ئەمە بڵاوبكەوە
FaceBook  Twitter  

زیرەك كەمال / درەنگ هاتی سەردەمی موعجیزە بەسەرچوو

دوێنێ‌ سێشەممە 8-9-2015 بینمەوە, خۆی بوو, رێك خۆی بوو, هەر ئەو برادەرەی من دوێنێ لەناوجەرگەی شاردا بەچاكەت‌و پانتۆرو بۆینباغەوە بینیم, رێك هەمان كەس بوو كەمانگی (3)ی 1997 لەدامێنی لوتكە شاخی (كەپكی حەمەد ئاغا)ی خۆشناوەتی خۆمان گوتەنی بینیم, خۆی لەمەخزنە كلاشینكۆفدا رەق كردبوو, بەبێ سڵاوو چاك و چۆنی بەزمانی رەخنەو گلەیی نا, بەڵكو بەزمانی رقێكی ئەستوورە پێی گوتم كاك زیرەك كەمال بۆچی حزبی شیوعی لەشەڕی ناوخۆدا بێ هەڵوێستە؟! منیش پێم گوت تۆئاگاداری سیاسەتی حزبی شیوعیت؟ گوتی من پێشمەرگەم‌و كارم بەسەر رۆژنامەو مۆژنامەوە نییە!!, بەڵام دەبوایە لەشەڕی ناوخۆدا هەڵوێستێكی نیشتمانیان هەبێت, گوتم تۆ سەراپای جەستەت مەخزەن‌و نارنجۆك و كەرەستەی شەڕەو خەریكی رووەو بەرزاییەكانی زینەتیرو كەپكی حەمەد ئاغا, سەر زەمینی شەڕو پێكدادانەكان لەنێوان براكاندا دەرۆیت, دەخۆت ئەو چەكە دابنێ‌و بەشداری ئەو شەڕە مەكەو نەفرەتی لێ بكە, ئینجا بەو جۆرە لەسەر حزبی شیوعی قسە بكە, گوتی: ئاخر لایەنی بەرامبەر زوڵم لەلایەنەكەی من دەكەن‌و بەفیت‌و قسەی ئەم و ئەو بەرنامەی لەناوبردنی لایەنەكەی منیان داڕٍشتووە, منیش ناچارم بەرگری لە رێبازەكەی خۆم بكەم. منیش پێم گوت كەواتە مەبەستی تۆ لەبێ هەڵوێستی حزبی شیوعی لەوەوە سەرچاوەی گرتووە, كەحزبەكەم لەو شەڕە نەگریسەدا پاڵپشتی ئێوە ناكات لەدژی بەرامبەر؟ گوتی: بەڵێ, ئێمە لەسەر هەقین‌و ئەوان كۆمەڵێك گورك‌و بەرازو ئەڵقە لەگوێی ئەم و ئەون, پێم گوت: حزبی شیوعی, حزبی هەڵوێست‌و بەرگری كردنە لەگەل و نیشتمان, ئاڵا هەڵگری دیموكراسیەت‌و ئاشتی و تەبایی‌و بەیەكەوە ژیانە, هەرگیز داوای هەڵوێستی لەو شێوەیە لەئێمە مەكە ئەو برادەرەی كەبەو پەڕی بڕاوو باوەڕەوە رووەو سەنگەری كوشتن‌و رشتنی خوێنی براكەی دەڕۆیشت, وەكو چۆن تۆبە كارو سۆفی رووەو خەڵوەت دەڕوات ئەویش ئاوا بەو پەڕی توورەیە‌وە بێ ماڵئاوایی بەوێنەی جنۆكە لەبەر چاوم ون بوو, بەڵێ هەر هەمان برادەری تینوو بە خوێنی شەڕی ناوخۆ سێ شەممە 8-9-2015 لەبەردەمی یەكێك لە باڵە خانە بەرزەكانی شار بینیم وسەرلەنوێ بەهەمان زمان‌و رەفتار گوتی: دەبێت!! نەیگوت پێویستە بەڵكو گوتی: (دەبێت) حزبی شیوعی هەڵوێستی هەبێت‌و بەپرسی یاساو ململانێیەكانی ناو پەرلەمان پشتگیریی ئێمە بكات, چونكە لەو پرسەدا دووسەنگەر هەیە, سەنگەری ئێمە داكۆكیكردنە لەگەڵ‌و نیشتمان‌و یاساو كوردایەتی, سەنگەری بەرامبەریشمان خیانەت‌و نیشتمان فرۆشییە.. منیش پێم گوت: ئەوەی ئێوە هەمووتان دەیكەن مل بادان‌و تێك شكاندن‌و سڕینەوەی یەكترییە, بۆیە تۆ درەنگ هاتی چونكە سەردەمی موعجیزە بەسەر چووە.

  • 1