ئەمە بڵاوبكەوە
FaceBook  Twitter  

 

 

     كچە كوردێكی سەقزی 22 ساڵان، بەناوی مەهسا ئەمینی، بە هۆی باڵاپۆش نەبوونی، لە لایەن پۆلیسی ئەو وڵاتەوە ئازار و ئەشكەنجە دەدرێت. دواتر بە كاریگەریی ئەو لێدانەوە گیان لە دەست  دەدات.

     مەهسا ئەمینی ناسراو بە (ژینا ئەمینی) لە 13/9/ 2022 لە گەشتێكدا بۆ تاران، لە لایەن هێزەكانی بەرەنگاربوونەوەی پابەند نەبوون بە باڵا پۆشی، كە سەر بە دەزگا ئەمنییەكانی تارانن، لە سەری دەدرێت و بە سەختی بریندار دەكرێت. دواتر دەبرێتە زیندان, دوای بێهۆش بوونی دەگوازرێتەوە بۆ نەخۆشخانە و پاش سێ ڕۆژ مانەوەی لە نەخۆشخانە، گیان لە دەست دەدات.

     ئەوەی ئەمڕۆ لە ئێراندا دەگوزەرێت بە هەموو پێوەرێك ترسە لە ئازادی و خۆبوون، ئەو دەسەڵاتەی كۆمەڵگای كردووەتە قوربانی مانەوەی خۆی، دەیان كێشەی تووشی پێكهاتەكانی كردووەتەوە. زوومی گرنگی پێدانی خستووەتە سەر بەرژەوەندییەكانی لە وڵاتانی ناوچەكە، و بە دژایەتی ڕۆژاوا و بەتایبەت ئیسرائیل و ئەمەریكاوە خۆی بادەدات، لە ئازادی ژنێك دەترسێت و لە بەرانبەر سەرێكی بێسەرپۆشدا تووشی هیستریا دەبێت.

     كۆماری سێدارەی ئیسلامی وەك شێركۆی مەزن ناوی نا، قەیران دوای قەیران دەرخواردی كۆمەڵانی خەڵكی ئێران دەدات، لە ناویشیاندا كوردانی ڕۆژهەڵات كە گیرۆدەی نەبوونی و كۆڵبەری و ماددەی هۆشبەر و لە سێدارەدان بوونەتەوە. لە ئاستی دەرەوەش بۆ نموونە لە عێراق هەنگاوێك گەڕێنرایەوە دواوە. دەزانێت تروسكای ئازادی توانای هەیە گڕ لە توڕەی خەڵك بەربدات و زاخاوی ئەو هەموو نەهامەتیانەی ساڵانێكە خەڵك پێوەی دەناڵێنن بدەنەوە بە ڕووی دەسەڵاتی ستەمكاری فەرمانڕەوادا.

     بەپێی ڕاپۆرتە نێودەوڵەتییەكان، لە كۆی جیهان پاشەكشە لە ئازادی هەیە، دەستێوەردانەكان هێندە زۆربوون مەترسییەكانی پێكدادان ئەگەرێكی كراوەیە. ئەوەی لە ئێراندا هەیە ترسە لە ئازادی پۆشین بەدەر لە ئازادی سیاسی، تیرۆری كەسایەتییە كۆمەڵایەتییەكان دەكات وەك چۆن پێشتر تیرۆری سیاسی دەكرد، ئەو دەنگانە كپ دەكات داوای قسەكردن بە  زمانی دایك، یان ئازادی كاری ڕێكخراوەیی دەكەن، كە ئەمەیان مەترسیدارترین جۆری پێشێلكردنی مافی مرۆڤە.

     جیاوازی نێوان ئازادی بە پێوەری كۆماری ئیسلامی و ئەو ئازادییەی هێزە پێشكەوتنخوازەكان دەیانەوێت، لە تیرۆركردنی ژینا ئەمینی دا بە زەقی دەبینرێت، ئازادییەكی بە بەها، بە هێزكردنی پێگەی كۆمەڵایەتی ژن، لە بەرانبەر ئازادییەكی نابووتی دەسەڵاتدا كە لە ڕێگەی پیاوانی دینی مەزهەبگەراوە دەیانەوێت ژنان ببن بە كاڵا و تەنیا ئارەزووە سێكسییەكانیان ئازاد بكەن, ئەگینا هەموومان دەزانین ئەوەی لە ئێرانی ئیسلامیدا دەگوزەرێت، بە هەموو لێكدانەوەیەك لە هیچ كۆمەڵگایەكی تردا بەو شێوە ترسناكە پەیڕەو ناكرێت.

     كاتێك عەلمانییەكان دەڵێن با مرۆڤەكان ئازادبن لە پۆشینی جلوبەرگەكانیان، مەبەستیانە هیچ سانسۆرێك نەبێت، مرۆڤ ئازاد بێت. كەچی ئیسلامییەكان دژی ڕێگرییەكانن لە نیقاب و باڵاپۆشی، وەك ئەوەی پێشتر لە هۆڵەندا ڕوویدا، لە كاتێكدا لە تاراندا بە هۆی باڵاپۆش نەبوونەوە كچە كوردێك تووشی جەڵتەی مێشك دەكەن و دەبێتە قوربانی. لە نێوان ڕێگری و تیرۆردا جیاوازییەكی زۆر هەیە، بیرێكی ترساو لە هەموو داپۆشراوێك و بیرێكی توندڕەوی مەترسیدار.

  • 1