ئەمە بڵاوبكەوە
FaceBook  Twitter  

 پەرتۆکێن (فەرهاد عەونى) ل نڤیسکارو خوەندەڤانێن دەڤەرا بەهدینان دگەرن ..!

جەمال چەلکى

 خەمێن سەرەکى یێن نڤیسکاران گەلەک یێن مەزن و گرانن، نڤیسکارێن خوەدى کەد د وارێن بەرهەڤکرن و چاپکرنا پەرتۆکێن جودا جودا دە، ناخوازن پەرتۆکێن وان پشتى وەشانێ د ناڤا کوگەه و پەرتۆکخانان دە نڤستى بمینن و ژ خوەندەڤانان یێن یاخیبن، ئەگەر تاقەت و دەرفەتێن خوەندەڤان و رەۆشەنبیران نەبە ل پەرتۆکێن وان یێن نوى بگەرن، خوەدیێن پەرتۆکان وى چاخى نەچارن ل رەۆشەنبیر و خوەندەڤانان بگەرن، ئەڤ چەندە هند نە پرۆسەیەکا ئاسانە، چونکە مەرج نینە هەموو نڤیسکارەکێ شیانێن پەیرەۆکرنا هەمان شێوازێ سەرەدەریێ دگەل دورهێلى هەبیت.

نڤیسکارێن خوەدى هزر کەسێن ب راهاڤێژن د بیاڤێن ئافراندنێ دە، ئەو هزر و بیروکێن د هشێن وان دە ب باوەریبوون ڤە جێگیر بووى، پشتى ماندیبوونەکا بێ سنور لسەر لاپەرێن پەرتۆکان دهێنە دیزاینکرن، ئارمانجێن وان تنێ ئەون هزرێن وان بگەهنە هەر تاکەکێ خوەندەڤان د جڤاکێ دە، واتە هەر ژ دەستپێکێ هەتا داویێ، نڤیسکار خەمێ ژ خواندنا پرسێن چارەنڤیساز یێن جڤاکێ دخوت .. پاشان خەما چاوانییا ئامادەکرن و بەرهەڤکرنا ئەنجامێن ئەوێ خواندنێ د چوارچوفێن بەرکێن پەرتۆکەکێ دە دخوت.. لدویماهیێ ژى خەمێ ل لێگەرینا خوەندەڤانى دخوت ژبونا هندێ هزرێن خوە لسەر سفرا خوەندەڤانى بکەتە مێهڤان.

نڤیسکارێ هەرى هێژا ( فەرهاد عەونى) مینا ئێک ژ ڤان نڤیسکاران دخوازیت ل هەر درێ پەرتۆکێن وى هەبن، کەدا وى یا ب بەرهەم بیت، ب هەر ئاوایێ هەى مفا ژ هزرێن وى بهێتە دیتن، ل هەموو دەڤەران وى دڤى وارى دە خوە تەڤگەر کر، هەلبەت دەڤەرا بەهدینان ژى ژ ئەڤێ چەندێ بێبەهر نەبوو، ئەو پەرتۆکێن دڤێ مەراسیمێ دا هاتیە نمایشکرن ئەڤێن خوارێ بوون: 1) لەگەل رووداوەکان.  2) سیه و شەش نامە و چەند کەسایەتییەکى دیوانى من.  3) لە هەگبەم دا. هەر سێ پەرتۆک ژى یێن پر ببوونە ژ پێزانین و شرۆڤەیێن بالکێش، بێگوومان دێ گەلەک یێن سودبەخشبن ژبوى خوەندەڤانان.

ئێڤاریا رۆژا شەمبى رێکەفتى (29/02/2020) ێ، پەرتۆکخانا بەدرخانیان چالاکیەکا قەشەنگ ئورگانیزەکر، ب ئارمانجا گێرانا مەراسیمێن ئیمزاکرنا سێ پەرتۆکێن هەرى گرنگ یێن نڤیسکار (فەرهاد عەونى) هەژى گوتنێ یە،کو هەژمارەکا باش یا رەوشەنبیر و نڤیسکارێن دهۆکێ د چالاکیێ دا بەرهەڤ و ئامادەبوون، د رۆنشتنەکا چلو پێنج چرکەیى دە، فەرهاد عەونى ب کورتى هند لاپەرێن سەربۆرا خوە ئانین زمان، پاشان ئامادەبوویان پرسیارێن خوە ئاراستەى خوەدیێ پەرتۆکان کرن و ب ئاوایەکێ ڤەکرى تێبینى و نێرینێن خوە ئانین زمان و بەرسڤا پرسێن وان ژى ب زەلالى هاتنە داین.

