ئەمە بڵاوبكەوە
FaceBook  Twitter  

خەلەكا سیێ‌ و داویێ‌

بەرهەڤی و خوە تەڤگەركرنا پێشوەخت یا كوردان: 

هەر ل دەستپێكا گوهرینان ل سوریێ‌، كورد وەكە ئالیەكێ‌ رێكخستی د هەموو بیاڤێن (سیاسی، لەشكەری، كارگێری) دە یێن بەرهەڤ و ئامادەبوون، هەر زوی شیان ئەو بوشایێ‌ ل دەڤەرێن وان هاتیە پێش ب ئاوایەكێ‌ گەلەك باش پڕكەن، ئەڤێ‌ چەندێ‌ توركیا گەلەك نەرحەتكر، حكومەتا توركیا ب رێكێن جودا جودا كەفتە بەر داڕشتنا پلانان لدژی هێزێن كوردی ل دەڤەرێ‌، دژایەتیا توركیا یا بێ‌ سنور بوویە لهەمبەری پێشكەفتنێن هێزێن كوردان، هەموو كەسێن لوان دەڤەران ژوانە خەلكێ‌ سڤیل واتە (پیڕەك، زارۆ، كەسێن ئەختیار) دبوونە ئاڕمانجا هێرەشێن وان، تشتێ‌ ژ دەستێن وان دهات لهەمبەری كوردا و پێكهاتێن دن مینا (كلدان، ئاشوری، ئەرمەن، سوریانی، عەرەب) یێن كو ل دەڤەرێ‌ ئاكنجی كەمترخەمی نەكر.

هێزێن كوردان گەلەك ب زانیبوون سەرەدەری دگەل رەۆشێ‌ دكر، هەموو دەمان دەرگەهێن وان یێن دانوستاندنان دگەل ئالیێن پەیوەندیدار یێن ڤەكری بوونە، كرێتیا بویەرێن ل دەڤەرێ‌ دهاتیە پێش ئەو چ جاران نە دئازڕاندن، كو وەكە دینو هاران ڕەفتاران بكەن و كریارێن وەسا ئەنجام دەن ببنە جهێ‌ نەرازیبوونا هێزێن دەرەكی، سەرەدەریا وان گەلەك ب زانیبوون و لۆجیكانە هاتبوویە ئۆرگانیزەكرن، بەردەوامی یا ئەڤێ‌ سیاسەتێ‌ ئەو شیان هەست و سوزێن جڤاكا نیڤ دەولەتی بو ئالیێ‌ خوە ڕاكێشن، هەتا ڕادەكێ‌ باش ژی ببنە جهێ‌ متمانە و باوەریا وان، ئەڤ گاڤێن كوردان سەروسیمایەكێ‌ پۆزەتیف و روویەكێ‌ شارستانی ژبوی تەڤایا جیهانێ‌ دایە وێنەكرن، ئێدی د وارێن دبلوماسی دە كوردان ل رۆژئاڤا پێشڤەچوونێن ب باندۆر پێكئینان.

سەرهەلدانا داعش وەكە هێزەكا ڕەش و پاشڤەرۆ:

د سەردەمەكێ‌ دە هێزا داعش ب ئامادەكاریێن هەری خورت دەركەت و ل سوریێ‌ و عیراقێ‌ شەرەكێ‌ وێرانكەر دایە مەشاندن، داعش ژی وەكە سازیەكا نیڤ نەتەوی هاتە بناڤكرن، ب ئاوایەكێ‌ گەلەك باش و ب پڕ جەكی ڤە هاتە مەیدانێ‌ و دەڤەر ئێخستنە ناڤا حەرەكەتەكا دژوار، شەرەكێ‌ ب ترس دایە دەستپێكرن، دگەل ئەوی شەرێ‌ وان راگەهاندنێ‌ ژی چ بزانیبوون یان نەزانیبوون خزمەتەك مەزن پێشكێشی وان كر، هەر جهێ‌ دكەتە بن كونترولا وان قیز و ژنێن وان ژخوەرا دبرن و بازرگانی بوان ڕە دكر، كریارێن سەربرینێ‌ كربوونە پیشەیا خوە یا سەرەكی، دناڤ تەخ و توێژێن جڤاكێ‌ دە ترسەكا مەزن پەیداكر بوو، ل جها بەرگریێ‌ خەلكی تنێ‌ بیر د ڕەڤ و بەردانا جهێن باڤ و كالێن خوە دا دكر.

