ئەم هەواڵە بڵاوبكەوە
FaceBook  Twitter  

(1)

شیشیلە لە شان گەنجێكی بەنگلادیشییە چەند ساڵێك بەر لە ئێستا خەمی ژیان‌و ئازاری نەبوونی گەیاندییە كوردستان، كەس نەیدەزانی ئەو گەنجە دەرچووی زانكۆیە‌و نووسەر‌و شاعیرێكی بەتواناشە، بۆیە ئەو چەند ساڵەی لە هەرێمی كوردستان بوو وێڕای پەیداكردنی بڕێك پارە، هەروەها بە وێنەی كۆمەڵناسێك‌و گەنجێكی بە سەلیقە‌و وردبین بەشێكی زۆری بیرەوەرییەكانی ئەو چەند ساڵەی وڵاتەكەمانی یاداشتكردووە‌و وەكو ستونێكی رۆژنامەوانی لە رۆژنامەیەكی وڵاتەكەیدا بڵاوی دەكاتەوە. (شیشیلە لە شان) نووسیویەتی: خەڵكی كوردستان تا بڵێی بەڕێز‌و غەریب دۆستن، لەو چەند ساڵەی لەناویان بووم هەستم نەكرد بیانیم، بەڵام كۆمەڵێك ئاكار‌و هەڵس‌و كەوت‌و داب‌و نەریت لە ژیانی كوردەكان هەبووە لێی تێنەدەگەیشتم، بۆ نموونە لە دیوەخانی پیاوێكی دەوڵەمەند چایچی بووم كە چایەكەم دەخستە بەردەمیان لە گەرمیا هەڵمی لێ‌ هەڵنەستابا توڕە دەبوون، بەڵام چایەكەشیان دادەنا تا سارد نەبووبایەوە نەیاندەخواردەوە. كوردستان پڕە لە مزگەوت لە نێوان دوو مزگەوت مزگەوتێكی تر هەیە، سەریان بچیت نوێژیان ناچیت، بەڵام هەر ئەو خەڵكە سەریشیان بچیت شەڕیان ناچیت، لەسەر فوول لایتی ئۆتۆمبێل یەكتری دەكوژن، بكوژەكەش وەكو بەرزەكی بانان بۆی دەردەچێت، یان بە سوڵحی عەشایەری‌و دانی بڕێك پارە بە باوكی كوژراوەكە كێشەكە چارەسەر دەكات‌و دواتر بكوژ دەچێتە حەج یان عەمرە. هەر ئەو خەڵكە سروشتێكی سەیریان هەیە هەموویان سیاسین‌و چاودێری سیاسین، هەموویان قسە دەكەن‌و تاك‌و تەراشی نەبێت گوێگریان نیە. هەر ئەو خەڵكە چی قووتووی بیبسی‌و پاشماوەی خواردن هەیە لە جامی ئۆتۆمبێلەكانیان فڕێی دەدەنە سەر شەقام. كە دەوڵەمەندبوون یان كەسێك دەكوژن یان ژنی دووەم دەهێنن‌و یان مزگەوتێك دروست دەكەن، زۆربەی منداڵەكانیان ناویان عەرەبییە، لەناو جەرگەی هەولێری پایتەختەكەیان ناوی یەكێك لە مزگەوتە گەورەكانیان بەناوی عەرەبێكی دوژمنی خۆیان كردووە، لە دەروازەی شاری سلێمانیش كە پایتەختی رۆشنبیری وڵاتەكەیانە تۆپێكیان وەكو چەكێكی قورس داناوە، هەر لەو وڵاتە گەندەڵی‌و خیانەت ئاساییە، بەڵام نوێژنەكردن لایان عەیبەیە، لە هەمووی سەیرتر بەشێكی خەڵكی كوردستان بۆ یەكتری ماچكردن دەچنە تاریكی‌و لە رووناكیش یەكتری دەكوژن.

  • 1