ئەمە بڵاوبكەوە
FaceBook  Twitter  

لە رۆژێكی سەرەتای مانگی تەموزی ساڵی 1973 هاوڕێ‌ (مەلا بكر) ئاگاداری كردم كە لە كاتژمێر پێنجی ئێوارە دەبێ‌ بۆ ماڵی هاوڕێ‌ (سامیە چاوشلی) كە لە گەرەكی شۆرش بوو بچم ، هەروا ووتی كۆبوونەوەیەك بۆ ئەو ئەندام مەحەلییانەی ئێستا كە لە ناو شاری هەولێرن گرێدەدرێت ، میوانێكمان هەیە و لە كۆبوونەوەكە ئامادە دەبێت ، بەڵام باسی میوانەكەی نەكرد ، كە كێیە و ئەركی چییە ، منیش پرسیارم نەكرد .. مانگی تەموز زۆر گەرم ، بەتایبەتی لەم ساڵەدا ئاو و هەوا گەرم بوو ، بارودۆخی سیاسی لە كوردستان و عێراق وەكو ئاو وهەواكەی مانگی تەموز گەرم بوو ، لەلایەن حكومەتی بەعسی دیكتاتۆر و شۆڤێنی بەردەوام بوو، لە پاشەكشە كردن لە جێبەجێ‌ كردنی رێكەوتننامەی (11)ی ئادار و گیروگرفت دروستكردن بەتایبەتی لە پارێزگای كەركوك و ناوچەكانی تری كوردستان وەكو شەنگال و خانەقین و ... هتد لە هەمانكاتدا نێوان حزبمان و پارتی نالەبار و دژوار بوو ، ئەو پەیوەندییە تێكۆشەرانەی لە نێواندابوو بەرەو كزی و لێكترازان دەچوو ، لە گەلێك ناوچەی كوردستان رێكخراوەكانی حزبمان و ئەندام و لایەنگران لەلایەن بەرپرس و پێشمەرگەكانی پارتی فشارییان دەخرایە سەر ، لەلایەكی ترەوە نێوانی حزبمان و حزبی بەعسی فەرمانڕەوا لێك نزیك بوونەوە و ئارامی هەستی پێدەكرا و مۆركردنی بەرەی (نیشتمانی و نەتەوایەتی پێشكەوتنخواز) لە نێوان حزبمان و بەعسی بابەتی قسە و باسی ئەندامانی حزب و جەماوەر بوو ، لەم بارودۆخەدا حزبمان هەوڵی دڵسزانەی دەدا كە نێوانی پارتی و بەعس ئاسایی بێت و، پارتیش بەشداری (جبهە) بكات ، بە بەشداری پارتی و شیوعی لە (جبهە) دەتواندرێ‌ بەر لە توندرەوی بەعسی فەرمانرەوا بگیرێت ، بەڵام دەركەوت كە بەعس لەبنەرەتەوە بەهیچ جۆرێك بروای بە چارەسەری ئاشتیانەی قەزییەی گەلی كوردمان نەبووە و نیە ، لەم بارودۆخە ئاڵۆز و تەژی گیروگرفتی جۆراوجۆر لە بواری سیاسی و پەیوەندییەكان و (غروری) بەعس بەهۆی داهاتی زۆر و زەبەنی نەوت و فراوان بوونی پەیوەندییەكانی لەگەڵا دەوڵەتان بەتایبەتی یەكیتی سۆڤیەتدا ..لەم بارودۆخەدا بەرەو ماڵی هاوڕێ‌ (سامیە چاوشلی) چووم ، هاوڕێ‌ (سامیە) لە دەرگای دەرەوە پێشوازی لێكردم و چوومە ژووری میوانان ، هاوڕێیان نەهاتبوون و دانیشتم ، هاوڕێیان یەك یەك پەیدا بوون ، ئەو ئەندام مەحەلییانە لەم كاتەدا لە ناو شار بوون هەموویان هاتن ، ئەم هاوڕێیانە ( عادل سلیم و مەلا بكر و نجم الدین مامۆ و سامیە چاوشلی و محمد شێروانی و محمد خلیل و جەبار حسن و بەندە) ئامادە بووین ، پاشان هاوڕێ‌ (رەمۆ شێخۆ) ناسراو بە (ئەبو جەنگۆ) كە ئەندامی مەكتەبی سیاسی حزبی شیوعی سوری بوو ، بە ژوور كەوت و بەگەرمییەوە تۆقەی لەگەڵا یەكە یەكەمانی كردو ، هاوڕێی شەهید (عادل سلیم)یەكە یەكە هاوڕێیانی پێناساند ، هاوڕێی شەهید (عادل سلیم) بەناوی