گەلەك دەڤەر ژبەر دژواریا هۆڤایەتیا وان هاتنە چولكرن و بەردان، میناكا هەری بەرچاڤ ژی شەنگال و پڕانیا دەڤەرێن ئێزدیان، هەژمارەكا بێ‌ سنور یا هەڤوەلاتیێن ئێزدی كەفتنە دەستێن وان ب بێوژدانانە مامەلە دگەلدا هاتەكرن، پیرو كالێن وان سەربرین و بازرگانی ب قیزێن وان كرن، هەتا ئیرۆ ژی هەژمارەكا زور یا ئێزدیان چارەنڤیسێ‌ وان یێ‌ وندایە و دەڤەرێن وان یێن چولن و پڕانیا خەلكێ‌ وان دبن رەۆشا كوچبەڕی و ئاواریەیێ‌ دا دژیت، دەڤەرێن وان ب هەموو رەنگان دبن رەۆشا بێ‌ خزمەتگوزاریێ‌ دانە، ئیش و ئارازێن وان گەلەك یێن مەزن و برینێن وان نەهاتنە چارەسەركرن.

بەرخوەدانا كوردێن رۆژئاڤا لهەمبەری هێزا داعش:

د دەمەكێ‌ گەلەك كێم دە، هێزێن دەولەتا ئیسلامی شیان دەڤەرێن هەری ستراتیژی ل عیراقێ‌ كونترولكەن، دووهەمین باژێرێ‌ هەری مەزن و پرانی یا دەڤەرێن ئێزدیان ب ساناهی و بێ‌ بەرخوەدان هاتنە چولكرن و بەردان، گەلەك زیانێن گیانی و مادی گەهاندنە خەلكێ‌ دەڤەرێ‌ ب تایبەتی ژی گەلێ‌ مەیێ‌ ئێزدی، هەتا نها ژی برینێن ئەوێ‌ چەندێ‌ نەهاتنە تەداویكرن، سەركەفتنا داعشا لڤان دەڤەران مورالەكا زێدە لجەم وان پەیدا كر و ترسەكا بێ‌ سنور ژی خستە ناڤا دلێن تێكڕایا تەخ و توێژێن خەلكێن دەڤەرێ‌، پشتی ئەڤێ‌ سەركەڤتنێ‌ داعش هاربوون و بەرێ‌ خوە دایە رۆژئاڤایێ‌ كوردستانێ‌.

بەری ئەڤان هێڕەشان هێزێن رۆژئاڤایێ‌ كوردستانێ‌ سیستەما رێڤەبەریا خوەسەر دامەزراند و كانتونێن خوە ب ئاوایەكێ‌ فەرمی راگەهاندن، ئێدی هێزێن رەشێن داعشان بەرێ‌ هێرەشێن خوە دایە رۆژئاڤا و د سەری دا كانتونا كوبانێ‌ كرە ئارمانج، شەرێن گەلەكێن مەزن ل وێ‌ دەڤەرێ‌ هاتنە رویدان، ب ئیرادە و بەرخوەدانەكا زێدە خورت و كێم وێنە بەڕەڤانی ل كانتونا كوبانێ‌ هاتەكرن، لداویێ‌ ژی هێزێن پاشڤەرۆ یێن داعشان شكەستن خوار و كوبانێ‌ ب سەربلندی خوە پاڕاست و هەبوونا خوە دایە د هەموو بیاڤەكێ‌ دە دایە قەبولكرن، ئەڤێ‌ ئیرادە و بەرخوەدانێ‌ گەلەك سەرنجا جیهانێ‌ بو ئالیێ‌ خوە راكێشا، د ناڤەرۆك داژی ئەڤە ژبوی كوردان دەستكەفتەكێ‌ مەزنبوون د ملێن دانەناسینا كوردێن رۆژئاڤا دناڤ كومەلگەها نیڤ دەولەتی دە.

ب هەموو واتەیەكێ‌ كوردان ل رۆئاڤایێ‌ كوردستانێ‌ هێزا داعشان شكاند، ئەو هێزا دڕوندە یا پڕچەك و تەقەمنی، كو گەلەك ب مورالەكا مەزنڤە شەیدایێن سازدانا شەرەكێ‌ دژواڕبوون، ئارمانجێن وان كاڤلكرنا كوردستانا رۆژئاڤا بوون، دخواست دەستكەفتێن كوردان ل ئەوێ‌ پارچێ‌ تێكبدەن و نەهێن، لێ‌ بەرخوەدانا شەڕڤانان ئەو هەر زوی دەقساندن و دفنا وان ل عەردێ‌ دا و سحرێن هوڤایەتیا وان بەتالكرن و گوڕەپان یێ‌ دایە چولكرن.

