ئەم هەواڵە بڵاوبكەوە
FaceBook  Twitter  

میتافیزیکای بزووتنه‌وه‌ی چه‌پ

چاپی یەکەم

بابەت

ڕەخنەیی ڕامیاری هزری 

بەشی یەکەم

پێشه‌کیه‌ک وه‌ک پێویست

نووسینی ئه‌م پێشه‌کیه‌ش، وه‌ک نووسینی په‌رتوکه‌که‌ی له‌ساتی خۆی دواکه‌وت. له‌به‌ر ئه‌وه‌ی ڕه‌ش نووسی په‌رتۆکه‌که‌ له‌ ته‌مووزی (2000)دا ته‌واوم کرد، به‌ڵام پاک نووسه‌که‌ی له‌ شباتی (2003)دا به‌ ئه‌نجامی پووختی گه‌شت. له‌به‌ر ئه‌وه‌ی ئه‌و نێوانه‌،ڕۆژه‌کانی زۆرن ئه‌وه‌ش به‌هۆی خۆژیاندنی تایبه‌تی یه‌وه‌ دواکه‌وت، به‌ڵام ناوه‌ڕۆکه‌که‌ی به‌بڕوای من هێشتا هه‌ر سه‌ره‌تایه‌تی.

به‌ڵام بۆ پێشه‌کییه‌که‌ی ئه‌م جاره‌، وه‌ک جاره‌کانی تری پێشه‌کیه‌کان نابێت. له‌به‌ر ئه‌وه‌ی ساتی نووسینه‌که‌ ساتێکی جیاوازی گۆڕانی یان گوێزرانه‌وه‌ی ڕه‌ووشی ڕامیارییه‌ له‌ناوچه‌که‌و به‌تایبه‌تی له‌ عێراقدا، هه‌روه‌ها گۆڕانی دابه‌ش بوونی کارتێلات و تروسته‌کانی سه‌رمایه‌داری گه‌وره‌ی جیهانی پێوه‌ دیارو ئاشکرایه‌.

ئه‌مه‌ له‌ڕووی پیربوونی هێزی ڕابردوو له‌ دابه‌ش بوون و وه‌به‌ربردن یان (وه‌به‌رهێنان)، و له‌ نوێدا که‌ ڕابردووش ئه‌و هێزه‌ ئابوورییانه‌ بوونیان هه‌بووه‌،به‌ڵام ئه‌م جاره‌یان له‌ سه‌رده‌مێکی تری جیابوونه‌وه‌ی کارتێلات و تروسته‌کانه‌وه‌ له‌ ئه‌نجامی گه‌وره‌بوونیان له‌لای هه‌ندێک له‌ سه‌رمایه‌داره‌ گه‌وره‌کان و پووکانه‌وه‌یان له‌لای هه‌ندێکی تریان (پووکانه‌وه‌ به‌مانای ته‌نگژه‌گرتوویی). ئه‌مه‌ش هۆیه‌کن بۆ سه‌رهه‌ڵدانی و گه‌وره‌ گه‌وره‌ بوونی باڵاو هێزێکی جیهانی ئابووری و سه‌ربازی و ته‌کنۆلۆجی ڕکه‌به‌ری هێزه‌کانیتر.له‌به‌ر ئه‌وه‌ ئه‌م گۆڕانه‌ ده‌بێت وه‌ک خۆی درک بکه‌ین و له‌ دیدگاو هزرێکی سیاسی چینایه‌تییه‌وه‌ ڕاڤه‌ی بکه‌ین و پراکتیکێکی گونجاوی به‌ به‌رهه‌م بۆ خه‌باتی چینایه‌تی چینی کرێکار و چونه‌ پێشه‌وه‌ی به‌رژه‌وه‌ندی چینایه‌تی و خه‌باته‌که‌ی له‌به‌رچاو بگرین.

ده‌بێت ئاینده‌ی پراکتیکی ڕامیاریمان به‌ شێوه‌یه‌ک بێت، که‌ پراکتیکێکی نوێی ڕامیاری و هێرش به‌ر بۆ سه‌ر نوێی سه‌رمایه‌داری له‌ ڕووکاری ده‌ره‌وه‌داو کۆن له‌ ناوه‌ڕۆکدا به‌ ڕێی بخه‌ین چونکه‌ هه‌ڵسان به‌ کرده‌ی ڕامیاری له‌ بێوس پۆلیتیکۆس دا(ژیانی ڕامیاری)، ده‌بێت ئاڕاسته‌که‌ی بدۆزیته‌وه‌و، یان به‌جۆرێکی تر ئاڕاسته‌که‌ی به‌پێی شه‌پۆلی چونه‌ پێشه‌وه‌ی داخوازی و ڕامیاری چینایه‌تیت ئاڕاسته‌ بکه‌یت. ئه‌و پرۆسه‌یه‌ له‌ژیانی ڕامیاریست ده‌توانێت هه‌نگاوه‌کان به‌ ئاڕاسته‌یه‌کی پێشکه‌وتنی داخوازییه‌کان بباته‌ پێشه‌وه‌. ئه‌مه‌ ئه‌و داخوازیه‌یه‌ که‌ له‌ چوارچێوه‌ی تێزی په‌رتۆکه‌که‌دا هه‌یه‌. ئه‌وه‌ی ده‌گه‌ڕێته‌وه‌ سه‌ر پرۆسه‌ی گۆڕان له‌ عێراقدا. پرۆسه‌یه‌کی ئیمپریالیستییانه‌ی گێتییه‌. چونکه‌ ڕامیاری سیسته‌می نوێی گێتی، کرده‌ی له‌ پێناوی گۆڕانێکی خۆکردی پراگماتی، به‌رژه‌وه‌ندی په‌رستی ئیمپریالیستییانه‌ی جیهان بوو.

