ئەمە بڵاوبكەوە
FaceBook  Twitter  

هیوا عومەر/ نەوت و ستەمکارى

مامەڵەکردن لەگەڵ  ڤایرۆسى کۆرۆنا، تەنیا بابەتێک نییە، پەیوەندیدار بێت بە زانستى پزیشکى و تاقیگە پزیشییەکان، ئەگەر پرسەکە لە ئاستى توێژینەوەى  زانستى پزیشکى لەسەر ڤایرۆسەکە، چۆنیەتى دروستبوون و ژینگەى  گەشەکردن و چۆنیەتى خۆپارێزى،  وەلابنێین، بۆ توێژەرانى ئەم بوارە، ئەوە بە دیوە سیاسى و ئابوورى و کۆمەڵایەتییەکەى، خوێندنەوە و توێژینەوەى زۆر هەڵدەگرێت .

تا دێت چڕتر مۆدێلى سیستەمى سەرمایەدارى تازە، هەنگاو بە هەنگاو بەسەر کۆمەڵگاى مرۆڤایەتى بەگشتى و ڕۆژهەڵاتى ناوەڕاست بە تایبەتى فەرز دەکرێت. بەتایبەتیکردنى کەرتى تەندورستى و نەهێشتنى وەک موڵکى گشتى و  هەراجکردن و فرۆشتنى بە مافیاکانى بزنس لە چوارچێوەى سیاسەتى بەتایبەتیکردن و بە تاکیکردنى هەموو شتێک، بەشێکى  سەرەکى پاکێجە فراوانەکەیە، لە چوارچێوەى ڕەچەتەى نیولیبرالیزمدا .

لە سایەى ئەم سیستەمەدا هەموو شتێک لە چوارچێوەى قازانج و کۆکردنەوەى پارە بۆ کەمینەیەک دیزاین دەکرێت، لە وەها دۆخێکدا نەخۆشکەوتنى زیاترى مرۆڤ یەکسان دەبێت بە قازانجى زیاترى ئەوان، بۆیە سیاساتى تەندروستى لەمڕۆدا بۆ نەخۆشە نەک بۆ مرۆڤێکى ساغ، واتە مامەڵەکردن لەگەڵ ئەنجام نەک هۆکارەکەى.

لە ئاستى جیهان و ناوەخۆدا بەرزبوونەوەى ڕێژەى نەخۆشییە جەستەیى و دەروونى و درێژخایەنەکان، سەرەنجام دابەزینى ئاستى ناوەندى تەمەن هتد...  دابڕاو نییە لە لێکەوتەى ئەم سیستەمە. لە کاتێکدا ڕۆژ لە دواى ڕۆژ حکوومەتەکان واز لە ئەرک و بەرپرسیاریەتییە جڤاتییەکانیان دەهێنن و پاشگەزدەبنەوە لە بیمە تەندروستى و کۆمەڵایەتییەکان لە ژێر ڕۆشنایى ڕەچەتەکانى سیستەمدا. هەر ئەم بەهاى قازانجپەرستییە لە بڕى ڕووبەڕووبوونەوە، کار بۆ بەکارهێنان و ئیستغلالکردنى دەکات بۆ بەرژەوەندى کۆمپانیا و شەڕى زلهێزەکانى جیهان لە ئاستى سیاسەتى نێودەوڵەتیدا، ئەمەش هۆکارى گەورەکردنیەتى .  

لە ئاستى ناوەخۆی هەرێمى کوردستان تا نووسینى ئەم وتارە دەزگا فەرمییەکان هیچ حالەتێکیان ڕانەگەیاندووە، بەڵام پرسیارێک ڕووبەڕوومان دەبێتەوە، ڕەنگە زۆربەشمان لە خۆشمان کردبێت، لە حالەتى بڵاوبوونەوەى لە هەرێمى کوردستان سیستەمى تەندروستى ئێمە تا چەند بەرگەى ڕووبەڕووبوونەوەى پەتایەکى وەها دەگرێت؟ لە کاتێکدا ماوەى چەند ساڵێکە کەوتوونەتە هەراجکردن و فرۆشتنى کەرتى تەندروستى گشتى، بۆ کەرتى تایبەت.

- لە چوارچێوەى سیاسەتى نیولیبرالیزم شتێکمان ماوە بەناوى سیاساتى تەندروستى نیشتمانى و پاراستنى تەندروستیمان؟

-     ئەمڕۆ سیاساتى تەندروستیش نەدراوەتە دەست بزنسوانان و کۆمپانیا حزبییەکان؟

-     نەبوونى بیمەى تەندروستى و تەرخانکردنى تەنیا لە %5ی بودجەى هەرێم بۆ کەرتى تەندروستى دەتوانێت چى پێ بکرێت؟

-     ئەى کەرتى تایبەت چ ڕۆڵێکى هەیە، تەنیا وەک بازرگانێک دەرفەتەکە دەقۆزێتەوە وەک لە ئێستاوە دەستیان پێکردووە، ماسکێک واتە دەمامک بە بڕى 15 هەزار دینارى بە خەڵکى دەفرۆشنەوە، کە خۆى هەزار دینارى تێناچێت؟

-     ڕۆڵى میدیا چییە؟ ئەوەیە  کە ئێستا دەیبنین! لە برى بەرزکردنەوەى گیانى بەرگری، دەبێتە ماشێنى بڵاوکردنەوەى ترس و تۆقاندن و بەشێک لە هێرشى پەتاکە .

-     ئیستغلالکردنى ئەم پەتایە لە لایەن کۆنەپارێزەکان و بەشێک لە پیاوانى ئاینى لە بڵاوکردنەوەى جەهل و نەزانین و هێرشەکانیان بۆ سەر عەقڵ چى بەرهەم دەهێنێت؟ ئەى ئێستا چى دەڵێن، ئەوە وڵاتانى ئیسلامیشى گرتەوە.

بینینى دیالیکتیکى نەک میکانیکى هاوکێشەکە، لە چوارچێوەى هەلومەرجى ئەمڕۆمان، گرنگە، جگە لە گەڕانەوەش بۆ زانست و هێز و ئیرادەى خۆمان، شتێکى تر، نامانپارێزێت. بەهێزکردنى ڕۆحى بەرگرى، ڕووبەڕووبوونەوەى  ئەو ماشێنە لە جەهل و نەزانین، لە میدیا و سۆشیال میدیا و ناوەندە کۆنەپارێزەکان، دەبێت ئەولەویەت بێت بۆ بینینى کێشەکە لە قەبارەى خۆیدا .

  • 1