ئەمە بڵاوبكەوە
FaceBook  Twitter  

كاتێك قەیرانە ئابوریەكانی جیهانی سەرمایەداری پەرە دەسێنێت و بە دەمارەكانی كۆمەڵگەدا شۆڕ دەبێتەوە ، بێ‌ گومان قەیران قەیران دروست دەكات گەر پلانی تۆكمە ڕێگری لێ‌ نەكات لە بڵاو بونەوەو كاریگەریەكانی لە هەر كوێ‌ بیێت ، قەیرانی سەرمایەداری كاریگەری لەسەر ژیانی كۆمەڵگە بە گشتی و لەسەر توێژی جوتیاران بە تایبەتی و لە بواری كشتوكاڵ و ئاودێریدا ڕەنگدەداتەوە.

بە ڕادەیەك لە كوردستان بە گشتی و جا هەر ناوچەو پارێزگایەك بە پێ‌ ی جوگرافیاو كەش و هەوا كاریگەری جیاوازی هەیە ، نەبونی بەرنامەو پلانی پتەو جوتیارانی كوردستانی ڕووبەڕووی كێشەی بێ‌ ئاوی كردۆتەوە ، بێ‌ ئەوەی بیر لە سەرچاوەی ئاو بكرێتەوە بۆ ئاودێری ، دروست نەكردنی بەنداو لە ماوەی سی ساڵی ڕابووردوو وە پشت بەستن تەنها بە بواری بازرگانی كەلێنێكی گەورەی لەو بوارە دروست كردوە ، گەر بەنداوێكیش لێرەو لەوێ‌ دروست كرابێت بە خواست و داوای كەسانی دەست ڕۆشتوو بووە .

گرنگی نەدان بە سەرچاوەی ئاو بە زیانی گەورە بەو بوارە دەدات بە تایبەت ئەو كانی و كارێزانەی بەرەو وشك بوون دەڕۆن ، جا بە هۆی كەم بارانی بێت یان بە هۆیی گۆڕینی ڕێڕەوی ئاوی ژێر زەوی بێت یان بە هۆی زەمین لەرزەوە بێت یان دەست تێوەردانی گوندێك بۆ بەرژەوەندی گوندێكی تر بە هۆی دەست ڕۆیشتوبی كەسایەتیەوە ، وەك دەڵێن لە ناوچەی قەرەداغ ئاوی گوندێك بە دووری 4 كیلۆمەتر بە بۆری 4 ئینجی گواستراوەتەوە بۆ گوندێكی تر ، وە دەشڵێن گوند هەیە بە تەنكەر ئاوی بۆ دەچێت .

لە هەندێك شوێنی ناحیەی پیرە مەگروون وەك باس دەكرێت لە بێ‌ ئاوی ، هەندێك لە جوتیاران ئاوەڕۆ بەكاردێنن بۆ ئاودێری ، وە لە هەندێك شوێنیش ئاوی ئاوەڕۆ تێكەڵ بە كانیاو ئاوی ئاودێری بووە .

جۆگەی ئاوەكان بەرەو كەمی دەڕوات و كاریگەری خراپی دەبێت بۆ داهاتوو ، لە وەزعی سیاسی ئەمڕۆی جیهان و ناوچەكەدا و قوڵ بونەوەی ناكۆكیەكان و بەرلێك كەوتنی ناكۆكیەكان ، گەر ئەقڵانی بیری لێ نەكرێتەوە جیهان ڕووبەڕووی جەنگێكی گەورە دەبێتەوە و كاریگەری خراپی دەبێت لەسەر هاتووچۆی بازرگانی و ڕێگری كردنی ئاڵوگۆڕی بازرگانی بە تایبەت لە بواری دانەوێڵەو نەوتدا ، كە بنچینەی پێویستی ژیانی مرۆڤە .

پێویستە لایەنە پەیوەندارەكانی بواری كشتوكاڵ بیری جدی بكەنەوە لەم پرسە لەگەڵ ئەوەی جوتیارانی كوردستان بە هۆی بێ‌ ئاوی گرفتیان زۆرە و پێویستی بە چارەسەر هەیە ، بۆ قۆناغی ئێستامان ..

1 - هاندانی جوتیاران بۆ كشتوكاڵ و ئاودێری بە تایبەت دانەوێڵە .

2 - هاوكاری كردنی جوتیاران لە تۆوی باش لە گەڵ پێویستیەكان بەهێزكردنی زەوی .

3 - چارەسەركردنی كێشەی ئاودێری بۆ گوندنشینان .

4 - دابین كردنی پێویستیەكانی كێڵان و دروێنە بە نرخی گونجاو تا هەوڵ بدرێت چاوەڕێ‌ ی بەرهەمی هاوردە نەكەین .

5 - گەڕانی تیمی ڤێتەرنەری بە ناو گوندەكاندا و پشكنینی ئاژەڵان بۆ ڕێگری كردن لە بڵاو بونەوەی نەخۆشی .

6 - بەرنامەی تایبەت بۆ ڕێنمایی كشتوكاڵ لە كەناڵەكانەوە .

  • 1