ئەمە بڵاوبكەوە
FaceBook  Twitter  

 

موچەو نوچە بۆتە سەردێڕی هەواڵ و راگەیاندنی حزبەكان، بۆتە مژدەی گوتەكانی دەسەڵات و بەدەنگێكی بەرز، بەرزتر لە نوچەكانی دی باس لە دابەشكردن و ریزبەندی لەشكرێك وەزارەت و دەستە دەكرێ، كە پێموانییە لەهیچ وڵاتێكی سەر ئەم گۆی زەویە ئەم ریزبەندە سەیرو سەمەرانە هەبێ، ئەوكاتەی كەباس لە پاشەكەوت دەكرا پلانێكیان نەبوو تا لەئایندەدا بەڵێنەكانی خۆیان كە لە باڵاترین دەسەڵاتی هەرێمەوە دەردەچوو جێبەجێ بكەن و كاتێكی دیاری كراویان نەبوو بیدەنە فەرمانبەران و متمانەیان لا درووست كەن، ئێستا لەجیاتی پاشەكەوت وشەی لێبڕینیان خستۆتە ناو دابەشكردنی موچەوە، ئەوەیان راستگۆیی تێدایە بەڵام بێمنەتی دەسەڵات پیشان دەدا بەرامبەر فەرمانبەران و هیچ ئومێدێكیش بۆ دانەوەی لێبڕینەكە ناهێڵێتەوەو بەهەموان دەڵێ نەئێستا پلانمان هەیە بۆ باشتر كردن و نە لەرابردووشدا پلانمان هەبووە، ئەوەش دەیسەلمێنێ كە دەسەڵاتێكی بێ بەرنامە وەك ژمێریار خەریكی حساباتی لاواز كردنی هاوڵاتیەكانیەتی و هەرگیز بیری بۆ هەر ئەگەرو روداوێك ناچێ كە لەئایندەدا روودەدەن و سبەینەیەكی روناكی نییە تا گەشەی ئابوری هەرێمەكەی لەسەر بنیات بنێ.

ئەوەی كە جێگەی نارەزایی هەموانە ئومێدی چاكسازی بوو كە بە گەرموگوڕی باسی لێوە دەكرا، لێرەدا هاوڵاتیان بیریان دەكەوێتەوە پێشتریش تەواوی فەرمانبەرانیان بە بایۆمەتری و پەنجەمۆرو بڕینی دوو موچەو بندیوارەكان سەرقاڵ كردوو دوای ئاشكرابوونیش هیچیان نەكرد، كەواتە ئەو چاكسازیەش كە ئێستا خەریكین دیزە بەدەرخۆنەی بكەن وەك بەڵێنەكانی رابردوویانەو هاوڵاتیان بە سڕكردنی بارودۆخەكەی دادەنێن و دەزانن دەسەڵات مەبەستی نیە، چونكە هەموو ئەو حزبیانەی بە پارە راگیراون تەفروتونا دەبن و ئیدی لە هەڵبژاردنەكاندا زیانێكی گەورەیان بەر دەكەوێ، بۆیە ئێستا دەركەوتووە كادیرانی حزبەكان سەرچاوەی فشارن بۆسەر حزب و ئەوەش رەنگدانەوەی ئاشكرای لەسەر حكومەت جێهێشتووە، جگە لەوەش تەواوی موچە باڵاكان هەرئەوانن و هەرگیز رێگە نادەن دەسكەوتەكانیان بكەوێتە مەترسیەوە، بۆیە قەیرانەكان تادێ شێلگیرتر دەبێت و ئەگەر بەردەوامی هەبێ دوور نییە تەپ و تۆزی روداوەكان بەتیبەت نارەزایی خەڵك هێندە زۆر بێت ببێتە گێژەڵوكەو دەسەڵات بە كادیرەكانیانەوە لولدا، ئەو كات زیانی گەورە بەر هەموان دەكەوێت و ئەوەی هەشە لەدەست دەچێ، چونكە ناكرێ و ناشێ ئەم بارودۆخە سەختە تاسەر هەندێك لێی سودمەند بن و زۆرینەش لە پەراوێزێزدا بن.

ئێستا نوچەی موچە بە دەنگێكی بەرز دەگوترێن بەڵام بەشەرمەوەو بەجۆرێك هیچ متمانەیەك لەنێوان هاوڵاتی و فەرمانبەرو حكومەتدا نەماوە.

  • 1