ئەمە بڵاوبكەوە
FaceBook  Twitter  

سیاسەتی حكومەتی هەرێمی كوردستان لەسەر بنەمای زۆرترین قازانج بۆ بازرگانەكان كار دەكات

ئاودێر

فرۆشتنی كەرتە گشتییەكان لەلایەن حكومەتی هەرێمی كوردستانەوە ناڕەزایەتییەكی زۆری لای هاووڵاتیان دروست كردووە و ئابووریناسێكیش هۆشداری دەدات لە خراپتربوونی ڕەوشی ژیانی هاووڵاتیان و ئاماژە بۆ ئەوە دەكات ئەو كەرتانەی كە زۆرترین قازانجیان هەیە بەتایبەت دەكرێن، ئەندامێكی پەرلەمانی كوردستانیش رونی دەكاتەوە كە تێكەڵاوییكەی زۆر لەنێوان كەرتی تایبەت و گشتیدا هەیە.

لەماوەی 15 ساڵی ڕابردوودا حكومەتی هەرێمی كوردستان بە پلان كاری بۆ فرۆشتنی كەرتە گشتییەكان یاخود لاوازكردنیان كردووە و نزیكەی نیوەی كۆی كەرتەكانی داوەتە كۆمپانیاكانی سەر بە حزبەكان، یاخود كەسانی نزیك لە حزبەكان، بۆ نموونە بازرگانی داودەرمان و جگەرە، كەرتی خانوبەرە و سكیوریتی، ئاو، كارەبا، پەروەردە و تەندروستی.

شەماڵ زاهیر، ئابووریناس باس لەوە دەكات كە حكومەتی هەرێمی كوردستان سیستەمێكی دیاریكراوی تایبەت بە خۆی هەیە كە لەسەر بنەمای قازانجی كەسانی حزبی بەڕێوە دەچێت، ئاماژە بۆ ئەوەش دەكات ئەم بەتایبەتیكردنەی كەرتە گشتییەكان كە چەند ساڵێكە بەبەردەوامی كاری لەسەر دەكرێت لەسەر بنەمای قازانج بۆ سەرمایەداران، یاخود كەسانی سیاسی و حزبی كار دەكات. "حكومەت بە پلان، كەرتە گشتییەكان لاواز دەكات، بۆ نموونە خزمەتگوزاری ئاو و كارەبا پێشكەش ناكات و هاووڵات ناچار دەكات چاوەڕێی مۆلیدە بن، یاخود خۆیان ئاو بكڕن، پێداویستییەكنی كەرتی پەروەردە و تەندروستی دابین ناكات و هاووڵاتیان ناچار دەكات منداڵەكانیان بنێرنە خوێندنی ئەهلی و لە نەخۆشخانە تایبەتەكان چارەسەر وەربگرن". شەماڵ بۆچوونی وایە كە فرۆشتنی كەرتە گشتییەكان ژیانی هاووڵاتیانی هەرێمی كوردستانی بەتەواوی وێران كردووە، "ئەگەر دۆخەكە بەم شێوەیە درێژە بكێشێت و خزمەتگوزارییەك گشتییەكان پێشكەش نەكرێن، زۆر ئاسایی دەبێت خەڵكی بەهۆی نەبوونی پارە بۆ وەرگرتنی چارەسەر لەسەر جێگە بمرن، زۆر ئاسایی دەبێت منداڵەكانیان نەنێرنە بەر خوێندن، توانای روناككردنەوەی ماڵەكانیان و دابینكردنی ئاوی خواردنەوەیان نەبێت. لەبارەی بیانووی حكومەت بۆ بەهێزكردنی كەرتی تایبەت، ئەو ئابووریناسە ڕونی دەكاتەوە كە بەتایبەتیكردن چەكمكێكی ئاڵۆزە، نیەتی هەر حكومەتێك بۆ بەتایبەتیكردنەكە ڕەنگدانەوەی لەسەر دەرئەنجامەكان دەبێت، "كۆی كەرتە گشتییەكان لە هەرێمی كوردستان لەسەر حسابی هاووڵاتیان و بە پارەی ئەوان دروست كراون، ئێستا حكومەت دێت و زۆر بە ئاسانی هەرزان فرۆشی دەكات، كەرتەكان پێشكەشی سەرمایەگوزارێكی حزبی دەكات بۆ ئەوەی بەڕێوەی ببات، ئەگەر ئەوان مەبەستیان بەهێزركردنی كەرتی تایبەتە، بۆچی كەرتەكانی پیشەشازی، كشتوكاڵ و گەشتیاری نادەنە كەرتە تایبەتەكان". گوتیشی ئەو كەرتانەی كە زۆرترین قازانجیان هەیە بەتایبەت دەكرێن، بەڵام ئەوكەرتانەی كە قازانج تێیاندا كەمە لای حكومەت دەمێننەوە، لەڕاستیدا سیاسەتی حكومەتی هەرێمی كوردستان ڕوونە، لەسەر بنەمای زۆرترین قازانج بۆ كەسانی حزبی لەسەر حسابی هاووڵاتیانی هەژار كار دەكات.