شەرێ‌ لسەر كوردێن رۆژئاڤا دهاتە بڕێڤەبرن تنێ‌ ژ ئالیێ‌ هێزێن داعشان ڤە نەبوون، بەلكو شەڕ دژی كوردان دگەلەك ئالیان دە دهاتە ئۆرگانیزەكرن، لەشكەرێ‌ تورك ژ ئالیەكێ‌ و لەشكەرێ‌ رژێما سوریێ‌ بخوە ژی ژ ئالیەكێ‌ دن ، سەرەڕای ئەڤا هەژی هێزێن ڤەشارتی ژی خوەدی رۆلبوون د پاناڤێن دژایەتكرنا هێزێن رۆژئاڤا دە، لداویێ‌ هەموو ئەو هێزێن عەلەقەدار شكەستن و كوردان ب ئیرادا شەرڤانێن خوە هەبوونا خوە لسەر عەردێ‌ دایە سەپاندن، نوكە ژی هێزەكا بەرچاڤن و دگەل جڤاكا نیڤ نەتەوی د ئاستێن هەری بلندە خەباتێن خوە یێن دبلوماسی ددەنە مەشاندن.

لەیستۆكێن توركیا دگەل روسیا و ئەمریكا:

ململانێن نیڤ نەتەوی ل سوریا قووناغێن جودا جودا دەرباسكرن، هەر جار ب ئاوایەكێ‌ بوویەر دهاتنە پێكئینان، كەس نەدكاری ب زەلالی رەۆشێ‌ ئەنالیزەكەت، ل رۆژئاڤایێ‌ كوردستانێ‌ هێرەشێن توركیا زێدە خورتبوون، بارەگایێن هێزێن روسی هاتنە چولكرن، هێزێن ئەمریكی هاتنە ڤەكێشان ل دەڤەرێ‌، ئەڤە نیشانێن دایین و ئوكەیا گلوپا كەسك بوون ژ هێزێن توركیا و چەتێن وان ڕە، لەورا ژی توركیا ب تەكنەلۆژیا خوەیا لەشكەری یا پێشكەفتی تشتێ‌ ژ دەستێن وێهاتی ئەنجام دا، بەرخوەدانا هێزێن كوردی ل دەڤەرێ‌ كارتێكرنا خوە ب ئاوایەكێ‌ وەسا نیشاندان هەستێن هاوەلاتیێن وەلاتێن زلهێز بو ئالیێ‌ خوە راكێشان، بیاڤێن دبلوماسی یێن رۆژئاڤا پتڕ پێشداچوون، رەۆشەكا نوی ل دەڤەرێ‌ پەیدابوو نها دەڤەر د قووناغەكا دن دە دەرباس دبیت. 

تەڤگەڕا گەلێ‌ كورد ل رۆژئاڤا وەكە ئالیەكێ‌ سەربەخوە سەرەدەریێ‌ دگەل ململانێن نیڤ نەتەوەی دكەن ل دەڤەرێ‌، لجەم كوردان سەڕخستنا دۆزا رەوایا گەلێن كوردستانێ‌ سەڕپشكا هەر تشتەكێ‌ یە، هەر ئالیەكێ‌ دەستەكێ‌ بدەتە ئەڤێ‌ خواستیكێ‌ تەڤگەرا كورد رەدناكەت و بێ‌ دوودلی دێ‌ خوە نێزیكی ئەوێ‌ چەندێ‌ كەن، لهەمان دەم داژی ئەو خوە نادەنە ئالیێ‌ چ جەمسەرەكێ‌ نیڤ نەتەوی دژی جەمسەرێ‌ بەرامبەر، ژبووی وان تنێ‌ پشتەڤانیا گەل گەلەك یا گرنگە، د نڕخاندنێن وان دە بەردەوامیا پشتەڤانیا گەل تێرا هندێ‌ هەیە ئەو د سایا وێ‌ دە زالببنە سەر هەموو ئاستەنگ و نەخوشییان، ئەو ب ئەڤێ‌ سیاسەتێ‌ شیان چاڤێن خەلكێ‌ پێخنە سەر باندۆریا كاریگەر یا هێزێن وان ل دەڤەرێ‌.

رێڤەبەریا خوەسەر ئالیەكێ‌ دانوستاندنایە:

دەڤەرێن كوردان هەتا رادەكێ‌ جورەكێ‌ رحەتی و ئیستیقرارێ‌ بخوەڤە گرتیە، ئەو نها ئامادەی دانوستاندنێ‌ نە دگەل هەر ئالیەكێ‌، هەم دگەل سوریێ‌ ب هن شێوازان دانوستاندنان بەردەوامی هەیە، هەم ژی د هێلا ناڤخوەیی و هوندر دە گاڤێن باش دهێنە هاڤێتن، قووناغەكا نوی لپێشە، هێزێن ئەمریكی ل دەڤەرێ‌ بنەجه بوونە ب تایبەتی ژی ل وان دەڤەرێن دبن كونترولا كوردان دە، هێزێن توركیا دگەل روسیا لجها لهەڤهاتنێ‌ راستی شەرو دوربێن لەشكەری دبن، دڤان دەمێن چوویی دە هێزێن توركیا بوونە ئارمانجا بالەفرێن روسی و ب سەدان سەربازێن وان هاتنە كوشتن و برینداركرن.

