ئەمە بڵاوبكەوە
FaceBook  Twitter  

 

ئەم دێڕە لای بەشێك لە ئەڵمانەكان شانازیە و وەك ڕەمزی خۆڕاگری ئەڵمانیا چاوی لێدەكەن لای بەشێكیشیان وەك جنێو سەیری دەكەن و زۆریان پێناخۆشە وەك گەلێكی لەبرسامردوو سەیری خۆیان دەكەن ،

لەجەنگی جیهانی دووەمدا كە ئەڵمانیای نازی لە بەرامبەر سوپای سوری ڕوسیدا تێكدەشكێت شارە گەورەكانی ئەڵمانیا زۆربەیان خاپور دەبن خەڵكەكانیان جگە لە كوژراو

ئاوارەو بێماڵ و حاڵیش دەبن، 

بە هەزاران ئافرەت دەسدرێژی سێكسی دەكرێتە سەر لەلایەن سوپای ڕوسی و ئەمریكی و بەریتانی و فەرەنسیەوە ، 

هەموو كۆمپانیاكانی بەرهەمهێنان و خۆراك دادەخرێن یا لەناو دەبرێن ، قاتوقڕی و برسێتی زۆر بەخراپی بەرۆكی خەڵك دەگرێت.

ئا لەوكاتەدا گەلی ئازای ئەڵمانی بەتایبەت لادێنشینەكان كە بە بەراورد بە شارەكان كەمتر زیانیان پێگەیشتووە لە جەنگەكەدا .

لە هەموو لایەكەوە دەستدەكەن بە چاندنی پەتاتە و گەنمەشامی بە دەیان هەزار دۆنم پەتاتە دەچێنن و ملیونان كەس بەهۆی پەتاتەی لادێكانەوە لەمردن و برسێتی ڕزگاریان دەبێت هەر بۆیە تا ئێستا خواردنی پەتاتە لەناو ئەڵمانەكاندا بووە بە كلتور و لە هەموو میوانداریەكانیاندا لە هەموو بۆنەو یادەكاندا لەبازاڕ و سەرجەم چێشتخانەكان و خواردنگە خێراكاندا پەتاتە دادەنرێت و بەشێوەی جۆراوجۆر پێشكەش دەكرێت و دەخورێت . ئەڵمانەكان خواردنی پەتاتە بە خواردنی سەرەكی دادەنێن ،

هەر ئەم هۆكارە وایكردووە لای ئەڵمانەكان لادێیەكان جێگەی ڕێزبن و بەڕێزێكی گەورەوە تەماشا دەكرێن .

لەئێستادا زۆرترین خزمەتگوزاری بۆ لادێكانی ئەڵمانیا كراوە و لادێكان وەك بەشێكی گرنگی ئابوری وڵات تەماشا ئەكرێن.

لادێكانی ئەڵمانیا لە هەموو خزمەتگوزاریەكی سەردەمیانە سودمەندن وەك پۆستەو هێڵی تەلەفۆن و ئەنتەرنێت و ڕێگای تایبەت بە پاسكیل و ئۆتۆمبێل .كارەبا و خزمەتگوزاری فریاكەوتنی پۆلیس و ئاگركوژنەوە و باخچەی ساوایان و قوتابخانە و هێڵی پاس و لەهەندێكیشیاندا ئۆتێلی گەورەی تێدایە بۆ گەشتیاران یا قوتابیانی شارەكان كەبۆ سەردان و گەشتی زانستی ساڵانە دەچنە لادێكان یا میوانانی ڤیستیڤاڵی پێشبڕكێی ئەسپ سواری و زۆر بۆنەی تر كە خەڵكێكی زۆر لە لادێكان دەمێننەوە .

ئاستی ڕۆشنبیری خەڵكی شارەكانی ئەڵمانیا بەشێوەیەكە لادێی بوون نەك هەر عەیبە نیە بگرە شانازیشە وەك بەشێكی گرنگی ئابوری وڵات تەماشایان دەكەن .

هەروەها شانازیەكی دیكەی لادێیەكانی ئەڵمانیا ئەوەیە بەگوتەی خۆیان خەڵكی لادێكان لە خەڵكە باش و ڕەسەنەكانی ئەڵمان پێكهاتوون شانازی بەخۆیانەوە دەكەن.

و لەڕووی دارایشەوە حكومەت كارئاسانی زۆری بۆكردوون و زۆربەیان پارەدارن و هەموو شتێكیان هەیە .

ئەوەی باسم كرد نمونەیەك بوو لە ئیرادە و حكومەتی خاوەن بەرنامە.

