ئەمە بڵاوبكەوە
FaceBook  Twitter  

بەشی یەكەم 

پێشگوتن:

دەمەك درێژە دەسهەلاتا هەرێما كوردستانێ‌ ب رێژەیەك هەری مەزن د دەستێن پارتی یا دیموكراتا كوردستانێ‌ دایە، وەكە هێزەكا بالا دەست جەمكێن سەرەكی یێن حوكمرانیێ‌ راكێشاینە بن باندور و كارتێكرنێن خوە، هەر تشت لگور حەز و خواستیكێن وی هەتا رادەكێ‌ زێدە مەزن هاتینە برێڤەبرن، هەر تم مینا هێزا سەرەكی دناڤا هەرێمێ‌ دە هاتییە پێناسەكرن.

نێزی سیه سالانە هەرێم دبن سیها دەسهەلاتا كوردی دە دهێتە ئیدارەكرن، سیاسەتا ئیدارەكرنێ‌ د هیچ سەردەمەكێ‌ دا نەبوویە خوەدیێ‌ شێوازەكێ‌ شارستانی و مودێرن، بەردەوام جهێ‌ رەخنەو گازندێن خەلكێ‌ بوویە، تاكێن كومەلگەهێ‌ د چ سەردەمان دە هەست ب یەكسانیا جڤاكی نەكریە، پرانییا بیاڤان ل گور میزاج و ئارەزویێن كەسوكی دویر ژ كارێن بەرنامەیی هاتنە ئورگانیزەكرن.

د ئەڤان چوارجوفێن كاركرنێ‌ دە، بێ‌ هەبوون و داینا كەدێ‌ هن كەس بووینە سەرمایەدار، كۆ ب چ رەنگان پەیوەندییا وان ب وەلاتپارێزیێ‌ و نیشتیمانپەروەریێ‌ ڤە نینە، بەلكو دەرفەتێن سیاسی یێن بو هاتیە رەخساندن، لەوما د هن دەرگەهێن جودا جودا دە پێكول هەبوونە ژبوی ڤەگوهاستنا ئەوی سەرمایە بۆ هن كەنارێن ئارام و گرەنتیكری، ژبەركو باوەریا وان بخوە هند ب ئایندە یا خورت نەبوویە، هەتا كو ژ پاراستنا سەرمایێ‌ خوە یێن پشتراستبن و رحەت لسەر بالگێن خوە رازێن.

زالبوونا ئینسیاتیفا كەسی د كومێ‌ دە:

د هەرێمێ‌ دە ل جها دامەزراوە و عەقلێ‌ كومێ‌ ببیتە پرسەكا سەردەست تاكە كەس پەیدابوون، پەیدابوونا تاكە كەسان ب پلێن جیاوازبوون، هەر ئێك ژوان د سنورێن كارێن خوە دا جیهانەكا تایبەت بوون، ب بریارێن وان یێن كەسوكی هەبوون و نەبوونا هەر تشتی دهاتە دەستنیشانكرن، ئەو بریار نە لژێر كارەكێ‌ دیراسەكری بوون بەلكو تنێ‌ دەربرین بوونە ژ میزاج و حەزەكا بەرتەسك یا ئەسیر دبن هن بەرژوەندێن تاكی یێن كرێت و بێ‌ نرخ دە.

لڤان چەند سالێن داویێ‌، ئەگەر ب هویری مرۆڤی رەۆش مێزەكربا، رەنگە زوی گەهشتبا وان ئەنجامان، كۆ د هندرێ‌ هەر تاكەكێ‌ جڤاكێ‌ دە، شانێن نەرازیبوونێ‌ هەتا رادەكێ‌ جهێن خوە ڤەوژارتینە، لێ‌ ئەو نەرازیبوون نەهاتینە رێكخستیكرن د چوارجوفێن نەرازیبوونەكا كومێ‌ دە، لەورا هند دەنگێ‌ خوە نەبوویە، ئانكو د بازنەكێ‌ تاكە كەسی دە رحا شورەشەكا نەرم یا ترسنوك و بەرژوەندپارێز هەست پێ‌ دهاتەكرن، ئەڤان ئەتموسفەرێن ب پلان چێكری، نەدهێلا ژینگەهەكا وەسا بهێتە پێش كەسێن پێشەنگ و وەلاتپارێز ژ دایكببن، كۆ ئەو ب نویبوونا خوە رێبەراتیا تەڤگەرا جەماندنا عەقلێن نەرازی بكەن و د وێ‌ رێدە دەرگەهێن پەیداكرنا گورانكاریان بكەنە پراكتیك و مەحەكا ئینانەپێشا رەۆشەكا جیاوازتر.

دناڤا هەر كومەكێ‌ دە باندورا ئینسیاتیفا كەسان هەبوویە، شیانێن كومێ‌ دهاتنە بەرزەكرن و دبوونە قوربانێن هەبوونا كەسی، پیروزكرنا كەسان د هوندرێ‌ خوە دا دیاردا ڤەشارتنا كاریگەریا كومێ‌ یە، دەما كوم دهێتە دورپێچكرن ژ ئالیێ‌ زهنیەتا كەسی ڤە، پەیدابوون و ژدایكبوونا هشێن نوی لسەر دەپێ‌ شانویێ‌ كارەكێ‌ زێدە ئاسان نابیت، چونكە ژینگەهەكا نەساخلەم پەیدادبیت و هەبوونێن پرانیێ‌ دهێنە ئیفلیجكرن.

بەردەوامیا زالبوونا ئینسیاتیفا كەسان د كومێ‌ دە بو دەمێن زێدە دویر و درێژ، د ئەنجام دا رەۆشەك پەیدادبیت، بەشەك ژ كومێ‌ دبنە پاشگۆ و رۆلێ‌ كوێلە و دویڤەلانكیێ‌ دگێرن، ژبوی بەرژوەندێن خوە یێن تایبەت دبنە ئەكتەرێن سەمایا پەسندكرنا كەسی، هەبوونا هەمی شاشیان د ئێخنە سەر ملێن كومێ‌ و ژبوی زێدە پەسنا كەسی ژی ب چ ئاوایان نابێژن بەس..!

دژواریا زالبوونا ئینسیاتیفا كەسی لسەر كومێ‌، پرۆسەیا ڤەژینا عەقلی بێ‌ مورال دكەت، ئێدی رۆژ ب رۆژ بیركرن بو گوهرین و پێشڤەچوونان لاواز دبیت، ئومێد ب ئایندە دهێتە ونداكرن، دەست و دلێن كومێ‌ ساردبن و چ گرنگیێ‌ بو هەبوونا خوە نابینن، ئەو بەشێ‌ كومێ‌ ئەڤێ‌ پاشگۆیاتی قەبولكری دخوازن نەخوشیا وان یا ڤەگربیت و هەمی ئەندامێن كومێ‌ بدەتە چەماندن، داكو جڤاك ب هەموو پێكهاتێن خوەڤە ببنە ئەكتەرێن سەماكرنا پەسنكرن و پیرۆزكرنا كەسی د هەموو پاناڤان دە.

 

  • 1