كورد هەتا رادەكێ‌ تەماشەڤانن و ژ نێزڤە رەۆشێ‌ د شۆپینن، هێزێن فەرمی یێن كوردان د نەخشێ‌ خوەیێ‌ نوی دە، ب ئاوایەكێ‌ ڤەكری بانگا بەڕهەڤیا دانوستاندنان دكەن و چەختیێ‌ دكەنە سەر زمانێن دایەلوك و دانوستاندنان، گەلەك هەلكەفتان جەنەرال (مەزلۆم كوبانی) چەختی لسەر گرنگیا لهەڤ نێزیكبوونێ‌ كریە د هەر دوو ئاستێن ناڤخوەیی و هەرێمی دە، ئەڤە ژی ب وێ‌ رامانێ‌، كو د ستراتیژیەتا كوردان دە پڕسا دانوستاندنان پڕسەكا گرنگە، د هەموو وارەكێ‌ دە ئەوێ‌ هەول بدەن زمانێ‌ دایەلۆك و دانوستاندنان پێشدا ببەن، بنگەها داخوازێن كوردان بو دانوستاندنان سەرچاوەیا وێ‌ نە ژ لاوازیێ‌ یە بەلكو ژ گرانیا هێزا وانە..!

كورد دەمێ‌ دانوستاندنێ‌ دكەن دگەل حكومەتا سوریێ‌ ب رێكا روسیا دهێنەكرن نە یێن راستەوخونە دگەل رژێمێ‌، روسیا ب هەموو رەنگەكێ‌ نوینەراتیا سوریا دكەت و ب پڕاكتیك سوریا ب ڕێڤەدبەت، حكومەتا سوریا تنێ‌ شكل یێ‌ مای و هەیكەلەكێ‌ بێ‌ ناڤەرۆكە، دەسهەلاتدارێن رۆسی ئەگەر ئێك رۆژ خوە ل بەشار ئەسەدی نەكەتە خوەدی، رۆژا دویفدە دێ‌ مەراسیمێن بەهیا وی ل مزگەفتەكێ‌ ل ناڤەندا دیمەشقێ‌ هێنە گێران..! ئەڤرۆنە سوبەهی هەر ئەڤە دێ‌ چارەنڤیسێ‌ دەسهەلاتا بەشار ئەسەد بیت، چ ئایندە و پاشەرۆژەكا گەشبین ل پێشیا وان نەمایە، ژبلی خڕاندنا كەلەخێن وان دناڤا شەڤامێن پایتەختی دە.

داوی داخویانیێن بەشار ئەسەد:

بەری چەندەكێ‌ د دیمانەیەكا تێلەفزیونی دە، بەشدار ئەسەد هن داخویانیێن سەیردان، دگوت ل سوریا چ پرسێن كورد نینە، ئەوا دبێژنێ‌ كێشا كوردی ناڤونیشانەكێ‌ وەهمی یە و تشتەكێ‌ بێ‌ ناڤەرۆكە، ئەو كوردێن نها ل سوریا هەموو یێل بەر زولم و ستەما توركیا رەڤین و یێن هاتیە جەم مە نیشتەجیبووی، مە تەخسیری لهەمبەری وان نەكریە و مە مافێ‌ هاوەلاتیبوونێ‌ یێ‌ دایە وان، مە ئەو ب هەموو مافەكێ‌ یێن دل شاد و بەختەوەر كری.

دیسان د درێژاهیا دیدارا خوە دە گۆت دەمێ‌ توركیا سنورێن سوریێ‌ بنپێكری، ئەو هێزێن كوردی بێ‌ دەنگ مان و ئێك فیشەك ژی ئاراستەی هێزێن توركیا نەكر، لگور نێرینا وی كورد گەرەكە خوە ئێكلاكەن ئان بهێنە دگەل پولیسێن دەولەتێ‌ یان ژی ب ئاشكرایی خوە بدەنە ئالیێ‌ دز و جەردەڤانێن پەترۆلێ‌ مەبەستا وی د ڤێرەدا هێزێن ئەمریكا نە، هەر وەسا بڤی ئاوای چاڤێن خوە گرتبوون و نەدیڤا هیچ راستیەك ژ دەڤێ‌ وی دەركەڤیت و هەر تشتی بەرۆڤاژی بخوینیت.

___________________________________________________________

  • 1