ئەمە بڵاوبكەوە
FaceBook  Twitter  

خەلەكا پێنجێ‌

سەختیا ئیدارەكرنێ‌ د كابینا نەهەمین دە:

دەست بكاربوونا نەهەمین كابینا حكومەتا هەرێما كوردستانێ‌، د سەردەمەكێ‌ وەسا دایە، هەرێم بگشتی دبن كریز و ئەزمێن هەمە ئالی دە دنالیت، د بیاڤێن ئابوری دە و پرسێن متمانێ‌ مورالا تاكێن جڤاكێ‌ نزمترین پلێن باوەریبوونێ‌ توماركرینە، حكومەت هەتا سەر هەستی كەفتبوویە بن باندورا جورێن قەر و دەینان ژ پاشكەفتا مووچان بگرە هەتا دگەهیتە قەرێن كومپانیان و راوەستاندنا سەدان پرۆژێن خزمەتكوزاریێ‌.

رێكێن چارەسەریا هەری دروست نەهاتنە بكارئینان ژبووی داویپێدانا گرفتێن ئەڤان پرسگرێكان ، لجها باوەرا خەلكێ‌ ڤەگەرینن و وان زێدەتر پشتراستكەن، كو كێشە دێ‌ ب تەمامی چارەسەربن، بەرژوەندێن تاكێن جڤاكێ‌ دێ‌ لبەرجاڤ هێنە وەرگرتن، هەموو بیركرنێن چارەسەریێ‌ د وان چوارجوڤان دە خرڤەكرن، كو باجێن هەری دژوار لژێر ناڤێن جودا جودا لسەر خەلكێ‌ بدەنە سەپاندن.

ئەڤێ‌ چەندێ‌ جڤاك پتر دەقساند، هەر چەندە ب ئاوایەكێ‌ بەرچاڤ نەرازیبوون گەلەك ناهێنە دیتن، لێ‌ د هندرێ‌ هەر تاكەكێ‌ دا نەرازیبوون هەنە، هەلویستێن نەرحەت خەلكێ‌ د دلێن خوەدا ئاڤاكرنە، بەردەوامیا هەمان سیاسەتێ‌ دێ‌ ڤەرێژێن خراب هەبن، بێدەنگیا خەلكێ‌ هەتا هەتا یا بدوم نابیت، گەرەكە حساب ژبوی نەرحەتی و نەرازیبوونا تەخ و توێژێن كومەلگەهێ‌ بێتەكرن.

كابینا بەرێ‌ هەر جار دگوت، ئەڤ رەۆشە یا وەختی یە و دێ‌ چارەسەربیت، ب پراكتیك وەسا دەرنەكەفت و رۆژ ب رۆژ دژوارتر لێهات، كارێن وێ‌ بداوی هاتن و كابینەكا نوی كەتە كاری، هەر ئەو رەۆش وەكە خوەما، واتە متمانە و باوەریا گەل ب حكومەتێ‌ نە د ئاستێن هەژی دایە، كابینا نوی فەرە بێ‌ داینا سوزان گاڤێن ئەرێنی پاڤێژیت و ل هەر تشتی خوە بكەتە خوەدی.

راستیەك هەیە ئەو ژی ئەوە، خەلك هەر ئالیگرێ‌ هندێ‌ یە زێدەتر بەرخوەبدەن و سەبرا خوە بیاڤەكێ‌ بەرفرەهتر بدەنێ‌، سەرەرای هەبوونا گەلەك كێموكاسیان، باوەرناكەم تاكەك هەبیت حەزا هندێ‌ لجەم پەیدا ببیت، خوازیارێ‌ هندێ‌ بیت ئەڤا نها ل هەرێمێ‌ چێبووی ژناڤبچیت، ژبەركو چ جارەكێ‌ هووسا بو كوردان ئەڤ جورە دەرفەتە چێنەبوونە ئەو بخوە خوە ئازادانە برێڤەببەن دویر ژ بریارێن داگیركەران.

سیاسەتا حزبێ‌ دهێتە پەیرەوكرن یان یا كەسی:

دەمەكێ‌ گەلەك درێژە، حكومەت ژ ئالیێ‌ پارتی ڤە ب سەرۆكاتی یا بەرێز (نێچیرڤان) دهێتە برێڤەبرن، لدەمێن هەبوونا كێموو كاسیان گەلەك جاران دهاتە گوتن، ئاستەنگ د رێكا وی دا هەنە، كەس و ئالی پرسگرێكان درێكا پێشكەتنا وی دە پێكتینن، هەر ئێك ژ ئالیێ‌ خوە بەرپێكان د دەنێ‌، كو دەرەقەتی چارەسەریا گرفتان دەرنەكەڤیت، هەر چاوابیت گەلەك تشت دڤی بیاڤی دە ل شەڤامان دهاتنە پێشیا مرۆڤی، ئەڤە ژبلی هاتنا داعش و داكەتنا نرخێن پەترولێ‌ و برینا بودجا هەرێمێ‌ ژ ئالیێ‌ حكومەتا بەغدا ڤە.

