ئەمە بڵاوبكەوە
FaceBook  Twitter  

 فەرەنسا.. نوێنەرى هەرێم پرسى کۆرۆنا لەگەڵ نوێنەرایەتى حزب تاوتوێ دەکات

رێگای کوردستان

نوێنەرایەتى حکومەتى هەرێمى کوردستان لەفەرەنسا، پرسى بڵاوبوونەوەى ڤایرۆسی کۆرۆناو پەیوەندییە سیاسییەکانى حزبە کوردستانییەکانى لەگەڵ نوێنەرى حزبمان (حزبی شیوعی کوردستان) تاوتوێ دەکات.

لاوکۆ عاڵلایی، نوێنەرەکەى حزبی شیوعی کوردستان لەفەرەنسا  لەلێدوانێکیدا بە(رێگاى کوردستان) رایگەیاند " پەیوەندییەکەى عەلى دۆڵەمەری، نوێنەرى حکومەتى هەرێم لەپاریس، تایبەت بوون بەپرسى کوردانى فەرەنساو، چۆنیەتى خۆپارێزی کردنیان لەمەترسییەکانى ڤایرۆسی کۆرۆنا لەو وڵاتە".

ئاماژەى بەوەشداوە " بەشێکى ئەو پەیوەندییەى لەگەڵ نوێنەرى هەرێم کە لەرێگەى ڤیدیۆ کۆنفراسەوە بووە، پرسی تەنگەژەکانى هەرێم کراوە، کەبەهۆى قەیرانەکانەوە تێی کەوتووە".

عاڵلایی باسى لەوەکرد " گفتۆگۆکان لەسەر پرسى کێشەى هاوڵاتیان بووە، بەتایبەت لەو ڕەوشەى ئێستا بەهۆى قەدەغەکردنى هاتووچۆ و، بڵاوبوونەوەى پەتای کۆرۆناوە".

گووتیشى " هاوکات بەبۆنەى ساڵیادی دامەزراندنى حزبی شیوعی، کە کۆتایی مانگی ئادارى رابردوو، نوێنەرى هەرێمى کوردستان لەپاریس بروسکەیەکى پیرۆزبایی خۆى ئاراستە کرد".

نوێنەرەکەى حزبی شیوعی کوردستان لەفەرەنسا جەختى لەوە کردەوە، کە هەردوولایەنمان کۆک بووین لەیەکگرتووییمان لەبەرەنگاربوونەوەى ئەو ڤایرۆسە چ لەرێگەى خۆپارێزی و چ لەرێگەى هۆشیاریی تەندروستى.

لەبەشێکى دیکەى لێدوانەى عاڵلایی دووپاتکردنەوە بووە لەسەر ئەوەى پێشکەشکردنى هەر جۆرە هاریکارییەک بێت لەسەر بنەمای تاکەکان و، یاخود لەرێگەى حزبە کوردستانیەکانى هەرێم بێت.

ئەمەش لەکاتێکدایە، بەهۆى بڵاوبوونەوەى پەتاى کۆرۆناوە، کە زۆربەى وڵاتانى جیهانى گرتۆتەوە، بەتایبەت لەهەرێمى کوردستان و، فەرەنسا کەیەکێکە لەو وڵاتانەى بەشێکى زۆرى ڕەوەندی کوردی تێدایە، پرۆسەى قەدەغە کردنى هاتووچۆ لە ١٦ ئادارەوە، بەبڕیارى حکومەتى پاریس ڕاگەینراوەو، بڕیاریشە تا ١٥ نیسان بەردەوام بێت.

ئەمەش وایکردووە زۆربەى چالاکییە نەتەوەییەکانى رەوەندی کوردی لەپارێس بەتایبەت لەسازدانى ئاهەنگی نەورۆزەوە هەڵبوەشێنرێنەوە کە ساڵانە بەبەشداری حزبمان و، زۆربەى حزبە کوردستانیەکانی هەر چوارپارچە بەرێوەدەچوون.

هەر تایبەت بەو پرسە، نوێنەرى حزبمان لەو ماوەیەى قەدەغەکردنى هاتووچۆ ڕاگەینراوە لەرێگەى پەیوەندییە تەلەفۆنییەکان، پەیوەندییەکى فراوان لەگەڵ زۆربەى خێزانە کوردەکانی پاریس و سەرتاسەرى فەرەنسا کراوەو، داواى پابەندبوون بەرێنماییە تەندروستیەکان و، خۆپارێزییان لێکراوە.

چالاکی حزبی