ئەمە بڵاوبكەوە
FaceBook  Twitter  

 بیروبۆچوونی جیاواز و تەوزیف كردنی ڕەخنە وەك چۆن بەشێكە لە پێناسە دیارەكانی دیمۆكراسی و فرەچەشنی قەزاوەتی كۆمەڵگای مەدەنی، ئاواش لە جەوهەری خۆیدا هەڵگری كۆمەڵێك توخم و ڕەگەزی گرنگە لە بەردەم پێشكەوتن و بەرەو پێشچونی كۆمەڵگادا و ئەگەر رەخنە و جیاوازی بیروبۆچون نەبێت ئەگەرەكانی هەنگاونان بەرە و ستەمكاری و میلیتاریزم گەشەدەكەن و دەبنە بنەمایەك بۆ بەرجەستەكردنی ئەقڵیەتی مێگەلی و چەواشەكاری گشتی ، واتا ئەگەرچی ڕەنگە بە دیوێكدا ڕەخنە بەدبینی و غەدربێ بەڵام لە ڕاستیدا نەبوونی ڕەخنەی جدیی بۆخۆی بەدبینی و تێڕوانینێكی مەترسیدارە و ناكرێ پشتی تێكرێ

چونكە لە پاشەكشەی ڕەخنەی جدیدا دەسەڵات چاوپۆشی لە هەڵە و كەمووكورتیەكانی كارەكتەرە سیاسیەكان دەكات و ئەو بارودۆخە بە هەلدەزانێ بۆ تۆخكردنەوەی دەسەڵاتی پۆلیسی خۆی و برەودان بە گەندەڵی و ناعەدالەتی كۆمەڵایەتی و خولقاندنی ڕەگ و ڕیشەكانی بێ بەهاكردنی دەسكەوت و بەها مرۆییەكان، كە ئەمەش بوە سیمای پرۆسەی دەوڵەتداری و ئیدارەدانی كۆمەڵگا ئیدی ئەوانەی كە لەو كەشووهەوایەدا گەشە دەكەن، دەبنە بەشێك لەو حاڵەتە و ناتوانن ئیستعابی ڕەخنە بكەن وەك ئەوەی كە هەیە، ئەوانەشی كە هەڵگری ئەم جۆرە عەقڵیەتە میلیتاریزمیەن هەمیشە جەخت لە چەسپاندنی هێز و دەسەڵات دەكەنەوە و نایانەوێ‌ كۆمەڵگا لە قۆزاخەكەی بێتە دەر و زۆر لە كارەكتەرە سیاسیەكانی ناو ئەم مەنزوومەیەش ئەم بابەتە تەحویلی بازنەی خیانەت و تەفسیری موئامەرە و دەست لەگەڵا دوژمن تێكەڵا كردن و لەناو بردنی ئەزمون و خەباتی نەتەوەیی دەدەن و دیماگۆجیانە مامەڵە بە سیاسەت و پرۆسەی دەوڵەتداریەوە دەكەن و نایانەوێ‌ ڕووی ڕاستی شكستی ئیدارەدانیان بخرێتە روو

ئەوەشی لەم پاكێجی بێ ئەهمیەتكردنەی ڕەخنەی جدیدا دروست بووە، هەم دەسەڵات لێی بەرپرسیارە و هەمیش هێزەكانی دەرەوەی دەسەڵات، و كۆی ڕەخنەكانیشیان جگە لە دەنگەدەنگ و بۆڵەبۆڵێك زیاتر نەبوە و نەیتوانیوە دەسەڵاتی شكستخواردووی ئەحزابی دەسەڵاتداری كوردستان بێنێتە پایی ڕاستكردنەوە و سەرلەنوێ داڕشتنەوەی پرۆسیسی حوكمڕانی بەگوێرەی مۆدێلە سیاسیەكانی خۆرئاوا كە خەونی شۆڕش و قوربانیدانی خەڵكی كوردستان بوو، ئەمانە هەوڵدەدن بە قسەی بازاڕیی و ئینشائیات، ڕەخنەی جدی بخنكێنن وبەوە بیسەلمێنن كە هیچ ڕەخنەیەكی جدی ناتوانێ لە ئەرزی واقیعدا گۆڕانكاری بابەتیانە و چاكسازی نیشتمانی بخولقێنێ وەك ئەوەی كە كۆمەڵگا چاوی لە سەرە، ئەمە لە كاتێكدایە كە كۆی كێشەكانی كۆمەڵگەی كوردی لەم قۆناغ و هەڵومەرجەدا پێویستی بە دەستنیشانكردن و پیاچوونەوەیەكی ورد هەیە، و ناكرێ هەڵە و كەم و كورتیە سیاسی و ئابوری و كۆمەڵایەتیەكان كە بەدەست ئەحزابی دەسەڵاتدارەوە لە هەڵكشان و تەشەنەكردن و قوڵبوونەوەدان و بوونەتە مایەی نەگبەتی وچەرمەسەری بۆ خەڵك بەر ڕەخنەی جدی نەدرێ

بێگومان دروستكردنی فەزایەكی ئاواش بۆخۆی كۆی مەترسیەكانی كۆمەڵگای كوردی خستۆتە سەرپشت و وایكردوە تەنیا یەك فۆرمی حوكمرانی و یەك جۆر شەرعیەت برەوی هەبێ ، ئەویش شەرعیەتی دەسەڵاتی حزب و حوكمرانی بنەماڵەیە و لە دەرەوەی ئەمانیش هیچ كەسی تر مافی خاوەندارێتی گشتی نیە و نابێ بەلای ڕەخنەی جدی و دەنگ هەڵبڕین و خستنە رووی ڕاستیەكاندا بچێ وەك ئەوەی لە پرۆسەی دیموكراسیدا جێگرتوە، بەكورتی بەرجەستەبونی ئەو هەموو قەیرانە سیاسی و ئابوری و كۆمەڵایەتیەی كە تەواوی جەستەی حوكمرانی كوردی و دەسەڵاتی سیاسی كوردستانی گرتۆتەوە، بۆخۆی بەشێكە لەو شەرعیەتە و دەربڕینی هەرجۆرە ڕەخنەیەكیش دەچێتە خانەی خیانەتی نیشتمانی و دژە شۆرشەوە و دەبێ ڕووبەرووی توندترین سزابكرێتەوە.

  • 1