ئەردوغانی ئاغاتان ، شێت و هار نەبی ، وەك ریفراندۆمە ئابڕوو بەرەكە ، دەروازەتان بەسەردا دابخرێت و ئابلۆقەتان بخاتە سەر . ئەوە ئەردوغانە نەخوازەلا هەر بە رۆژئاوا ناوەستێ و باشووریش مسۆگەرە تا زیاتر جینۆساید و ئەنفالیبكا . ناوەڕۆكێكی كرج و كاڵ ، هەڵوێستێكی لاواز بێ جورئەت . لەو شوێنە چەور و گەرم و گوڕە ، كۆیلە ئاسا بە ئاقڵی لێیدانیشن و هەڵنەخەڵەتێن لێدوانی دژی سوڵتانەكەتانبدەن . سەركەوتن بۆ ئیرادەی گەلی رۆژئاوایە ، ئاسۆكەی روونە .سڵاو لە شەهیدان و بەرخودان .

 

  • 1