ئەمە بڵاوبكەوە
FaceBook  Twitter  

ڕاپەڕینی شیعە لەدژی شیعە

خۆپیشاندەرانی ئەمجارەی بەغدا لاوەكان بەهەردوو ڕەگەزەوە داوای مافەكانیان دەكەن، چیتر گوێ لە بەڵێنی سەركردە سیاسییەكان ناگرن، داوا دەكەن خاك و نیشتمان سەربەرزبێت نەك ژێردەستەی وڵاتانی تر و گەندەڵكارە حزبییەكان بێت. بەفتوای ئەوان نەهاتوونە سەرشەقام و بە بەڵێن و قسەی ئەوانیش شەقام بەرنادەن. خولی دووەمی ناڕەزایەتییەكان لە 25/10وە دەستی پێكردووە و تائێستەیش بەردەوامە، دیار نییە چ ئاكام و ئەنجامێكی لێدەكەوێتەوە و بە چ ڕێگەیەكی تردا دەڕوات، ئەم گەڕەی ناڕەزایەتییەكان جیاوازە لەوەی پێشوو، هیچ حزبێكی شیعی نەیتوانیوە سەركردایەتی بكات بە موقتەدا سەدریشەوە كە پێشتر خۆی بە ڕابەر دەزانی، خۆپیشاندانی ئەمجارە، ڕاپەڕینی شیعەكانە لەدژی شیعەكانی دەسەڵات، تەنانەت سونەكانیش پشتیوانیان دەكەن، دوای ئەوەی تێگەیشتن خۆپیشاندانەکە لەدژی خۆفرۆشان و دەسەڵاتە گەندەڵەكانە. نائارامی و سەركوتكردن و بێكاری زیاتر گەردنی گەنجەكانی پارێزگاكانی گرتووەتەوە بەتایبەتی بەغدا، خەڵكی گەڕەكە هەژارنشینەكان هەڵوێستیان وەرگرت و مەردانە چوونە مەیدان و ڕاپەڕینی سەرتاسەرییان هێنایە دی، هەندێ لە لاوە دەستگێڕەكان و شۆفێری ئۆتۆمبێلە سێ تایەكان لە هەڵوێستی خراپی میری و دەسەڵاتی حزبەكان بەزاڵ هاتن و شۆڕشێكی كرێكارییان دروست کرد، بەتایبەتی ئەو كاتەی حكوومەت هەڕەشەی لێكردن شوێنی كاركردنیان لێ دەشێوێنێ و كار و كاسبی ئەوانیش ناهێڵێ، ئەو لوقمەنانەی دەستیان دەكەوێت دەیبڕێت و زیندەگییان تاڵ دەكات، ئەم بڕیارە پێش پێنج هەفتە ڕوویداوە و دەستبەجێ هەمووان پێكەوە خۆیان ڕێكخستەوە لەبەرگێكی نوێدا و ڕوویان لەناو جەرگەی پایتەخت كرد بۆ ڕووخاندن و هەرەس پێهێنانی ئەو دەسەڵاتە بێ بەزەیی و دیكتاتۆر و خۆفرۆشە، سەرەتا لەگۆڕەپانی تەحریر و چەند شوێنێكی تر دەستیان بەگردبوونەوە كرد، هەر ئەوەندەی پەیامی دلێرانەیان گەیشتە گوێی فیداكارانی پارێزگاكانی تر، فراوانی گەورەی بەخۆیەوە بینی، تا ئەوكاتەی ڕاپەڕین هیچ لایەنێك حسابی بۆ شۆفێری سێ تایەكان نەدەكرد، كەس ناوی نەدەهێنان، توێژێكی هەژارن و بۆ ژیان هەوڵ دەدەن، شەرەف و ئابڕووی تێكشكاوی عێراقییەكان دەكڕنەوە، چەندین دەرچووی زانكۆ و پەیمانگایان تێدایە، دواجار مەردانی ناو گۆڕەپانەكەبوون، دەستەی ڕۆشنبیران و مامۆستایان و توێژەكانی تریش هاتنە پێشەوە بۆ پشتیوانیكردنیان، لەسەرەتای گردبوونەوەكاندا لەلایەن حكوومەتەوە زۆر نامرۆڤانە و بێبەزەییانە سەركوت دەكران، تەنانەت چەندین هاووڵاتی بە كوتەكی دەستی پاسەوانەكان و حەشدی شیعی شەهیدكران، چەندین دەمامكداری نهێنی تەقەی كوشتنی لێدەكردن، حكوومەتی عێراق زانی هەڵە بە هەڵە چارەسەر ناكرێ و بەرگریشیان پێناكرێت و لەدۆخێكی زۆر نالەباردا دەژین، پێشناریان كرد بەخۆڕایی بەنزین بدەنە شۆفێرانی سێ تایەكان بۆ بڵاوە پێكردنیان، بەڵام قوربانیدانیان زیاتر بۆ پیرۆز بوو لەو هەڵوێستە ناشیرینەی میری، گوێیان لە كەس نەگرت و سووربون لەسەر داوای خۆپیشاندانە بەرفراوەنەكەیان