ئەمە بڵاوبكەوە
FaceBook  Twitter  

لە ڕۆژهەڵاتی ناوەڕاستدا، كە كوردستانیش بەشێكە لەو جوگرافیایە، زۆر بە دەگمەن سیاسی و تێكۆشەرێك، سەركردەی حزب و وڵات و جووڵانەوەیەك هەڵدەكەوێت لە دوای مردنی ، مێژووێك لە نەمری و سەربەرزی و شكۆمەندی، جێبهێڵێت. بە پێچەوانەوە، هەمیشە مەرگی سیاسییەكان، یەكێك بووە لە خەونی گەورەی زۆر لە مرۆڤەكان. چونكە ئەوانەی ڕۆژگارێك بە نێوی تێكۆشانی سیاسی، خەبات لە پێناو گەل و مرۆڤ و مافە ڕەواكانیدا تێدەكۆشان، لە دوای سەركەوتنی شۆڕش و بە ئاكام گەیشتنی خەبات و تێكۆشان، لە هەموو ئەو پرەنسیپە شۆڕشگێڕیی و مۆڕاڵیانە هەڵدەگەڕێنەوە، كە ڕۆژگارێك خەباتیان لە پێناودا دەكرد و بڕوایان پێی هەبوو. سەرنج بدەن، سیاسیانێكی زۆر سەردەمانێك لە نێو ئێمەدا پیرۆز دەكران ، كەچی هەمان ئەو سیاسییانە ئێستا چۆنن؟ جگە لە هێمایەك بۆ گەندەڵی و نادادپەروەریی، بێ دادیی و هەڵپەرستی، لە دیدی هەموواندا وێنە و پێناسەیەكی دیكەیان هەیە؟ بۆیە سەربەرزن ئەو سیاسییانەی هەر لە سەرەتاوە تا دەمرن، لە نێو دەریای لیخن و پیسی سیاسەت، بە پاكی دەمێننەوە و لیتاوی بە ناو كوردایەتی و شۆڕش، شوهرەت و ناویان لە كەدار ناكات. هاوڕێ كەریم ئەحمەد، یەكێك لەو تێكۆشەرانەی لە كۆی سەد ساڵ تەمەن، هەفتا ساڵی لە پێناو خەباتی ڕەوای گەڵەكەی لە تێكۆشانی چینایەتی و نەتەوایەتی تەرخان كرد. ئەو هەر لە دەسپێكی خەباتییەوە، ئەو خەباتەی بە پاكی هێنا، بۆیە ئێستا كە ماڵئاوایی لە ژیان دەكات، ناو و پێگەی، مێژووی خەبات و تێكۆشانی لە هەموو كاتێك زیاتر لە درەوشانەوە دایە و بە شانازییەوە باس لە خاكیبوون، سادەیی، پەرێز پاكی، خاكەڕایی ئەو مرۆڤە مەزنە دەكرێت. ئاخر تا ئێستا، كێ گوێبیستی ئەوەبووە لە سووچی ماڵپەڕو ڕۆنامەیەك، لە دووتوێی یاداشت و بیرەوەریەكدا، لە نێو لاپەڕەی كتێبێكدا، بە نەرێنی باسی ئەو هاوڕێیە بكرێت؟ كێی دەیزانی ئەو سكرتێری حزبێكی تەمەن هەفتا ساڵیشە؟ مەگەر هیچ كاتێك خۆی لە كەسانی هەژار و بێ دەرەتان، چینی چەوساوە جیا دەكردەوە؟ ئەو سكرتێرە، وەك هەر مرۆڤێكی ئاسایی لە نێو جەماوەر و گەلەكەی دەژیا و ئەو ژیانەشی سەربەرزانەتری دەكرد. ئەو بە سۆڵێكەوە، بە كراسێكی نیوقۆڵ و دوودەستی پڕ لە عەلاگەوە، وەك هەر مرۆڤێكی دیكە، لە بازاڕ دەگەڕایەوە نە قافڵەی ئوتومبێل، نە لەشكرێك پاسەوان و سەگی پشكێنەری لەگەڵ نەبوون، نە هیچ شەقام و كوچەو كۆڵانێكی بۆ دەگیرا. هاوڕێ كەریم ئەحمەد، سیاسیێكی بە مۆڕاڵ و خاوەن پرەنسیپ و هەڵوێست بوو، كە تا مرد دەستبەرداریی بیری چەپخوازانە و پێشكەوتنخوازنەی خۆی نەبوو، بەڵكو لەگەڵ هەڵكشانی تەمەنیدا، بیر و بڕوای پتەوتر و باوەڕیشی بە مافی گەلەكەی تۆكمەتر دەبوو. ئەو وەك هەرمرۆڤێكی دیكەی ئاسایی دەژیا، بۆیە مردنیشی وەك هەر مرۆڤێكی دیكە ئاسایە. لە كارەساتی شەڕی قڕناقا و پشت ئاشاندا، كە بە داخەوە شەست و هەشت پێشمەرگی شیوعی تێدا شەهید كراو پەڵەیەكی ڕەشە لە مێژووی خەبات و كوردایەتی و حزبایەتی ئێمەدا، هاوڕێ كەریم بە دیل دەگیرێت، وەختێ هەواڵ دەگاتەوە مام جەلال، دەست بە جێ برووسكە بۆ هێزەكانی یەكێتی دەكات، كە بەو پەڕی ڕێزو شكۆوە هاوڕێ بێننە بارەگای مەڵبەندی سێ لە وەرتێ. لە پای ئەم كارەساتەوە، مام بە جۆرێك لە هەستكردن بەتەرقیبوونەوە و شەرم، پێشوازی لێ دەكات و نیگەرانی خۆی بۆ ڕووداوەكان دەردەبڕێت. بێگومان هاوڕێ كەریم ئەحمەد، مامۆستای مام جەلال بوو، ئەو لەوەو فێری ئەلف و بێی تێكۆشان وخەبات بووە، بۆیە ڕێزێكی تایبەتی لێ دەنا. ئەو ڕێزلێنانە، هەر تەنها ڕەنگدانەوەی ئەو پەیوەندییە نییە كە مامۆستا و خوێنكارێك بە یەكەوە دەبەستێتەوە، بەڵكو ڕەنگدانەوەی سرووشتی كەسییانەی هاوڕێ خۆشی بووە، كە هەمیشە سادە و خاكی ڕەفتاری كردووە و ژیاوە. هەر ئەو خاكیبوونەشە وای لێدەكات لە گەلەكەی دانەبڕێت و بە مردنی هەمووان بۆی بە پەرۆش بن. هاوڕێ، زادە و قاڵبووی نێو چینی چەوساوە و هەژاران بوو، لە نزیكەوە دركی بە خەمەكانییان دەكرد، بۆیەشە تا مرد سەنگەری ئەوانی جێنەهێشت و هەر لە تەكیان مایەوە. چەند شانازییەكی گەورەیە، لە ڕۆژهەڵاتی ناوەڕاست و كوردستان بژیت، سەركردەی سیاسی و سكرتێری حزب بیت، كەچی وەختێ دەمریت نە بیرە نەوت، نە دەیان لیكسس و مۆنیكا، نە سەدان دۆنم زەوی لە دوای خۆت جێنەهێڵێت، بەڵكو تەنها مێژووێك لە پاكی و سەربەرزی نەبێت. دواجار دەڵێم، ناو پێگەی هاوڕێ كەریم ئەحمەد، بە قسەی كۆلكە مەلایەكی نەخوێندەوار، بچووك نابێتەوە و لە بنەڕەتدا شیوعییەكان نابێ بەو قسانە هەر دڵگرانیش بن، چونكە كەسێك مێژووەكەی، ناو و شوناسی، ڕابردووی دیار بێت، ئیدی پێویست بەوە ناكات لە ڕێگەی كەسانی دیكەوە بیناسین، بەڵكو ئەو جۆرە مرۆڤانە خۆیان پێناسەی خۆیان دەكەن و بیریشمان نەچێت كە هەمیشە مرۆڤە بچووك و بودەڵەكان، لە پەراوێزی گەورەیی ناوی مرۆڤە مەزنەكانەوە، هەوڵی بە ناوبوونی خۆیان دەدەن.

  • 1