وڵاتی ئەڵمان لە وڵاتێكی داگیركراو و دۆڕاو لەشەڕو ماڵكاولی خەڵكەكەی چۆن بویەوە بەو وڵاتەی كە ئێستا هەیە و یەكێكە لە وڵاتە زلهێزەكانی دنیا لەڕووی سەربازی و سیاسی و ئابوریەوە ، 

ئەمە لەخۆوە نەبووە ئەمە بە ئیرادەی بەهێزی خەڵكەكەی بەنەفەس درێژیان بە خۆشویستنی خاك و ئاو لادێكانیان.

بەسەركردە و خەڵكی داهێنەر و دڵسۆزی گەل و نیشتمانەكەیان .

لادێكان ڕۆڵێكی زۆر گرنگیان هەبوو لە كاتی قەیراندا و توانیان وزەو توانا بگێڕنەوەو شار ببوژێننەوە ، 

ئەگەر سەیرێكی كوردستان بكەین دەبنین لەكاتی ئەنفال و كیمیاباراندا لەكاتی سوتان و خاپوركردنی نزیكەی پێنج هەزار لادێی كوردستاندا لەلایەن بەعسەوە حكومەتی بەعس جگە لە خاپوركردنی لادێكانی كوردستان كلتورێكی ناشیرینی لەناو خەڵكدا بڵاو كردەوە كە لادێی بوون وەك عەیبەیەكی لێهات خەڵكی لادێكان لە ئۆردوگا زۆرەملێكاندا نیشتەجێ كران هەریەكە بە قەرەبویەك كە بە تەعویز ناودەبرا لەناو خەڵكدا حكومەتی بەعس توانی ئەو خەڵكە لە خاك و ئاو زێدی خۆی دورخاتەوە.

ئەمە بەرنامەیەكی بەعس بوو بۆ زەلیل كردن و دەستەمۆكردنی خەڵكی كوردستان ڕوخانی ئیرادەی خۆبەڕێوەبردنی خەڵكی كوردستان ئامانجەكەیشی تا ڕادەیەك چووە پێشەوە . 

بەداخەوە لەدووای نزیكەی سی ساڵی حوكمڕانی كوردی نەك حكومەت و دەسەڵات نەیانتوانی خزمەتی لادێكان بكەن و كوردستان بكەن بەخاوەنی ئابوری سەربەخۆی داهاتی كوشتوكاڵی و دامەزراندنی كارگەی بەرهەمهێنانی خۆراكی هەڵگیراو ، بگرە لەسەر كلتورە بەعسیەكە بەردەوامبوون و تا ئێستا هە بەو چاوە نزمەی بەعس تەماشای لادێ و خەڵكی لادێكان و بەرهەمەكانیان دەكرێت، تەنانەت جل وبەرگ و جامانی و مشكی پیاوانی لادێ تا ئێستا لای خەڵكی شار جێگەی نابێتەوە، ئەم كەلتورە ناشیرینەی سوك سەیركردنی خەڵكی لادێ بەداخەوە چووەتە ناو زانكۆ و پەیمانگاكانیش هەر بۆیە كاتێك قوتابیەكی لادێی بۆ تەواوكردنی خوێندن دەچێتە شار پێی شەرمە بڵێ لە لادێوە هاتووم ، ئەمە بێپلانی حكومەت و دەسەڵاتەو درێژەپێدانی كلتوری بەعس و سڕینەوەی لادێكانە .

نەبوونی بەرووبومی خۆماڵیی و بێپلانی حكومەتە كە تا ئێستادا نەتوانین شەڕی ئابوری وڵاتانی دوژمنی كوردستان بكەین . 

زۆر شەرمە بۆ حكومەت و دەسەڵاتدارانی كوردستان خاوەنی دەشتی شارەزوور و خاكە بەپیتەكەی پشدەرو بتوێن بێت و چاوەڕێی هاتنی تەماتەو شوتی ئێرانی و توركی بكات ! دەی چۆن دەبێ كوردستان خاوەنی هەزاران دۆنم زەوی دەشتی هەولێر و گەرمیان و ناوچەكانی تربێت و چاوەڕوانی ئاردو ساوەری توركی بێت ، هەر بۆیە كلتوری داگیركاری وایكردووە كە لادێمان نەبێ بۆیە پێمانوایە نەتوانین بایكۆت و شەڕی ئابوری خۆراكی و بەرهەمهێنانی ناوخۆیی لەگەڵ دوژمن بكەین دەرد و نەخۆشیەكەی ئێمە ئائەمەیە و حكومەت و دەسەڵاتە كلتورئاساكەی بەعس لەكوردستان وەك هەموو قەیران و كێشەكانی تر لێی بەرپرسیارە

  • 1