و بەنداوی ئوم قەسریان داخست و خوێنی زیاتریان بەخشی، بەپێی دواین ئامارەكانی مافی مرۆڤ تا ئێستە 300 خۆپیشاندەر كوژراون و زیاتر لە 12 هەزاریش بریندارن، خۆپیشاندەران باڵەخانەیەكی چواردە نهۆمیان بۆ خۆیان داگیركرد كە ڕێستورانتێكی توركی چۆڵكراو بوو، خۆیان لەوێدا سازدەكەن و كۆدەبنەوە، بەگوتەی چالاكان كە سەرپەرشتی خۆپیشاندانەکە دەكەن، ئەگەر هێزەكانی حەشد و ئەمنییەكان ئەو باڵەخانە بگرنەوە خۆپیشاندانەكان هەرەس دێنێنن. چەندین ئافرەت لەقاتی حەوتەمدا خزمەتی خۆپیشاندەران دەكەن لە ئامادەكرنی خۆراك و برینپێچی و پاكوخاوێن كردنەوەی باڵەخانەكە، وەك خێزانێكی گەورەی شاری بەغدا دەژین، لەبەرزایی باڵەخانەكەوە پەیامێكیاندایە دەست حكوومەت، ئاگاداریان كردەوە پێویستە قەناس بەدەستەكان دووربخەنەوە لە بازاڕ و شوێنە بەرزەكان، داوای گۆڕینی كابینەی حكوومەتیان كرد و هەروەک دەست بكرێت بە بنبڕكردنی گەندەڵی و نەهێشتنی بێکاری لە وڵاتدا، دەسەڵات زۆر بەتوندی بەرەو ڕوویان بوویەوە، ڕێسای قەدەغەكردنی هاتوچۆی دەركرد، لەبەرانبەردا ڕاپەرین كڵپەی زیاتری كرد و بەهێزتر بوو، لەبەغداوە سەری هەڵگرت بۆ ناو شارەكانی تر، تا چەوسانەوە و سەركوتكردن زیادبێت كڵپەی ڕاپەڕینیش بەهێزتر دەبێت، ناڕەزایەتییەكانی عێراق لەگەڵ وڵاتەكانی تردا جیاوازی دەرخست، سەرەتا شیعە بەشیعە بوو، دواجار سونەكانیش چوونە پاڵیانەوە، جەماوەر بەگشتی دەڵێن لەدوای ڕووخاندنی حزبی بەعس ماوەی 16 ساڵە دەچەوسێینەوە، هیچ گۆڕانێك بەسەرماندا نەهاتووە بێجگە لە هەژاری و بێكارییش گەردنی گرتوون، مافی هاووڵاتی بوونیشمان نییە. خەڵک خویان بەخت کرد و چەندین شەهیدیان دا بۆ ڕووخاندنی سەدام، لەپێناو ژیانێكی نوێ و گوزەرانێكی باشتر نەك هێنانەوەی حزبەكان بۆ ئەوەی ڕۆحیان بكەن بەخۆراكی ئەژدیهاكان! بەپێچەوانەوە حزبە شیعییەكان بەتایبەتی دەستیان كرد بە دابەشكردنی داهاتی وڵات و هەریەكی بەشی خۆی دەبات، ئێمەی هاووڵاتی عێراقیش هەمیشە ئاوارە و دەربەدەر و بێ نان و ئاو و خزمەتگوزاریین و شارەكانمان كاول كراوە، بستێك خاك نییە تێیدا نیشتەجێ بین، پێویستە سەرجەم حزبەكانی وڵات شەرمەزار بكرێن لەدزین و كوشتنی عێراقییەكان و فرۆشتنی وڵاتەكەمان و تاڵانكردنی ماڵەكانمان لەلایەن حەشدەكانیانەوە، ئەركی سەرەكی خۆپیشاندەران گەڕانەوەی سەروەری وڵاتە لەگەڵ گەڕاندنەوەی شكۆ و کەرامەتی هاووڵاتییە عێراقییەكان، ئەوان زۆر نیگەرانن لەو پەیوەندییە بەهێز و گەرمەی نێوان سەركردە شیعەكان و ئێرانییەكان کە دەسەڵاتی وڵات لەدەست ئەواندایە، لەهەمان كاتدا ئەو نەوتە زۆرەی هەناردە دەكرێت و دەفرۆشرێت، خەڵكی وڵات ئاوی خواردنەوەی نییە، خوێنی گەل بە بۆڕییە نەوتەكاندا دەڕوات، دەسەڵاتدارنی بێ وەفاش هەر لەخەمی گیرفان و گەشت و دزینی وڵاتدان.

ئەم خۆپیشاندانە تەنیا لەدژی حكوومەت و پەرلەمان نییە، بەڵكو سەلماندیان لە دژی ئێرانیەكانیشە و پەلاماری كونسوڵخانەكەیان دا لەشاری كەربەلا و وێنەی ئایەتوڵا عەلی خامنەییان دڕاند و پێان گوتن ئێرە عێراقە و خاوەنی خۆی هەیە.

  • 1