لەماوەی 15 ساڵی ڕابردوودا كەمترین نەخۆشخنانە و قوتابخانە دروستكراون، لەبەرانبەردا، بە سەدانی ئەهلی دروستكراون، د.سۆران قادر باس لەوە دەكات كە پێوست بوو هاوشانی كردنەوەی نەحۆشخانەی تایبەت، حكومەتی هەرێمی كوردستان برەوی زیاتر بە كردنەوەی نەحۆشخانەی حكومی و پێشكەشكردنی خزمەتگوزارییەكان بدات، بەڵام بەداخەوە ئەمە نەكراوە، ئاماژە بۆ ئەوەش دەكات رێكخستنی كاری كەرتی تایبەت و گشتی پێویستی بە یاسا هەیە، دەبێت ئەو كەسەی لە نەخۆشخانەی حكومی كار دەكات، نەچێتە نەخۆشخانەی ئەهلی، بەڵام لەبەرانبەردا دەبێت حكومەت ماف بۆ دكتۆر و كارمەندانی نەخۆشخانە حكومییەكان دابین بكات، بەپێویستیشی زانی كە كەرتی تەندروستی لەنێوان گشتی و تایبەت ڕێكبخرێت، بەشێوەیەك كە كەرتی گشتی نەكرێتە قوربانی كەرتی تایبەت."بەداخەوە كەرتی تەندروستی و پیشەی دكتۆری لە كارە سەرەكییەكە لای داوە و زیاتر لەكەرتێكی بازرگانی دەچێت، بەشێكی ئەوانەی لەم بوارەدا كار دەكەن هەڵپەی بەدەستهێنانی زۆرترین داهاتیان هەیە بەبێ گوێدانە لایەنی كوالێتی". بەگوتەی د. سۆران، چارەسەركردنی ئەو دۆخەی كە ئێستا كەرتی تەندروستی تێی كەوتووە بە گێرانەوەی متمانە بۆ نەخۆشخانە حكومییەكان دەبێت، ئەمەش بە پێشكەشكردنی خزمەتگوزاری زیاتر و پێدانی ماف بە كارمەندەكان دەبێت.

لەكەرتی تایبەت خزمەتگوزارییەكی زۆر باش پێشكەش بەنەخۆش دەكرێت، بەڵام لەنەخۆشخانەی حكومی بەپێچەوانەوەیە، ئەمەش وای كردووە نەخۆش خۆی وردە وردە بڕیار بدات بچێتە نەخۆشخانە تایبەتەكان.

سەباح زێباری، سەرۆكی لیژنەی كاروباری تەندروستی و ژینگە و مافی بەكاربەر لە پەرلەمانی كوردستان باس لەوە دەكات كە ئەوان دژی بەتایبەتیكردنی كەرتە گشتییەكان و لەگەڵ ئەوەن كە خزمەتگوزاری تەندروستی و پەروەردە بێ بەرانبەر پێشكەش بەهاوڵاتییان بكرێت، گوتیشی كەرتی تەندروستی و پەروەردە یەكێكن لەو كەرتانەی كە لەزۆربەی وڵاتەكان كێشەیان لەسەرە، ئەمەش بەهۆی بڕیی ئەو تێچووەی كە ئەم كەرتانە پێویستیان پێیەتی. ڕونیشی كردەوە كە لە زۆرێك لە وڵاتان رێگە بە كەرتی تایبەت دراوە لەم بوارەدا كار بكەن، بەڵام پێویستە بوونی نەخۆشخانەی ئەهلی نەبێتە هۆكاری دابەزینی ئاستی خزمەگوزارییەكانی كەرتی گشتی. "لیژنەكەمان لە پەرلەمانی كوردستان، بەجدی بەدواداچوون بۆ پرسی بەتایبەتیكردن دەكەین و لەئێستاشدا چاوەڕێی یاسای نەخۆشخانە ئەهلییەكان دەكەین". ئەو ئەندامەی پەرلەمانی كوردستان هێما بۆ ئەوەش دەكات كە تێكەڵاوییەكی زۆر لەنێوان نەخۆشخانەی ئەهلی و تایبەت دروستبووە و پێویستی بە جیاكردنەوە هەیە.

بەشێك لە هاووڵاتیانی هەرێمی كوردستان بۆچوونیاوایە ئەگەر حكومەتی هەرێمی كوردستان توانای بەڕێوەبردنی كەرتەكانی نییە و یەكەیەكە هەرزانفرۆشیان دەكات، خۆی ئەركی چی دەبێت؟ ئەگەر كەرتەكانی گەیاندن، بازرگانی، خانوبەرە، دەرمان، جگەرە، سكیوریتی، ئاو، كارەبا، پەروەردە و تەندروستی بەتایبەتی بكرێن، حكومەتی هەریێم كامە كەرتی گشتی بەرێوە دەبات؟