ئەمە بڵاوبكەوە
FaceBook  Twitter  

پۆستی پارێزگاری كەركوك كە لە ئێستادا لە لایەنی عەرەبێكی وەكو ڕاكان جبورییەوە بەڕێوەدەبرێت بەپێی یاساو دەستور مافی كوردەو دەبێت لە لایەن كوردەوە بەڕێووەببرێت ، بەڵام بە هۆی ململانییە بەردەوامەكانی نێوان یەكێتی وپارتی لە سەر دەست نیشان كردنی كەسێك بۆ ئەو پۆستە كە تاكو ئێستاكە نەتوانراوە ئەو كەسە دیاری بكرێت ،پۆستەكە بە دەست عەرەبەوە ماوەتەوەو پارێزگارە بە وەكالەتەكەی ئێستاش هەلەكەی قۆستۆتەوەو بۆ مەرامی سیاسی بەكاری دەهێنێت وبە ئارەزوی خۆی بڕیاردەدات كەئەو بڕیارانە نەك لە بەرژەوەندی كورددا نییە بگرە دژیشێتی ولە سایەی ئەو دەسەڵاتەی كە لە ئێستادا لە كەركوك سەپێنراوە دەبینین دۆخی شارەكە بەجی قۆناغێكی هەستیاری نامۆدا دەڕوات .

سوڕبونی یەكێتی وپارتی لە سەر ڕێكنەكەوتن ویەكلا كلادنەوەی ئەو پۆستە هەنگاوێكە ڕەنگە ئەو دوو لایەنە وایبۆ بچن لە بەرژەوەندی حێزبی خۆیاندا بێت بەڵام ئەوە لە بەرژەوەندی كورد، بە تایبەت كوردانی كەركوكدا نییە وتاكو ئەو پۆستەش یەكلا نەكرێتەوە ونەكەوێتەوە دەستی كورد بارودۆخەكە بۆ كورد وەكو خۆی دەمێنێتەوەو بگرە خراپتریشی لێدێت و وەكو ماددەی 140ی لێدێت كە هەلێكی زێڕین بۆ كورد بۆ ئەوەی ئەوەی لێی زەوت كرا لە سەردەمی ڕژێمی بەعس بە پێی ئەو ماددەیە بۆخوچی بیگەڕێنێتەوە كەچی چاوەڕاوانی حكومەتی عێراق بون بۆیان چارەسەر بكات . ئەویش كورد وتەنی (مرانی).

ئەگەر یەكێتی وپارتی بەجدی بە دوای كەسێكدا دەگەڕێن بۆ دانانی وەكو پارێزگارێك بۆ كەركوك و وەرگرتنەوەی ئەو پۆستە لە ڕاكان جبوری ، كەسێك بێت ئەكتیڤ وكارامەبێت وهەم تواناو شارەزاییەكی باشی هەبێت لە ڕووی سیاسەتەوە، بە تایبەت سیاسەتی ناوچەكە ئەوا كەسێكی بە ئەزمون هەیە وچەندین ساڵە لە ناو قوڵایی ئازارومەینەتەكانی شارەكەدا لە گەڵ خەڵكەكەی دەژێت ولە دوای 16ی ئوكتۆبەری ساڵی 2017 كەركوكی بەجی نەهێڵاوە ئەویش مامۆستا حەسن ئەمین شیخانییە كەو لە دەرەوناوەوەی شارەكەش ناسراوەو خاوەن پێگەیەكی كۆمەڵایەتی جەماوەرییە وچەندین ساڵە لە كەركوك لە بوارەكانی ڕاگەیاندن وسیاسەتی ومامۆستایی زانكودا شوێن پەنجەی دیارە .. با یەكێتی وپارتی ئەمجارە ئەم پیاوە بەڕێزە تاقی بكەنەوە بزانین چۆن دەبێت .. هەرچەندی خراپیش بیت لەم پارێزگارەكەی بە وەكالەتەكەی ئێستای كەركوك نەك بەتەنها بۆ كورد بگرە بۆ عەرەب وتەركمانەش وئایین ونەتەوەكانی دیكەش باشترە.

لە ئێستادا ئەگەرێك هەیە بۆ گوڕێنی ژمارەیەك پارێزگا لە لایەن سەرۆك وەزیرانی نوێی عێراقەوە كە یەكێك لەو پارێزگایانە راكان جبورییە ، بۆ ئەو مەبەستەش تۆپەكە سەر لە نوێ‌ گەڕاوەتەوە نێو گۆڕەپانی سیاسی كورد ، جا ئەگەر كورد ، بە تایبەت یەكێتی وپارتی بە جوانی پاریی پێ بكەن ئەوا دەتوان نەك گۆڵێك بگرە ژمارەیەك كوڵ بكەن وگەمە سیاسیەكە لە كەركوك بۆ خۆیان ببنەوە . بەڵام ئەگەر بە جوانی پاریی نەكەن و وەكو جاران ئەو بڵًێت با من گوڵ بكەم وئەمیش بڵێت نانا بە من گوڵ بكەم ئەوا كەسیان ناتوانن گوڵ بكەن ویارییەكە ببنەوەو لە یارییە سیاسیەكەی كەركوكیش دەەر دەخرێنەوە.

  • 1