ئەمە بڵاوبكەوە
FaceBook  Twitter  

1

گواستنەوەى جوگرافیاى قەیران، پەیداکردنى سەرچاوەى وزە و دۆزینەوەى بازارى تازە لە ڕێگەى شەڕ و هاوپەیمانیەتى شەڕ لە ئاستى جیهانى و هەرێمى لە چوارچێوەى سیاسەتى ئیمپریالیزم، دیاردەى تازەنین لە هەناوى سیستەمى سەرمایەداریدا . 

لەمڕۆدا دەستێوردانی سیاسی و سەربازی و ئابووری و کەلتووری و فەرهەنگی، جەنگ و سەپاندنی ئابلۆقەی ئابووری لە زۆربەی وڵاتانی دەرگیر بە جەنگ و ململانێی سیاسییدا، بۆتە دیاردەیەکى ئاسایى لە ژێر ناونیشانى پاراستنى بەرژەوەندییەکانى ئەمریکا و ئێران و هتد. 

پەرەسەندنی دیاردەی جەنگ و کاولکاری و قەیرانەکانی شەڕ لە ڕۆژهەڵاتی ناوەڕاست و دواتر دەستێوەردانی ڕاستەوخۆی زلهێزەکانی جیهان بەبیانووی پێدانی قەرز لە ڕێگای بانکی نێودەوڵەتی و سندووقی دراوی نێودەوڵەتی کە ئامانجی سەرەکی گۆڕینی پەیکەری ئابووری و گۆڕینی هاوکێشەی جوگرافیای قەیرانەکانی ناوەندە سەرماریەدارییەکانە لە ئەمریکا و ئەوروپاوە بۆ ڕۆژهەڵاتی ناوەڕاست، دابڕاو نییە لە پرۆژەى ئیمپریالیزم و نیولیبرالیزم .

2

شەڕ و پێکدادانەکانى ئەمریکا و هاوپەیمانەکانى لەگەڵ ئێران و هاوپەیمانەکانى، ئەنجامى پێکدادانى بەرژەوەندییە سیاسى و ئابوورییەکانیانە لە عێراق و ڕۆژهەڵاتى ناوەراست بە گشتى، کە وەک ئەنجامى دەستدرێژییەکانى هەردوولا دەبینرێت لە میانەى درێژەپێدانیان بە سیاسەتى دەستوەردان و تەدەخولکردن لە ناوچەکە بە گشتى، بەتایبەتیش لەو دەوڵەتانەى کە لە بنەڕەتدا کێشەى ئیشکالیەتى دەوڵەتدارى و بەڕێوەبردنیان هەیە وەک عێراق و سوریا و لوبنان و هتد ... 

ئەگەر دیقەتى تەوقیتى ڕووداوەکانیش لە ئێستادا بدەین لە ڕووى هەڵبژاردنى کاتەوە لە کوشتنى قاسمى سولەیمانى و هاوڕێکانى و هاوکات پێش ئەوانیش بەغدادى، ناتوانین دایببڕین لە دۆخى ناوەخۆى ئەمریکا و نزیکبوونەوەى هەڵبژاردنەکان، بەیاننامەکانى وەزارەتى بەرگرى ئەمریکا لە کاتى ڕووداوەکان ئاوا داڕێژراون و دەڵێت: بە سەرپەرشتى و فەرمانى ڕاستەوخۆى ترامپ کوشتنى بەغدادى و قاسمى سولەیمانى و ئەوانیتر ئەنجامدرا. هەڵبژاردنى کاتیش ئامانجدارە و بەشێکە لە کەمپینى هەڵبژاردنەوەى ترامپ لە دۆخێک کە سیاسەتى شەڕ و پۆپۆلیستى بۆتە سیماى دیارى سیاسەتى نێودەوڵەتى و ناوخۆیى کە ترامپ بۆ خۆى یەکێکە لە سەرکردەکانى ئەو جۆرە لە سیاسەتکردن .

3

ئێران لە دواى ڕووخاندنى رژێمى سەدام و شەڕى داعش هەنگاو بە هەنگاو دەستوەردانەکانى زیاتر بوو لە عێراق، لە ئاستى سیاسى لە کاتى هەڵبژاردنەکان و دواتریش دانانى سەرۆکى حکوومەت و تەنانەت کارنامەى بەڕێوەبردن و هەروەها لەرووى سەربازى و دروستبوونى دەیان گرووپ بە ناوى حەشدى شەعبى لە چوارچێوەى ئەجنداى ئێراندا بە دەرنەبوون، لە کاتى توندبوونى پەیوەندییەکانى ئەم دواییەى نێوان ئەمریکا و ئێران وەلائى ئەو هێزانە بە تەواوى بۆ مەرجەعەکەیان لە تاران یەکلایى بوویەوە. 

بوونى عێراق بە ناوەندى پێکدادانى بەرژەوەندى و دەستدرێژییەکانى ئێران و ئەمریکا لە کاتێکدایە کە لە سەرەتاى مانگى ئۆکتۆبەرى ساڵى ڕابردووەوە ڕاپەرینى جەماوەرى لە شارەکانى عێراق تا بە ئەمڕۆش دەگات سەریهەڵداوە لە دژى نادادپەروەرى و برسیکردنى خەڵک و حوکمى ئیسلامى سیاسى و هەژموونى ئێران و ئەمریکا و وڵاتانى تر کە بەداخەوە تا بە ئێستا هەزاران کەس شەهید و بریندار و بێسەروشوێن کراون بە دەستى هێزە مەزهەبى و میلیشیاکان . 

بوونى عێراق بە ناوەندى شەڕى بەرژەوەندییەکانى ئەمریکا و ئێران جگە لە زیانى ڕاستەوخۆ بۆ سەر ئاراستە و ئەنجامى ڕاپەڕینەکانى عێراق و بەرژەوەندییەکانى کرێکاران و خەڵکى بە گشتى هیچى ترى لێ سەوز نابێت، بێگومان هەمان زیانیشى بۆ خۆپیشاندانەکانى ناوخۆیى ئێرانیش هەیە، ئەگەر سەیر بکەن لە ماوەى ئەم چەند ڕۆژە سەرنجى هەموو لایەک لەسەر خۆپیشاندانەکان لە عێراق و ئێران نەماوە و خراوەتە سەر شەڕى نێوان هەردوو دەوڵەتى داگیرکەر، هەر دڵخۆشبوونێکیش بەم شەڕە جگە لە بێئاگایى سیاسى هیچى تر نییە، بە پێچەوانەوە پێویستە خەڵک بە گشتى و ڕاپەڕیوانى عێراق و ئێران و هێزە چەپەکان دروشمى (نا بۆ شەڕ و نا بۆ دەستوەردانەکانى ئێران و ئەمریکا) بکەنە یەکێک لە دروشمەکانیان لە پاڵ دروشمەکانى تر بۆ گۆڕینى سیستەمى سیاسى و ئابوورى.

 

 

  • 1