ئەمە بڵاوبكەوە
FaceBook  Twitter  

بەشی دووهەم

كونسێپتا زهنیەتا چیا:

سیاسەتا ل هەرێمێ‌ هاتیە پەیرەوكرن یا گرێدایی كونسێپتا زهنیەتا چیایە، زهنیەتا چیا دگەل تشتێ‌ نوی و سەردەمانە هەڤناگرن هەر تم د نیڤبەرا وان دە ناكوكی هەنە، هێزێن چیایی زێدە باوەریا وان ب هێزێ‌ و مێرچاكیێ‌ هەیە، ئەو شەرێ‌ دایەلوكا شارستانی و زمانێ‌ دانوستاندنێ‌ نا پەژرینن، دناڤا شورەشا چیان دە سەمبوول و پیرۆزی هەنە، كەسێن دەردور چ ب ترسێ‌ یان نەزانینێ‌ ئامادەنە خوە وەكە كوێلە بدەنە قەبولكرن و متمانەكا كورانە لسەر هن ڤالاهیان ئاڤابكەن، ئێدی ب ئەڤێ‌ سیاسەتێ‌ خواستیە تاكێن جڤاكێ‌ لسەر هەمان دیسپلین بدەنە پەروەردەكرن.

شەرەكێ‌ گران ب ئاوایەكێ‌ موبەرمەج لسەر چاوانیا ئاڤابوونا تاكی هاتیەكرن، تاكەكێ‌ خوەدی ئیرادە و خوەدی هەبوون بوویە ئارمانجا زهنیەتا عەقلێ‌ چیایی، ب دەهان لەیستوكێن جودا جودا زمانێن تاكێن هوشیار هاتینە برین و كەسایەتیا وان هاتیە كرێتكرن، داكو ئەو گورەپان زێدە گەشێ‌ نەكەتن و ب ئێك جاری بهێتە بنبركرن، هەبوونا كەسێن هۆشیار هێڤێنی پەیدابوونا جڤاكەكێ‌ هۆشیارە، هەلبەت ئەڤەهە راستییەكە ب چ رەنگان ناهێتە ئینكاركرن.

مخابن هشێن نەرازی ژی باوەریا وان دبن باندوریا شورەشا چیان دایە، لڤان داویان د گورەپانا یای دە هن هێزێن نوی پەیدابوون و هاتنە دامەزراندن، سلوگانێن ئەوان هێزێن نوی یێن ئاراستەكری بوونە ژبوی لڤاندنا ئەوان هشێن نەرازی، ئەو هێزێن نوی ب رێبەراتیا پێشەنگێن نوی نەبوونە بەلكو ب رێبەراتیا هەمان سەمبول و پیروزیێن شورەشا چیان سەرێ‌ خوە هەلدایە، ژبەركو هشێن نەرازی و ئالیگرێن شورەشا چیان دهەڤبیر بوونە ب گرنگیا پێشەنگیا عەقلیەتا هێزو مێرچاكیێ‌، ئەو شورەشێن نوی ب مرن و گوهرینا ئاراستەیا پێشەنگێن خوە یێن چیایی، راستی هەرفین و هەلوەشیانا بێ‌ مەراسیم هاتن ..!

دڤێ‌ قووناغێ‌ دە، هشێن نەرازی باوەری ب گوهرینا پێشەنگێن نوی و سەردەمانە ژدەست دایە، ئێدی ئەو دگەل ئالیگرێن شورەشا چیان بهەڤرا ئومێدێن خوە ئاڤادكەن، ژدەرڤەی سەمبولێن چیا كەسەكێ‌ دن ئەو وەكە پێشەنگ باوەریێ‌ پێنائینن، رەنگە بەشەكێ‌ ئەڤێ‌ چەندێ‌ بۆ هندێ‌ ڤەگەریت، كۆ رەۆشا ئیرۆ رەۆشەكا چێكری و دەستكردبیت، ژ دەرڤەی وێ‌ چ فاكتەرێن دن نەكارن رۆلێ‌ خوە بگێرن، ئەگەر پرسگرێكێن هەیی نەهاتنە نیڤ چارەسەركرن و كاودان هەر دناڤا كریزان دە مایە هەلاویستی، قوناغەكا نوی دێ هێتە پێش، شێوازێن وێ‌ هێشت ب تەمامی ناهێنە دیتن، رەنگە جورەكێ‌ مودێرنەتیێ‌ پێڤە خوەیا بیت، ئەگەر وەكە پێتڤی یا گەهشتی نەبیت.

