ئەمە بڵاوبكەوە
FaceBook  Twitter  

 1

لەسەرەتاى ئامادەکردنى پرۆژەکەى حکوومەت بەناوى (چاکسازی لە خانەنشینی، مووچە، دەرماڵە، بەخشین و ئیمتیازاتەکانی دیکە لە هەرێمی کوردستان- عێراق)، لەم گۆشەیەدا بە ناونیشانى، ئەمە پرۆژەى چاکسازییە؟ ئەوە خرایە ڕوو کە ناکرێت بە پرۆژەیەکى وەها بگوترێت پرۆژەى چاکسازى، چونکە پرۆسەى چاکسازى پرۆسەیەکە زۆر لەوە گەورەترە و ناشکرێت لە چوارچێوەى پرۆژەیەکدا بڵێیت ئەمە کۆتا خاڵى چاکسازییە، لە کاتێکدا چاکسازى و گۆڕانکارى پرۆسەیەکى بەردەوامە و پێداویستییەکانى ژیان بەردەوام فەرزى دەکات .

لە لایەکى تر باسى نیازى پشت ئەو هەڵمەتە کرا، ماوەیەکە دەستیان پێکردووە بە مەبەستى ڕاکێشانى سەرەنجى ڕاى گشتى بۆ لاى خۆیان لە دۆخێکدا کە ناوچەکە بە شەپۆڵێکى گەرمى ناڕەزایەتى کۆمەڵایەتى تێپەڕ دەبێت... هتد.

ئەگەر خوێندنەوە بۆ دوایین ڕەشنووی ئەو پرۆژەیەى ئامادە کراوە بکەین، بە ڕوونى ئەوە دەردەکەوێت، ناتوانێت چاکسازى ڕاستەقینە لە هیچ یەکێک لەو بوارانە بکات کە پەیوەستە بە چاکسازى بۆ هێنانەدى دادپەروەرى و کەم کردنەوەى جیاوازییەکان،  بەڵکو ئەم پرۆژەیە تەنیا کارى هەندێک دەستکارییە لە بوارى خانەنشینی و مووچە و دەرماڵە و بەخشین و هەندێک لە ئیمتیازاتەکانی، ئاماژەکان ئەوە دەردەخەن ئەو پرۆژەیە ناتوانێت ئەوەش بکات، چونکە وەک پێشتریش ئەو مەترسییە ڕاگەیەنرا،  لەو پرۆژە یاسایەدا لایەنى کەمى مووچەى خانەنشینانى تێدا نییە کە لە بەغدا بە 500 هەزار دیناری عێراقی دانراوە، بەڵام لە کوردستان ئامادەنین ئەو بڕەش دیارى بکەن لە کاتێکدا باسى ئەوە دەکرێت داهاتى تاک و ئاستى خۆشگوزەرانى لە هەرێمى کوردستان بەرزترە لە ناوەڕاست و باشوور. واتە دەبێت بە لایەنى کەم، لانى کەمى مووچەى خانەنشینى کەمتر نەبێت لە ٧٠٠ هەزار دیناری عێراقی.

 2

ئێستا هەنگاو بە هەنگاو ئیتلافى حکومڕان لە  پەرلەمان و حکوومەت لە کۆتایى پرۆژەکە نزیک دەبنەوە کە بڕیار وایە ڕۆژى یەکشەم پەرلەمان خوێندنەوەى دووەمى بۆ بکات، دواى ئەوەى وەک میدیاکان بڵاویان کردۆتەوە، ئیتلافى حکومران ڕێککەوتوون لەسەر خاڵە گشتییەکانى پرۆژەکە بە هەندێک دەستکارى ڕووکەشى، کە هیچ لە ئەسڵى مەسەلەکە ناگۆڕێت لە کەم کردنەوەى جیاوازى مووچەى پلە تایبەتەکان و مووچەى فەرمانبەرانى ئاسایى و نەدانەوەى پاشەکەوتى مووچە، ئەوەى وەک گۆڕانکارى بە خەڵکى دەفرۆشنەوە، جێگیرکردنى  ئەو بڕگەیە  کە تایبەت بە دانەوەی پاشەکەوت و کردنەوەی هەژمارێکى  تایبەتی بانکییە بۆ فەرمانبەران، ئەویش بە جۆرێک داڕێژراوە کە هیچ گەرەنتییەکی تێدانییە بۆ گەڕانەوەی مووچە پاشەکەوتکراوەکان و سپێردراوە بە داهاتوویەکى نادیار  (دەخرێتە حساب بانکی باتڵ و وەهمی بۆ داهاتوو بەپێی ڕێنمایی وەزارەتی دارایی)، بڕگەی کەمترین مووچەی خانەنشینیش بە هەمان شێوەیە و زیاد نەکراوە.

