ئەمە بڵاوبكەوە
FaceBook  Twitter  

 

رێگای كوردستان

مەكتەبی سیاسی  حزبی شیوعی كوردستان، بەبۆنەی (74) مین ساڵڕۆژی دامەزراندنی  پارتی دیموكراتی كوردستان پەیامێكی پیرۆزباییان ئاراستە دەكات.

دەقی پیرۆزباییەكە:

بەڕێز/ جەنابی سەرۆك مەسعود بارزانی

بەڕێزان/ ئەندامانی مەكتەبی سیاسی و سەركردایەتی 

پارتی دیموكراتی كوردستان

سڵاورێز

بەبۆنەی (74) مین ساڵڕۆژی دامەزراندنی پارتە تێكۆشەرەكەتان پارتی دیموكراتی كوردستان، بەناوی مەكتەبی سیاسی و سەركردایەتی حزبی شیوعی كوردستان، پیرۆزبایی گەرمی ئەو یادەتان لێدەكەین و هیوای سەركەوتن و سەرفرازیتان بۆ دەخوازین.

بەڕێزان.. لەكاتێكدا كە یادی ساڵرۆژی دامەزراندنی پارتی دیموكراتی كوردستان دەكەنەوە، كوردستان و ناوچەكەو جیهان بە بارودۆخێكی زۆر هەستیارو مەترسیداردا دەڕوات، لەلایەك ڤایرۆسی كۆڕۆنا كە بووتە مەترسیەكی گەورە بۆ سەر هەموو مرۆڤایەتی و لەلایەكی تر بارودۆخی سیاسی و ئابوری كە كاریگەری سەختی نێگەتیفی كردۆتە سەر بارودۆخی ژیان و گوزەرانی خەڵكی كوردستان، سەرەڕای بۆردومانكردنی رۆژانەی ناوچە سنوریەكانمان لەلایەن دەوڵەتە دراوسێكان كە خەڵكی سڤیل دەبنە قوربانی و ناچار دەكرێن كە گوند و دێهاتەكان و رەزو باخەكانیان جێبهێڵن، ئەمەش كاریگەری راستەوخۆی كردۆتە سەر بژێوی ژیانیان .

بەڕێزان... لەم قۆناغەدا پێویستە لایەنەكان كێشەو ناكۆكیەكانیان چارەسەر بكەن و بە یەكگرتوویی و یەكڕیزی رووبەڕووی كێشەو قەیرانەكان ببنەوە، لە پێناو باشتركردنی ژیان و گوزەرانی خەڵكی كوردستان و پاراستنی قەوارەی هەرێمی كوردستان.

لەم بۆنەیەدا جارێكی تر جەخت لەسەر پتەوكردنی پەیوەندی دێرینەی هەردوو حزب دەكەینەوە.

دووبارە پیرۆزباییمان قبوڵ بفەرموون.

لەگەڵ رێزماندا

 مەكتەبی سیاسی 

حزبی شیوعی كوردستان

2020/8/15

 

چالاکی حزبی