پاشمایێن نیگەتیف یێن بیرۆكا ئابورێ‌ سەربەخوە:

د هن سەردەمێن كابینێن پێشان دا هەست ب ئاڤەدانی و بەرفرەهیێ‌ دهاتەكرن، هێزێن سیاسی زێدە نێزی هەڤدوبوون، رحا بهەڤرا كاركرنێ‌ دەرفەتێن وێ‌ لپێشبوون، هێزو ئالیێن بەشدار ژ ئالیێ‌ سایكولوژی ڤە یێن ئارام و تەنابوون، سیاسەتا موجامەلێ‌ د نیڤبەرا وان سیاسەتا هەری سەردەست بوویە، ئەوێ‌ سیاسەتا موجامەلێ‌ پتر دەرفەتێن جەسارەتا ئازادی یا رەخنەكرنێ‌ ئینانە پێش، ژینگەهەكا تایبەت ل هەرێمێ‌ هەست پێدهاتەكرن، گەلەك جاران بەحسا دەولەتداریێ‌ و پەسنێن بڤی ئاوای دهاتنە بنەجهكرن.

بیرۆكا ئاڤاكرنا ئابورەكێ‌ سەربەخوە، د ستراتیژیەتا كابینێن پێشان دە دهاتە دیتن، پەترول ب رێك و رەنگێن جودا جودا دهاتە فروتن، بازارێن وێ‌ هندی بێژی یێن گەرم و ب رەواجبوون، بێگومان حكومەتێ‌ تنێ‌ د زاویا ئینانەدەرڤەیا سامانێن ژێرعەرد دە بیرۆكا خوە یا ئابورێ سەربەخوە دورپێچكر، هەموو بیاڤێن دن یێن ئاڤاكرنا ئابورەكێ‌ سەربەخوە پشتگوه ئێخستبوون، گرانیا خوە تنێ‌ دابوویە سەر فروتنا پەترولێ‌، بەحسكرنا ئابورەكێ‌ سەربەخوە نە تشتەكێ‌ پلانكری بوویە، گەلەك ب سادەیی مامەلە دگەل ئەڤێ‌ دوسیێ‌ دە دهاتەكرن.

پێتڤیاتێن رۆژانە یێن ژیانێ‌ ل تێكرایا بازارێن هەرێمێ‌ دە ژ هاوردەیێن دەولەتێن دەوروبەر بوون، ئەگەر دەولەتێن داگیركەر ب تاكتیك ژی هەرەشێن گرتنا سنوران ژ هەرێمێ‌ كربانە، ئەز باوەرم گەل د هێلا سایكولوژی دە دا راستی هن گرفتێن مەزن بیت، ل بازارێن هەرێمێ‌ تشتێن هەموو وەلاتان دهاتە دیتن یێ‌ ناڤخوەیی تێنەبیت، خەلكێ‌ باورەی گەلەك ب پەسنێن حكومەتێ‌ نەدهات، هەر چەندە د دەزگەهێن راگەهاندنێ‌ دە، زور ب باشی پەسنا حكومەتێ‌ دڤی واری دە دهاتەكرن، بەس د ئەنجام دە نەشیان متمانا خەلكێ‌ بوئالیێ‌ خوە راگێشن. 

هەبوونا گوندان گەلەك یا گرنگە و ژێرخانەكا بهێزە ژبوی پەیداكرنا ئابورەكێ‌ سەربەخوە، تاكێن كومەلگەهێ‌ لجها ببنە كەسێن بەرهەمئینەر بوونە كەسێن كاركەفتی و موستەهلك، پرانیا خەلكێ‌ بەرێ‌ وان كەتە كارێن فەرمانبەریێ‌ و هەلگرتنا چەكی و كارێن پارتایەتیێ‌، ئانكو تاك فێرە هندێ‌ بو چاوان و ب چ شێوەی ببیتە خوەدی موچەیەك ژ حكومەتێ‌، ئەو ب رێكا تێكەلبوونێ‌ دگەل حزبەكێ‌ ژ حزبان ب تایبەتی ژی پارتێن سەرەكی یێن دەسهەلاتێ‌، بێكو ئەو هیچ كەدەكێ‌ ئەنجامدەتن مەهانە موچەیەكێ‌ هەری باش ژ حكومەتێ‌ وەرگریت، بەرامبەری وێ‌ رەۆش چاوان ب رێڤەبچیت ئەو لجەم وی نە بیتە پرسگرێك و چ هەلویستان لسەر پێكنەئینیت، ب ئارمانجا هندێ‌ لجها تاكەكێ‌ خوەدی ئیرادە تاكەكێ‌ بەرژوەند پەرێز بەرهەم بیت.

لداویێ‌ حكومەت نەشیا ب سەركەفتانە ببیتە خوەدیێ‌ ئابورەكێ‌ سەربەخوە، بەلكو د رێكا فروتنا پەرترولێ‌ دە، بژێوێ‌ تەخێن هەژار ژی هاتە قوتكرن و ب رێژەیەكا هەری مەزن حكومەت كەفتە بن قەرێن گران، ژ ئالیەكێ‌ دن ڤەژی (جڤاك، حزب، بەغدا) هەموویان ب گومان سەحدكرە پرسا فروتنا پەترولێ‌ و داهاتێ‌ وێ‌، ئەو دوسییە د هەر واری دە ب كارەكێ‌ گومانەوی و نەشەفاف دهاتە قەلەمدان.

 

  • 1