ئەمە بڵاوبكەوە
FaceBook  Twitter  

 

     لە قۆناغە جیاوازەكانی ژیاندا كەسانێك بەركەوتەمان دەبن كە بە هەر دوو دیوی باش و خراپدا كاریگەریمان لە سەر جێدەهێڵن. بە دڵنیاییەوە خۆمانیش كاریگەریمان لە سەر كەسانێك بە جێهَیشتوە، یان لە داهاتوودا دەگەینە ئاستێك لە ڕێگەی مامەڵەی ڕۆژانەمانەوە، دەبینە جێگەی بایەخ و گرنگی پێدان، یان ڕەخنە و ناڕەزایەتی.

    مرۆڤ بە پێدان زانیاری و ڕوونكردنەوەی بابەتەكان دەگاتە ئاستێكی باڵاتر لەوەی پێشتیر پێی گەیشتووە. هەر بۆیە باسكردن لە ئەزموونی كەسایەتییە سەركەوتووەكان قسەی سەر زمانمانە و هەمیشە ویستوومانە وەك ئەوان بین، یان دژیان بین وەك دیكتاتۆر و خوێنڕێژەكانی ناو مێژوو. لە هەر كەسێك بپرسین تۆ لە قۆناغەكانی خوێندنتدا بە كامە مامۆستات سەرسامیت و بیرت ماوە، یان كامەیان مامەڵەی لە گەڵتدا خراپ بووە و هەستدەكەیت مافی خواردوویت، بە دڵنیاییەوە لە هەردوو جۆرەكە لیستێكمان بۆ ئامادە دەكات.

     ئێمەی مرۆڤ هەمیشە لیستێك ناومان لە بیرە و لە یادەوەریماندا دەمێنێمتەوە، كە هەموو، یان زۆربەی شكستەكانمانی پێدا هەڵدەواسین. بۆ دەرەوە دەڕوانین و كەمترین تەماشای خۆمانمان كردووە.

     كاتێك قسە دەكەین بۆ بەرانبەرەكانمان، هەموو قورسی و ئالنگارییەكانی بەردەم پرۆژەكان دەبینین، كەچی خۆمان لە هەندێك ڕاستی دەدزینەوە و بەرگرییەكی نالۆژیكیانە لە هەنگاوێك دەكەین بە ڕاستی نازانین. وەك ئەو دایك و باوكانەی كە بە هەڵە و بەناوی دڵسۆزییەوە بۆ خوێندن، فشار لە نەوەكانیان دەكەن و بەبێ هیچ ئامادەكارییەكی پێشوەختە چاوەڕوانی كۆتاییەكی نایابن و ئومێدی سەركەوتن دەكەن.

     باشترین نمونە كە زۆربەمان بیستوومانە، ئامۆژگارییەكەی غاندییە بۆ ئەو منداڵەی كە دایكی دەیباتە لای و دەیەوێت غاندی ئامۆژگاری بكات بۆئەوەی شیرینی نەخوات، دەڵێت بڕۆن هەفتەیەكی تر بێنەوە. دوای هەفتەكە غاندی ئامۆژگاری منداڵەكە دەكات كە بە هۆی زیانەكانییەوە شیرینی نەخوات، دایكەكە دەپرسێت بۆ ئەو قسەیە هەفتەیەك دوات خستین لەوە تێنەگەشتم؟ ئایا نەدەبوو هەفتەی پێشوو ئەو ئامۆژگارییەی منداڵەكەمت بكردایە؟ غاندی لە وەڵامدا دەڵێت هەفتەی پێشوو منیش وەك نەوەكەت شیرینیم دەخوارد، بۆیە نەمدەتوانی ئامۆژگاری بكەم كە دووركەوێتەوە لە خواردنی، بەڵام لەماوەی ئەم هەفتەیەدا خۆم شیرینیم نەخوارد تا بتوانم ئامۆژگاری ئەو بكەم كە زیانی زۆرە و نەخواردنی بە سوودترە.

     وتەیەكی بەناوبانگ هەیە دەڵێت هەر كەس بەردەرگای ماڵەكەی پاك بكاتەوە، شارەكەی هەمووی پاك دەبێتەوە، لە كۆی بابەتەكانی تردا بە هەمان شێوە، گەر توانیمان لە خۆمانەوە دەستپێبكەین، واتا توانیمان یەكەم هەنگاوی سەركەوتن ببڕین، دەنگمان زوڵاڵترە لە كۆی ئەو دەنگانەی لە بری ئەوەی ببنە بەشێك لە هۆكارەكانی سەركەوتن، هۆكاری پاشەكشەی یەكجارەكین.

     لە خۆتەوە دەستپێبكە، با هەمووان دەستپێكردنەكەت ببینن، چاوەڕوانی كەس مەكە و دەستپێبكە. خۆت بەوانەوە سەرقاڵ مەكە هەنگاوەكانت نادیدە دەگرن، دواتر لە هەنگاوەكانتدا سەركەوتوو بویت، خۆت قسە ناكەیت، بەرهەمی هەنگاوەكانت، هەموو شتێك بۆ هەمووان ڕوندەكاتەوە.

  • 1