لێژنەی مەحەلی و هاوڕێیانەوە بەخێرهاتنی كرد ، ووتی دەرفەتێكی باشە لە نزیكەوە هاوڕێیان لە رێگای تۆوە هەواڵ و دەنگ و باسی حزبی شیوعی سوری برا و هاوڕێیان بزانن ، ئەنجا بەردەوام بوو ، ووتی رێكخراوەكانی حزبمان لە پارێزگای هەولێر فراوانە و لە شار و شارۆچكەكان و لادێیەكان رێكخراو وئەندام و دۆستی حزبمان هەیە ، هەر لە قەزای مەخمورەوە تادەگاتە كۆیە و چۆمان و رەواندوز و شەقڵاوە ، شاری هەولێر فراوانترین و جەماوەرترین رێكخستنەكانی حزبمان لە خۆدەگرێت ، جگە لەوە حزبمان لە نەقابەی كرێكاران و یەكیتی جوتیاران ئەندام و دۆست و لایەنگری بەرچاوی هەیە ، لە هەمان كاتدا یەكیتی گشتی قوتابیان و یەكیتی لاوانی دیموكراتی و كۆمەڵەی ئافرەتانمان لە پارێزگای هەولێر رێكخراوی جەماوەری و دیموكراتی و پیشەیی فراوانن ، هەروا لە یەكیتی مامۆستایان و لە رێزی هونەرمەندان و رۆشنبیرانی پارێزگای هەولێر ئەندام و دۆست و لایەنگری باشمان هەیە ، بە كورتی رێكخراوەكانی حزبمان لە پارێزگای هەولێر جەماوەرین ، ئەندام و رێكخراوەكانی حزب رۆژنامە دەگەیننە دۆست و لایەنگرانی حزبمان ، جگە لەوەی رۆژنامەكانی حزب لە مەكتەبەكانی ناوشار دەفرۆشرێن ، لە بواری وەرزشیش هاوڕێیانمان دەورێكی بەرچاوییان هەیە و ژمارەیەك تیپی وەرزشی میللیمان لە گەرەكەكان هەیە و یانەی وەرزشیمان هەیە بەڵام لەلایەكی ترەوە گیروگرفتی زۆرمان لە بواری پەیوەندی سیاسی لەگەڵا برایانی پارتی دیموكراتی كوردستان هەیە و ، دوو بۆ چوونی جیاوازمان لەبەرامبەر بەعسی فەرمانرەوا هەیە ، حزب لەوە نزیك بۆتەوە كە (جبهە) لەگەڵا بەعس واژوبكات ، لێرەو لەوێ‌ گرژی و توندوتیژی روودەدات و رێكخراوەكانمان فشارییان لەسەرە ، چەند جارێك وەفدی حزبمان بەسەرۆكایەتی هاوڕێ‌ (عزیز محمد) سەردانی سەركردایەتی شۆرشیان كردوە ، بەتایبەتی چوونەتەلای بەڕێز (مستەفا بارزانی) ، بەڵام پرسەكانی نێوانمان چارەنەكراون ، ئێمە بەردەوام هەوڵدەدەین لەگەڵا برادەرانی پارتی رێكبكەوین و، چارەسەری ناكۆكییەكان بكەین ، دووبارە بەناوی هاوڕێیانەوە بەخێرهاتنتان بۆ كوردستان و هەولێر دەكەم ، هیوادارم ئاسودەبن ، ئەنجا هاوڕێ‌ (رەمۆ شێخۆ) هاتە گۆو ، ووتی زۆر سوپاس بۆ ئەم پێشوازییە هاوڕێیانەیە و ، شادمانم بەدیداری هاوڕێیان و گەلێك دڵخۆش بووم بەو زانیارییانەی هاوڕێ‌ (ئەبو شوان) پێشكەشی كرد ، هاوڕێیانتان و رێكخراوەكانتان جەماوەری و چالاكن و دەنگی حزبتان بەفراوان دەگاتە شەقام و زەحمەتكێشان ، هیوای سەركەوتنتان بۆ دەخوازم ... رێگام بدەن بە كورتی هەندێ‌ زانیاریتان دەربارەی حزبمان بخەمە بەردیدتان ... حزبمان بەشێوەیەكی یاسایی و ئاشكرا ئەركەكانی خۆی رادەپەڕێنی و پەیوەندیمان لەگەڵا حزبی بەعسی عەرەبی سۆسیالیست باشە و بەیەكەوە لەبەرە داین و ، لەبەربەرەكانی توندداین لەبەرامبەر ئیسرائیلی داگیركەر و ئیمپریالیزمی ئەمریكا و