ئەمە بڵاوبكەوە
FaceBook  Twitter  

زیرەك كەمال / نامەیەك بۆ رێبوار سیوەیلی

لەنیوەی دووەمی نۆ هەتەكانی سەدەی بیستەمدا, لە تاراوگەوە, لەسەر زەمینی قەشەنگ و ئاڵ‌و واڵاكەی دانیماركەوە رووەو كەونارای نیشتمان گەڕایتەوە. نازانم راست بوی یان هەڵە؟ بەڵام دڵنیام لەوەی نەتدەزانی ئەو عەقڵیەت بۆگەن‌و دارزاوەی زیاتر لەسەد ساڵ بەر لەئێستا (نالی و حاجی قادر)ی كوردستان بەدەركردو ئاوارەی تونێڵە تاریكەكانی زوڵمەتی غوربەتی كردن, رۆژێك دێت لەسەر زەمینی نیشتمانەكەت, ئەو نیشتمانەی بەوێنەی پەروانە تۆ كردت بەشەمعی خۆت‌و دواتر نەورەس و قازو قوڵینگی كتێبخانەكەی تۆش دەسوتێنێت. ناڵَی و حاجی قادر (بەقوربانی تۆزی رێگەتم و گوتم بەبەختی خەواڵو) رایەڵەی هەست و روحی پچڕاویان بەنیشتمانەوە بەستنەوە, بەڵام تۆ بەكردەوە بەوێنەی منداڵێكی دایك مردوو باوە ژن راوی نابێت, ئاوا مشتت كردە (پەری دەریای) دانیمارك و رووەو وڵاتێك كەخاكی ژێر پێی بۆ سورمە دەشێت و لای تۆ شیرینتر بوو لەشامی شەكر, هاتیەوە بەوێنەیی دایك باوەشت بەنیشتماندا كرد, گوتم لاڵ بم بۆت خاتوونە كچ, ئەوە كێ ئاوا كەزی و بسكی بەئازادی راپەڕین خەنەكراو, لەخوێن هەڵكێشاوە, هاتیەوەو گوتت ناكرێ و نابێت, وڵاتەكەم تۆ كەئەو سەرت كێلی قەبری مەم و زین و ئەوم سەری كێلی قەبری شیرین و فەرهاد بێت, كەچی من لێت دوو بم, كەتۆ هاتییەوە, نیشتمان بۆنی هەموو شتێكی لێ دەهات, تەنها بۆنی ژیانت نەبێت, براكان تازە بەوێنەی كۆمەڵێك جەنگاوەر بەدەستی بەتاڵ لەشەڕگەی دۆڕان گەڕابوونەوە, نرخی فیشەكێك گرانتربوو لەدیوانی شیعرەكانی ناڵی و گۆران, حوكمڕانی و قەڵەم رەوەی هەر هێزێكی سیاسی بەند بوو بەئەندازەی گەیشتنی تفەنگ هاوێژی خۆی, نیشتمان ببووە گەراجی سەفەری لاوان رووەو هەندەران و چارەنووسی نادیار, كەتۆ لە غەریبی گەڕایتەوە تێكڕای خەڵك پیرو لاو بیریان لەبەجێهێشتنی كوردستان دەكرد, نابۆئەوەی بگەنە بەهەشتی ئەوروپا, بەڵكو بۆئەوەی لەدۆزەخی وڵات رزگاریان بێت. هەرزوو بەگەڕانەوەت بە وتارو كتێبە دانسقەكانت دنیای رۆشنبیریی ئێمەت ئاوەدانتر كردەوەو رەگە سڕبووەكانی ژیانی ئێمەت گەرمكردەوە چییە ئەو هەموو رق و كینەیەی روە مەرگی فەیسبوك ,كەخواردنەوەی جامێك ژەهری پێ ئاسانترە لەقبوڵكردنی رای جیاواز.

زیاتر لەدەساڵ بەر لەئێستا نووسەرێكی ئەم هەرێمە نووسیبووی: خودایە چی لێهات ساتە ئاڵ و واڵاكان و خۆشیەكانی ژیان. مەملەكەتی تۆ بۆچی وایلێهات, لەپاش (محمدالمستەفا) قاعیدەو ئوسامە بن لادن, لەپاش عیسای مەسیح ئەمریكاو پاش حەزرەتی موسا زایۆنیزم و شارۆن و لەپاش شێخ سەعیدی پیران (جندالاسلام) پەیدابوون و بوونە بەمیراتگر. منیش دەلێم دوای (گۆران و شێركۆ بێكەس) فەیس بووك بەجێماوە كەتیایدا خەڵكانێك بەوێنەی خێڵە دواكەوتووەكانی (ئەمازۆن) لەسەر لاشەی خۆیان هەڵدەپەڕن, نیگەران مەبە برادەر, ئەوانەی وێنەی كۆمەڵایەتی و رۆشنبیریی تۆ دەشێوێنن و پەلاماری مانگی باڵای د. كەمال مەزهەرو شێركۆ بێكەس دەدەن وا باشە بچنە دیار ئاوێنەو سەیرێكی رووخساری خۆیان بكەن.

 

  • 1