ئەمە بڵاوبكەوە
FaceBook  Twitter  

   سەرەتای ڕۆژی ئەمڕۆ ٢٨ ی تشرینی یەکەمی ٢٠٢٢ مان بە گرمەی درۆن و لورەی موشەکەکانی کۆمارێک کە پاشکۆی ناوەکەی پێش ووڵاتەکە ئاینێکی پیرۆزی ستەمکارو ستەملێکراوەکانە ،و لەنێوقیژەو هاواری ژن ومنداڵی ئاوارەی دەستی ستەمکارو خوێنی بە ناهەق ڕژاوی پێشمەرگەی داکۆکیکار لە خاکێک کە دوژمن لەسەری زاڵەی ستەملێکراوان.

    ئەمڕۆ درۆن و موشەکەکانی کۆماری ئیسلامی ئیران جیاوازیان نەکرد لەنێوان پێشمەرگە و ئافرەتی دووگیان وکۆرپەکەی کە بە شەهیدبوونی دایکی ئەو یەکەم هەناسەی ژیانی بەبۆنی بارووتی سوپاکەی داکۆکیکار لە موستەزعەفین هەڵمژی.

   ئەمڕۆمان لەنێو قیـژەو هاواری مناڵ گەلێکی قوتابخانە زرنگایەوە کەتازە لە سروودی خوایە وەتەن ئاواکەی بووبوونەوە، کەچی لە وەتەنەکەی خۆیانەوە کە هێشتا بەچاوی خۆیان نەیان بینیوە، لەبری گوڵ و کێک دەنگێکی تۆقێنەرو ڕەزاقورسیان بۆ کرایە دیاری.

    ئەم کردەوە نامرۆڤانەیەی دراوسێ نزیکە

خۆبەدۆست زانەکەمان یەکەمجار نییە ڕووبدات، بگرە بەدوای بیانویەکدا دەگەرێ و ساڵانە چەندین جار سنورە نیودەوڵەتی و شکۆی ئاسمانی ئەم هەرێمە دەبەزینێ ،جارێک دەیەوێت لەتینویەتیدا بمانخنکێنی وڕەزوباخو سەوزاییمان لارەمل و زەرد بکات وئاوی ڕووبارەکان دەگرێتەوە، تاوێکیش بە هەبوونی ئیسرائیلی لەناو هەرێمدا، وتاوێکی تر بۆ چاوسورکردنەوە لە بەرپرسان ، و داخستنی سنورەکان ئەگەر لەگەڵ لایەنە دۆستەکانیان لەبەغدا زیزبوون هەبێت، وهەمووجارێکیش بە هۆی هەبوونی ئوردوگای ماڵە کوردی پەنابەرو چەند بنکەیەکی حزبەکوردستانییەکان. ئەوە لە  کوشتنی تاکتاکی کادیرو سەرکردەو ئەندامی حزبەکوردستانییەکانی ڕۆژهەڵات بەدەستی بەکرێگیراوانی نێوخۆیی کاری چەندبارەیە.

    لە بەرامبەر هەموو ئەوکارانەدا، ئەگەر کەمتەرخەمییەک هەبێت(دیارە بەقەولی ئەوان) لەلایەن خەڵک وحکومەتی هەرێمەوە، جێکردنەوەی ئەو براکوردانەی رۆژهەلاتە بە خەڵکی سڤیل و بە پارتەکانیانەوە لە هەرێم، کە ئەم هێزانە و لەبەر دروستنەکردنی بارگرژی بۆ حکومەتی هەرێم و کۆماری ئیسلامی ئێران، یەکجار زۆر خۆیان گوشیوە لە ئەنجامدانی چالاکی سیاسی و چەکداریدا.

     وابەستە بە بارگرژییەکانی چەند ڕۆژی رابردووی شارەکانی ئێرانیش، ئەم هێزانە جگە لە بڵاوکراوەی سیاسی و پشتیوانی بۆ داواکانی خۆپیشاندەران ، جموجۆڵیکی تری سەربازیان نەکردووە، خۆ ئەگەر هەڵویست دەربرینیش بە زارەکی ولەنێو میدیاکاندا یاساخ بکرێت، ئیتر ئەوانە بۆچی حزبی سیاسین، ئەوکات دەرگای بارەگاکانیان دادەخەن و سەرقاڵی ژیانی تایبەتی دەبن.

   لەهەمبەر ئەو دەستدریژی وسنوربەزاندنانە، هەموو حزبە سیاسییەکانی باشورو سەرۆکایەتی حکومەت و هەرێم و پەرلەمان ورێکخراوە پیشەیی و دیموکراتییەکان و جەماوەری شارەکان بەخۆپیشاندان سەرکۆنەی کردەوەکەیان کرد، وهاوکات بەشێکی زۆری سەفارەت و کونسولگەری ووڵاتان هەڵویستی باشیان نواند، ولایەنگریان بۆ عێراق و هەرێم دووپات کردەوە.

   هاوکات قەرارگای هەمزەی سوپای پاسدارانی ئێران پشتڕاستی پرۆسەکەی ،بەشێوەی هەڕەشە ئامێز کردەوە کە ئاگادارییە بۆ دەسەڵاتدارانی هەرێم و حزبەکوردستانییەکانی ڕۆژهەڵات کە تامل نەدەن بە داواکانیان، ئەگەری دووبارەکردنەوەی کردەوەکان بەردەوامی دەبێت. ولە ئاسۆی نزیکیشدا هەست بە هەبوونی هیچ جۆرە جموجۆڵێکی دیبلۆماسی ناکرێت لە نێوان عێراق و ئێراندا ،بۆ ڕاگرتنی ئەم سنوور

بەزاندنانەو و ئەوە کاردانەوەی تر بۆ رێگریکردن نەلە هێزی سەربازی عێراق و نەهەرێم چاوەڕوان ناکرێت و سنوورەکان لەبەردەم تورکیاو ئیراندا وەک ماڵی بێ دەرگاو پەنجەرەی لێهاتووە.

     بەرپرسیارییەتی پاراستنی سەروماڵی هاووڵاتیان ومیوانەکان و سنورەکانی زەمینی و  ودەریایی لە ئەستۆی هەردوو حکومەتی عیراق و هەرێمی کوردستاندایە، و پێویستە دەست لەبەر ئەژنۆو بێدەسەڵاتانە دانەنیشن، هەموو ڕیگاکانی دیبلۆماسی وپەیوەندییە نێو دەوڵەتییەکانیان بەکار بهێنن بۆرێگریکردن لە دووبارەبوونەوەی ئەم  کارەساتانە وسنوردانانی نێودەوڵەتی بۆ هەریەک ئێران و تورکیا لە رێزگرتن لە سەروەری عێراق بەهەرێمی کوردستانەوە، هەوڵدان بۆ گەیاندنی ئەم ستەمکاریانە بۆ دامەزراوە نێو دەوڵەتییەکان، وبۆ سەندنەوەی مافەرەواکانمان، ئەگینا وولاتەکەمان دەبێتە گۆڕەپانی یەکلاکردنەوەی ململانێکەرانی دەرەکی .

  • 1