ئەمە بڵاوبكەوە
FaceBook  Twitter  

فەرماندەی ئۆپەراسیۆنەکانی بەسرە رایگەیاند،  بەمەبەستی سەپاندنی یاسا و پاراستنی خۆپیشاندەرانی ئاشتیخواز داوا لە سوپای عێراق دەکەن بێتە سەر شەقام.

قاسم نزال، فەرماندەی ئۆپەراسیۆنەکانی بەسرە لە راگەیەنراوێکدا ئاماژەی  بەوەشکردوە،  بە ئامانجی پاراستنی خۆپیشاندەران و پاراستنی شوێنە گشتییەکان لە دەستی ئەو کەسانەی هەوڵی تێکدانی ناڕەزاییەکان و ئەنجامدانی کاری تێکدەرانە دەکەن، داوایان لە یەکەکانی سوپا کردوە بێنە سەر شەقام.

 ئەوەش هاتوە، لەگەڵ خۆپیشاندەران چەندینجار داوایان کردوە کە لە شوێنی دیاریکراو بۆ دەربڕینی ناڕەزاییەکان (گۆرەپانەکانی خۆپیشاندان) نەچنەدەرەوە، لە ئەگەری پابەندنەبونیش بەو داواکارییەوە لەلایەن کەسانی دەرەوەی یاسا بە ئامانج دەگیرێن.

23ی ئەم مانگەش خۆپیشاندەرانی بەسرە لە راگەیەنراوێکدا ئاماژەیان بەوەکرد، ماوه‌ی 48 كاتژمێر بۆ پارێزگاری به‌سرە دیاریده‌كه‌ن كه‌ له‌كاتژمێر 12:00ی پاشنیوه‌ڕۆی رۆژی پێنجشه‌ممه‌وه‌ دەستیپێکردوە، ئه‌گه‌ر داواكاریه‌كانیشیان جێبه‌جێنه‌كات، ئه‌وا "هه‌مو بژارده‌یه‌ك له‌به‌رده‌میاندا كراوه‌ ده‌بێت".

هه‌ر له‌و گرته‌ ڤیدیۆییه‌دا، خۆپیشانده‌ران مه‌رجی ئه‌وه‌یان بۆ ئه‌سعه‌د عیدانی داناوه‌، كه‌ بكوژی سه‌رجه‌م رۆژنامه‌نوس و چالاكوانان راده‌ستی دادگا بكات، ئه‌گه‌رنا ده‌ستله‌كاربكێشێته‌وه‌.

له‌مانگی ئۆکتۆبەری ساڵی رابردوه‌وه‌ خۆپیشاندانه‌كانی به‌غداو پارێزگاكانی خواروی عێراق ده‌ستیپێكردوه‌ و به‌گوێره‌ی ئاماره‌ فه‌رمیه‌كانیش، تا ئێستا زیاتر له‌ 600 خۆپیشانده‌ر كوژراون و زیاتر له‌ 23 هه‌زار كه‌سی دیكه‌ش برینداربون.