ئەمە بڵاوبكەوە
FaceBook  Twitter  

 زیرەك کەمال / کۆڕۆناو پرسیاری بێ وەڵام

نووسینی : زیرەك کەمال 

دوای جەنگی جیهانی یەکەم ودووەم پرسیارێک لای گەلانی جیهان بەگشتی و ئەوروپا بەتایبەتی دروست بوو ، ئەویش ئەوەبوو کەبۆچی تیئۆرو تێزە فەلسەفیەکانی مارکس و ئیمانۆیل کانت و جان جاک ڕۆسۆ ..... ،بۆچی سەرجەم دەستکەوتە زانستی ومرۆیی و ڕێبازە فیکری و هونەری و شاکارە ئەدەبیەکانی مۆدێرنە نەیتوانی ببێتە بەربەستێک لەبەردەم ئەو دوو جەنگە جیهانیە کەدروێنەی ڕۆحی دەیان ملیۆن ئینسانی کردو خەریک بوو جیهانی مرۆڤ بکاتە کاولە ئاشێکی ئاو لئ بڕاو ، بەڵئ دوای بڵاو بوونەوەی ڤایرۆسی کۆڕۆناش ، ئێستا گەلانی ئەوروپا پرسیار لەسەرۆک و سەرکردەو حکومەتەکانیان دەکەن و دەڵێن ئێمە نیوەی داهات و سەرمایەی خۆمان کەبەڕەنجی شانی خۆمان پەیدای دەکەین وەکو باج دەیدەینە ئێوە ، کەچی ئێوە ئێمەتان لەفایرۆسی کۆڕۆنا نەپاراست ، بێباکانەو خەم ساردانە پێتان گووتین بڕۆنەوە ماڵەوەو خۆتان بۆ ماڵئاوایی کردن لە مەرگی ئازیزانتان ئامادەبکەن ، هەڵبەت پرسیاری گەلانی ئەوروپا لەسەرۆک وحکومەتەکانیان زۆر ڕاستەو قسەو توێژینەوەی زۆریش هەڵدەگرێت ، بۆیەش لەستونێکی ئاوادا من ناتوانم فاکتەرەکانی پشت دروست بوونی ئەوپرسیارەو ساردی وکەمتەرخەمی ودەستەپاچە بوونی حکومەتەکانی ئەوروپا بەرامبەر ڤایرۆسی کۆڕۆنا بەشێوەیەکی زانستی و مەعریفی ورد بخەمە ڕوو ، چونکە کارێکی لەم شێوەیە وزەو توانست و توێژینەی فیکری وفەلسەفی ، زانستی وردی دەوێت و هەڵیدەگرم بۆداهاتوو ، بەڵام وای دەبینم کەوەڵام دانەوەی پرسیاری لەم شێوەیە بو ڕێبەرانی گەلانی ئەوروپاو دنیا قورسەو بگرە شەرمەزارکارانەشە ،وایشی دابینم کە ڤایرۆسی کۆڕۆنا شکۆو هەیبەتی دەوڵەت و هەموو ئەو حکومەت و سیستەمە سیاسیانە ی شکاند کەبەناوو ناسنامەی لیبرالیزمی دیموکراسی و لیبرالیزمی نوئ و سۆشیال دیموکراسی حوکمڕانی وڵاتەکانیان دەکرد، دەشزانم دوای کۆنتڕۆڵ کردنی پەتای کۆڕۆنا گەلانی جیهان بەگشتی وئەوروپا بەتایبەتی ئاوا دانانیشن و بگرە سەرکردەو ڕێبەرەکانیان ڕاکێشی بەردەم دادگای مێژوو دەکەن ، هەروەها دڵنیام گەلان لەحکومەتەکانیان دەپرسن ئێوە بەشەرعیەتی دەنگەکانی ئێمە جڵەوی حوکمڕانیتان وەردەگرت و بەڕەنج وداهات وباج و شان وبازووی ئێمە پایەی سەرمایەداری خۆتان بەهێز کرد، ئێوە چەندین ناوو ناسناوو مۆرکی فیکری وفەلسەفیتان لە خۆنا ، بەڵام لەسەر زەمینی واقیعداو لەواری کرداریدا ئێوە پشتتان کردە هەموو بەها مرۆیی وئەخلاق وکۆمەڵایەتی وکەلتوریەکان و پارەو سەرمایەتان کردە خواو ئاینێکی نوئ و کەسایەتی وشکۆی مرۆڤتان لەسەربنەمای ئەوسەرمایە دیاری کرد کەهەیەتی ،نەک لەسەربنەمایەی کەسەدساڵ پێش ئێستا مارکس گووتی مرۆڤ گەورەترین سەرمایەیە. 

تێبینی ،نووسین لەسەردەمی پەتای کۆڕۆنا

  • 1