هاوپەیمانانی ... حزبمان رۆڵی لە ناوجەماوەر باشە و بەردەوام لە تێكۆشانداین لە پێناوی فراوانكردنی پەیوەندیمان بە جەماوەرەوە ، بەڵام لە ماوەی رابوردودا رووداوێكی نەخوازراو و نائاسایی و نادروست لەناو حزبمان روویداوە ، ئەویش چوونە دەرەوەی (یوسف فیصل) و جەماعەتەكەی بوو لە رێزی حزب و كەرتكردنی حزب و رێكخراوەكانی ئەنجامدا ، هەروا یوسف فیصل كە ئەندامی مەكتەبی سیاسی بوو ، ئێستاكە حزبێكی بەهەمان ناوی حزبەوە دروست كردوە ، ئەمە زیانێكی گەورە و زۆری بە حزبمان گەیاندووە ، یوسف فیصل ئەم كارەی ئەنجامدا ، لەبەر ئەوەی كاریگەری بیری (عروبەی) لەسەر بوو ، هەروا لە روانگەی هەوڵدان بۆ ئەوەی ببێتە كەسی یەكەم لەناو حزبدا ، كە بەرێگای ئاسایی و یاسایی و پەیرەوی ناوخۆی حزب ئەو حەزەی نەهاتەدی ، ئەو كردەوە تێكدەرانەی ئەنجامدا ، بەشێكی بەرچاو لە هاوڕێیانی حزب لەگەڵا (یوسف فیصل) رۆیشتوون ، لە پەیوەندی بەردەوامداین لەگەڵا ئەو هاوڕێیانەی چوونەتە دەرەوەی حزب بۆ ئەوەی بگەرێنەوە بۆ ناو حزبی خۆیان ، هەروا ژمارەیەكیش لە هاوڕێیان لەئەنجامی لەت بوونی حزب دانیشتوون و وازییان لە كاری حزبی هێناوە ... بۆ ئاگاداریتان پەیوەندییەكانی نێونەتەوەیی حزبمان لەگەڵا حزبە شیوعییە براكانمان بەردەوامە و تێكرای حزبە براكانمان سەركۆنەی كردەوە تێكدەرانەكەی (یوسف فیصل)یان كردوە و پشتیوانی و هاوكاری حزبمانن ، دارایی حزبیش لە دەستێكی ئەمیندایە و نەیان توانیوە دەستی بەسەر دابگرن ... هەروا هۆیەكانی راگەیاندنی حزب لە ژێر دەستی حزبدایە ، هاوڕێ‌ (رەمۆ شێخۆ) بەردەوام بوو ووتی لەم رۆژانە سەردانی سەركردایەتی شۆرشی كوردستان دەكەم و چاوم بە سەرۆك بارزانی دەكەوێت ، ئەگەر هەر بۆ چوون و پێشنیارێكتان هەبێت بۆ سەركردایەتی شۆرش ئەوە وەكو ئەركی سەرشانم دەگەیەنمە شوێنی مەبەست ، ئەگەر هاوڕێیانیش هەر پرسیارێكیان هەبێت سەبارەت بە بارودۆخی حزبمان و سوریا دەكرێت قسەی لەسەر بكەین ...

هاوڕێ‌ (عادل سلیم) بەناوی هاوڕێیانەوە سوپاسی هاوڕێ‌ (رەمۆ شێخۆ)ی كردو ، هەروا سەركۆنەی كردەوە لەتكردنەكەی حزبی لە لایەن (یوسف فیصل)وەكرد ... سەبارەت بە سەردانیشی بۆلای بەڕێز (مستەفا بارزانی) ووتی هیوادرین سەركەوتووبن ، پەیوەندی حزبمان بەسەركردایەتی شۆرشەوە بەردەوامە و بەر لە ماوەیەك وەفدی حزبمان بەسەرۆكایەتی هاوڕێ‌ (عزیز محمد) سەردانی سەرۆك بارزانی كردوە و هەوڵەكان بەردەوامن لە پێناو چارەسەركردنی گیروگرفتەكان ، ئێمە وەكو حزبی شیوعی عێراق ، بارزانی بەسەركردەیەكی پایەبەرز و ناوداری گەلەكەمان دەزانین و هەڵوێستیشی لەبەرامبەر حزبمان لە ساڵی 1963 بەرچاوە و لەیادی ناكەین .

مەبەستمانە پەیوەندی دێرین و تێكۆشەرانەی حزبمان و پارتی دیموكراتی كوردستان بەردەوام بێ‌ و بەهێز و توانای هەردوولامان هەوڵی جێبەجێكردنی بەیاننامەی 11ی ئاداری ساڵی 1970 بدەین .

  • 1