پارتی وەكە حزب سیاسەت و ستراتیجیەتا خوە یا تایبەت یا حوكمرانیێ‌ هەیە، ئەو خوەدی رێبازن كەسێن دناڤا وێ‌ دە كاردكەن ب هەموو ئاوایان پێگیرێن هەمان رێبازێنە وسەرەدەریا وان ژ دەرڤەی چوارجوفێن وێ‌ دەرناكەڤن، ئەگەر وەكە حزب سیاسەت بهێتە پەیرەوكرن، واتە چ گرفت د كەسێن راسپاردی دە نینە، هەر كێشەك هەبیت یان لاوازیەك د كاریدە بهێتە پێش، سوچا وێ‌ زێدە بو حزبێ‌ و ستراتیجیەتا وێ‌ ڤەدگەریت، نەك كەسێ‌ راسپاردی بو ئیدارەدانا كاروبارێن حكومەتێ‌.

دناڤا پارتی سیستەما بنەمالێ‌ هەیە، هەر ژ دامەزراندنێ‌ هەتا نوكە ئەو رێبەراتیا وێ‌ دكەن، بریارێن ئەوێ‌ د هەر دەربارەكێ‌ دە كەسایەتیێن دناڤا بنەمالێ‌ دە ئێكلایی دكەن، بنەمال داینەمویا پێشدابرنێ‌ یە، كەسێ‌ راسپاردی یێ سەرۆكاتی یا كابینێن پێشان كری جێگرێ‌ سەرۆكێ‌ پارتی یە، كەساتیەكێ‌ كاریگەرە د وەرگرتن و پێكئینانا بریارێن سیاسی و كارگێری دە، سەرۆكێ‌ داوی كابینا حكومەتێ‌ ژی هەر ژ بنەمالێ‌ یە و ئەندامێ‌ مەكتەبا سیاسی یە، كەسەكێ‌ كاریگەرە د وەرگرتنا بریاران دە.

مادەم هەر دو بەربژێر ژ بنەمالێ‌ نە، هەردوویان كاریگەریا خوە هەیە د وەرگرتنا بریاران دا، شاشی و كریزێن راستی هەرێمی هاتی سوچێن سیاسەت و ستراتیجیەتا پارتی بخوەیە نەك یا وان كەسێن راسپاردی، ئەگەر وەكە دهێتە گوتن ململانێ‌ و دوبەرەكیەكا خورت دناڤا بنەمالی دە هەیە، ئەو بو هەڤدو ئاستەنگان دروست دكەن، ئەڤە نێزی بیست سالانە ئەو ململانێ‌ ئەوا دهێتە بەحسكرن، هەتا ئیرۆ وەسا مەزن نەبو هەتا ل دەرڤە و شەقامان رەنگڤەدەت ب ئاوایەكێ‌ دیار و خوەیا.

ل گور نێرینا من پارتی واتە بنەمال، هێزا پارتی ژ بنەمالێ‌ سەرچاوا خوە وەردگریت، دناڤا بنەمالێ‌ دە ئایدیایێن جودا جودا هەنە، هەبوونا ئەڤان ئایدیان تشتەكێ‌ نورمالە، ئەو چەند واتەیا ململانێ‌ نادەن بەلكو تایبەتمەندی یا كەسان زێدە دئینیتە پێش، دڤێرەدا مرۆڤ دكاریت بێژیت هەر كەسەكێ‌ ژوان سیاسەتا خوەیا هەیە، د ناخێ‌ هەر ئێك ژوان دە جور و شێوازەك تایبەت هەیە یێن حوكمرانیێ‌، ل داویێ‌ دبێژم د هێلێن گشتی دە سیاسەتا حزبێ‌ دهێتە پەیرەوكرن، كەسان ستایلێن خوە یێن جیاواز هەنە یێن شێوازێن ئیدارەكرنا حكومەتێ‌.

سەرۆكێ‌ حكومەتێ‌ یێ‌ نها و یێ‌ پێشان چ گرفتێن حزبی نەبوونە، هەتا كو حزب ئاستەنگان درێكا وان بكاربینیت، ژبەركو ئەو كەسێن گوپیتكێنە یێن وەرگرتنا بریاران دناڤا حزبێ‌ دە، بەرێز نێچیرڤان د سیاسەتا خوە دا ئاراستەیێن خوە هەبوونە، ستراتیجیەتا وی یا تایبەت دهاتە هەسپێكرن، د كەسایەتیا وی دا هەبوونا موجاملێ‌ دهێتە دیتن، سیاسەتا موجاملێ‌ ڤەرێژێن خوە یێن خراب هەنە، چونكە د رێكا موجاملێ‌ دە دەرفەتێن گەندەلیێ‌ زێدە پەیدادبن.

كەسێن گوپیتكێ‌ یێن بنەمالێ‌ دەمێ‌ حوكمرانیێ‌ دكەن، دناڤا پارتی یا وی دە هێز نینە دژایەتیا وان بكەت، سەرۆكێ‌ كابینێن پێشان ژ هەموو كارێن پوزەتیف و نیگەتیف یێن حكومەتێ‌ بەرپرسیارە، شێوازێ‌ حوكمرانیێ‌ یێ‌ كو ژ ئالیێ‌ ویڤە هاتیە بكارئینان سەردەمێن وان هەموو كریزانە یێن راستی هەرێمێ‌ هاتی.

  • 1