ئه‌مه‌ش به‌و شێوه‌یه‌ نا که‌ سیسته‌می به‌عسی سیسته‌مێکی جێگا بووه‌وه‌ی ناو دڵ و ده‌روونمان بووبێت، به‌ڵکو به‌پێچه‌وانه‌وه‌ ئه‌ویش پێچه‌وانه‌یه‌کی سه‌دو هه‌شتا پله‌یی له‌گه‌ڵ ڕامیاری و ئابووری به‌رهه‌م هێن و به‌کاربه‌ری ئه‌و سیسته‌مه‌و په‌یوه‌ندی دامه‌زراوی کۆمه‌ڵایه‌تی ناو چوارچێوه‌ی عێراق.

لێره‌دا ده‌مه‌وێت ڕامیاری سیسته‌می نوێی گێتی به‌سه‌رکردایه‌تی و،هه‌روه‌ها به‌تاک ڕه‌ووی ئه‌مریکا بخه‌مه‌ڕوو، واته‌ گڵوبالیزم (جیهان گیری) کاری ڕامیاری، ڕامیاری خۆی له‌سه‌ر چه‌ند پایه‌یه‌ک ڕاگیرده‌کات، یه‌کێک له‌ پایه‌کانی جه‌نگی ده‌روونی له‌گه‌ڵ سیسته‌مه‌کان و هه‌روه‌ها له‌گه‌ڵ که‌سانکۆی ناو چوارچێوه‌ی جوگرافیایی ڕامیاری نیشانه‌کراو به‌ڕێده‌خات. هه‌روه‌ها له‌هه‌مان کاتدا له‌گه‌ڵ گشت گێتیدا پرۆسیسی ده‌کات. ئه‌ویش به‌بێ ئیراده‌کردنی مرۆڤی کۆمه‌ڵگاکان له‌ ڕێگه‌ی ژورنالیزمێکی پان و به‌رین و، دروست کردنی دیکۆمێنتی دروست کراوو داتاشراوی ده‌زگا سیخوڕیه‌ پان و به‌رینه‌کانیان و هه‌ڵکشانیان له‌گه‌ڵ سه‌نته‌ری ستراتیژی ئاسایشی نه‌ته‌وه‌یییان له‌گێتیدا چاو لـێده‌که‌ن. بێگومان ئاشایشی نه‌ته‌وه‌یی له‌ پنتی بیرو کرداری ئه‌واندا هیچ شتێکی تر نییه‌ بێجگه‌ له‌ پارێزگاری له‌ به‌رژه‌وه‌ندی سه‌رمایه‌دارانی ناوخۆی جیۆپۆلیتیکی دیاریکراویان و، برسیکردنی ئه‌ندامانی بێ به‌شی ووڵاتی خۆیان و به‌شه‌کانی تر له‌ گێتیدا. ئه‌مه‌ش به‌شێکی گه‌وره‌ی جه‌نگی دژی به‌عسی بوو. هه‌روه‌ها له‌هه‌مان کاتیشدا دژ به‌ ئیراده‌ی مرۆڤه‌کانی تینوو به‌ گۆڕانی سیسته‌می سه‌رمایه‌داری به‌عس به‌دڵ و ده‌روونی چینی شۆڕشگێڕ تاوی ڕامیاری و جه‌نگی سایکۆلۆجی خۆی ده‌دا. بێ ئیراده‌کردن هۆیه‌که‌ له‌ هۆیه‌کانی پاشه‌کشه‌ پێکردنی بزۆزێکی ڕامیاری و چینایه‌تی شۆڕشگێڕانه‌ی چینی شۆڕشگێڕ. هه‌روه‌ها ده‌ست نه‌بردن بۆ گۆڕانی ئابووری و ڕامیاری و کۆمه‌ڵایه‌تی له‌لایه‌ن چینی شۆڕشگێڕه‌وه‌. ئه‌مه‌ش له‌ڕێگه‌ی ڕامیارییه‌کی داڕێژراوو پشت به‌ستوو به‌شێوه‌ی گاڵته‌و بێ به‌هاکردنی توانای مرۆڤ و دروست کردنی چیرۆکی خه‌یاڵی ترس و تۆقاندنی هزرو، چۆک له‌رزاندنی مرۆڤه‌کان و سه‌رچاوه‌گرتوو له‌ تێزی بیرمه‌ندی سایکۆلۆجی له‌سه‌ر بنه‌ڕه‌تی داڕێژانی واتاو به‌ڵگه‌ی ناڕاست ڕوویی. ئه‌مه‌ش ده‌بێته‌ هۆیه‌ک بۆ که‌له‌پچه‌کردنی ئاوه‌زوو پراکتیکی هه‌وڵه‌کانی گۆڕان به‌دڵ داخوازی چینی شۆڕشگێڕ،ئه‌گه‌ر هه‌وڵی ڕامیاری و ئاوه‌زێکی شۆڕشگێڕی تێکشکێنه‌ری ئه‌و به‌ها ئیمپریالیستییانه‌ بوونیان له‌ گۆڕه‌پانی تێکۆشاندا نه‌بێت.