ئەز ژى هەم وەکە نڤیسکارەک .. هەم ژى وەکە نوینەرێ پەیوەندى یێن کومیتا پارێزگەها دهۆک یا حزبا شیوعى یا کوردستانى ئامادەى چالاکیێ بووم، تشتێ سەرنجام من د چالاکیێ دا بو ئالیێ خوە راکێشاى، ئێک ژ گوتنێن نڤیسکارى بوونە، دەما ب راشکاوى و ب ئاوایەکێ روهن گوتى: ئەم بلا خوە ژ پەسندکرنێ دوربێخین و زێدە نێزى پرۆسەیا رەخنێ ببین،ئەڤ گوتنە ژبووى من گەلەک یا گرنگ بوویە، دیسان ژى پێتڤییەکا هەرى فەرە ژبوى قووناغا ئیرۆ.

لگور نرخاندنێن من، بەرژوەندێن بەرتەسکێن کەسوکى، چاڤێن رەۆشەنبیر و نڤیسکاران یێن تاریکرى، نکارن زێدە خوە نێزى بیاڤێن رەخنێ بکەن، هەلبەت رەخنە ئێک ژ ستونێن بنگەهین یێن پێشڤەچوونا هەر جڤاکەکێ یە، ئەڤ پرسە گەرەکە بهێتە ئەکتیفکرن، رەخنا ئاڤاکەر ب شێوازەکێ موبەرمەج چاڤدێریا رەۆشا جڤاکێ یا هەمە ئالى بکەت، ئەم باش وێ چەندێ دزانین، کو تەخەکا مەزن یا فێرى هندێ بووى، ب بەژن و بالا کەسان بازارێن خوە گەرم دکەن و دکارن سەرکەڤن ژى ..! ژبوى هندێ رێ ل ئەسیرێن بەرژوەندییان بهێتەگرتن، پێتڤیاتیا قووناغێ ب رەخنەگرێن خوەدى ئیرادە هەیە، کو ب جەسارەت خوە د گورەپانێ دە ئیفادەکەن، بێ ترس و دودلى تشتان وەکە خوە هەلسەنگینن.

دیاردا دابەشکرنا پەرتۆکان ب رەنگێ (Free) یان پرۆسا ئیمزاکرنا پەرتۆکان ب مەبەستێن فرۆتنەکا بزور د نیڤبەرا دو کڤانان دە (بازرگانیکرن) ئەڤان هەر دوو شێوازان گەلەک ئالیێن خوە یێن نیگەتیف هەنە، ئێک ژ زیانێن ئەڤان جورە دیاردان ئەوە ئێدى خەلک بەرێ خوە نادەتە پەرتۆکخانان بۆ کرینا پەرتۆکان، لەوما ژى کارێن پەرتۆکخانان گەلەک یێن لاواز بووى، دەرگەهێن وان هێدى هێدى یێن دهێنە گرتن، رێکا هەرى دروست ئەوە دەما پەرتۆک دهێنە چابکرن ل پەرتوکخانان بهێنە بەلاڤکرن و ب نرخەکا گونجایى بهێنە فروتن، ب ئەڤێ چەندێ هەم نڤیسەر دگەهیتە مافێن خوە هەم ژى خوەدیێن پەرتۆکخانان دکارن سودمەندبن.

تشتەکى نە یێ نورمال ئەوە، د نرخاندنێن خوەدا ئەم وەسا هزرکەین، خوەندەڤان هەموو د ناڤەند و سەنتەرێن پارێزگەهان دا هاتبنە خرڤەکرن و دەوروبەران چ خوەندەڤانێن خوە نەبن، د ناڤەرۆکا خوە دا ئەڤە خواندنەکا هەرى شاشە، بێگومان ل دەوروبەران ژى خوەندەڤان هەنە، خوەندەڤانێن دەوروبەران زێدەتر هەر جهەکێ دن ئەکتیف و چالاکترن، لێ ژبلى سەنتەران چ جهەکێ دن پەرتوکخانە نینە، ئەگەر پەرتۆکخانە هەبانە ل دەوروبەران و  ب ئاوایەکێ رێکوپێک بەرهەمێن نڤیسکارێن ناڤخوەیى گەهشتبانە جەم وان ل (گوندى، ئوردوگاى، ناحیێ، قەزایێ) ئەز باوەرم دا زێدەتر نڤیسکارێن ناڤخوەیى دناڤا جڤاکى      َ دا هێنە نیاسین و هەر چنەبیت دا تێچوویێ پەرتۆکێن وان بۆ ڤەگەریت. 

لداویێ ژى دخوازم بێژم ماموستا (فەرهاد عەونى) تو مرۆڤەکێ هێژاى .. کەسەکێ خوەدى شیانى .. نڤیسکار و میدیا کارەکێ بەرکەفتى، شوون دەستنێن تە د بیاڤێن نڤیسین و رۆژنامەڤانیێ دە یێن دیار و خوەیانە، کەس نکاریت ئینکارکەتـ، د رۆنشتنا ئیمزاکرنا وان هەر سێ پەرتوکان دا یا بەرچاڤ بۆ کو تە سەنگ و گرانیا خوە لجەم نڤیسەران هەیە.