 

3

بەرزبوونەوەى ناڕەزایەتى لە ئاستى جۆراوجۆر کە خەریکە جۆرێک لە ڕاى گشتى دژ بەو پرۆژەیە دروست بکات، ئەنجامى درککردنى خەڵکە بە ناوەڕۆکى پرۆژەکە، ناڕەزایەتییەکان سەرەتا لە تۆڕە کۆمەڵایەتییەکان و دواتر بۆ میدیا و پانتایەکى فراوانى ناوەندە کۆمەڵایەتییەکان سەرى هەڵدا، باسى ناڕەزایەتى پەرلەمانتاران ناکەم کە بەشێکى زۆریان بنەماى ناڕەزایەتییەکانیان پەیوەندى بە بەرژەوەندى تایبەتى خۆیان و چۆنیەتى و بڕى خانەنشینییەکەیانە.

درێژەکێشانى ناڕەزایەتی و فشارەکان بێگومان ئەنجامى کاریگەرى دەبێت بۆ هێنانەدى گۆڕانکارى ڕاستەقینە و چاکسازى بە ئاراستەى کەم کردنەوەى جیاوازییەکان و هێنانەدى ئاستێک لە دادپەروەرى، کەڵەکەبوونى ١٠ ساڵى زیاترى فشارەکانى (هەڵمەتى دادپەروەرى)  بێ کاریگەرى نەبووە، کە سەرەنجام دەکرێت ئەو ناڕەزایەتییانە ببێتە سەرەتایەک بۆ لائیحەیەکى ڕوونى  سیاسى و ئابوورى، وەک ئەلتەرناتیڤێک لە بەرانبەر  پرۆژە بەناو چاکسازییەکانى ئیتلافى حکومڕان، کە کۆى گشتى پرۆژەکانیان لە چوارچێوەى ئایدیاى نیولیبرالیزم و ئابوورى بەرخۆرى بۆ  کۆمەڵگایەکى پاسیڤ و بێ ئیرادە شتێکى ترى تێدا نابینى. 

لە درێژەى ناڕەزایەتییەکان هاووڵاتیان و مووچەخۆران هاشتاگێکیان لە تۆڕە کۆمەڵایەتییەکان و بەتایبەت لە فەیسبووک ڕاگەیاندووە لەژێر ناوی (نا_بۆ_خانەنشینی_وەزیر_و_پەڕلەمانتاران) ئەوەش وەک کاردانەوەیەک بەرانبەر ئەو بڕە مووچە زۆرەی بەدەر لە تەمەن و خزمەتی فعلی بۆ خانەنشینی پەرلەمانتاران دیاری کراوە، هاوکات چەندین کەمپین و ناڕەزایەتى بە شێوازى هەمەلایەن دەستى پێکردووە، هاشتاگى (نا_بۆ_خانەنشینی_وەزیر_و_پەڕلەمانتاران) و ناڕەزایەتییەکانى تر تەنیا نەخێرێک نییە دژ بە مووچەى زۆرى (پەرلەمانتاران و وەزیر و پلە تایبەتەکان)  بەڵکو نایەکە دژ بە  کۆى سیستەمى سیاسى و ئابوورى هەرێم، سیستەمێک کە ڕۆژانە مافە ئابوورى و کۆمەڵایەتی و سیاسییەکانى هاووڵاتییان زیاتر پێشێل دەکات .

  • 1