به‌م پێ یه‌ ده‌بێت هه‌وڵه‌که‌ت ئه‌وه‌نده‌ به‌گووڕوو تین بێت که‌ توانای ئاوه‌زی و هزرییه‌که‌ی تێکشکێنه‌ری ڕامیاری و جه‌نگی سایکۆلۆجی داڕێژراوی ئیمپریالیزم بێت. بێگومان بۆ ئه‌م لایه‌نه‌ش له‌ تێزی په‌رتۆکه‌که‌دا ده‌توانیت ڕێگه‌ی ئه‌و تێکشکانه‌ بدۆزیته‌وه‌.

ئه‌مه‌ی که‌ باسمان کرد به‌شێک و لایه‌نێکی ئه‌و جه‌نگه‌ نوێیه‌ی سیسته‌می نوێی جیهانیبوو. له‌لایه‌کی تره‌وه‌ هێزی جه‌نگاوه‌ری و تکنیک و تکنۆلۆجیای سه‌ربازی پێشکه‌وتوو بووه‌ته‌ هۆیه‌کی تری به‌کاربردنی له‌ ئاڕاسته‌کردنی ده‌سه‌ڵاتی ئابووری و ڕامیاری خۆی له‌ناوچه‌ جیاجیاکاندا، ئه‌مه‌ش بێجگه‌ له‌وه‌ی که‌ دوانه‌ ڕامیارییه‌کی نه‌خشه‌ بۆ کێشراو له‌و لایه‌نه‌دا هه‌یه‌. چونکه‌ ئه‌م به‌شه‌ی ڕامیاری میلیتاری پشت به‌دوو لایه‌نی یه‌ک ته‌واوکه‌ری ئه‌وی ترو یه‌کێکیان له‌پێناوی ئه‌ویتریان به‌کارده‌برێت.

له‌لایه‌کی تره‌وه‌ هۆیه‌کی به‌کارهێنانی سه‌ربازی له‌پێناوی ئه‌وی تریاندا ده‌بێت. به‌بڕوای من له‌ به‌یان کردنی ڕامیاری (سیسته‌می نوێی جیهان) ئه‌و پراکتیکه‌ به‌کاربرا له‌جه‌نگی دووه‌می که‌نداودا، که‌ یه‌که‌م لایه‌نی به‌کاربه‌ری ڕامیاری نوێی جیهان بوو، له‌لایه‌ک جه‌نگی دووه‌می که‌نداو هۆیه‌ک له‌ هۆیه‌کانی ده‌ربوونی کێم و پیسی ئه‌زمه‌ی سه‌رمایه‌داری جیهانیبوو. چونکه‌ ئه‌و ڕامیارییه‌ له‌ ڕێگه‌ی به‌کارهێنانی هێزی سه‌ربازییه‌وه‌ که‌ پرۆسه‌یه‌کی کلاسیکی کۆڵۆنیالیستی کلاسیک بوو. هه‌روه‌ها بۆ به‌جێ گه‌یاندنی ئه‌م لایه‌نه‌ش له‌ڕێگه‌ی چوونه‌ ناوه‌وه‌ی ڕاسته‌وخۆی ئه‌و هێزانه‌ بۆ شوێنی مه‌به‌ست و ده‌ست نیشان کراو به‌کارده‌برا، چونکه‌ له‌ کلاسیکیه‌تی ئه‌و پرۆسانه‌دا هه‌مان ده‌سه‌ڵاتداری سه‌ربازی به‌کارده‌هێنراو له‌سه‌ر کورسی عرشی ناوچه‌ی مه‌به‌ست داده‌نرا. چونکه‌ باشترو زۆرجار دڵخوازانه‌ی خۆیان ده‌بوو، سوودی ئه‌م جۆره‌ پرۆسانه‌ له‌کات و ساته‌کانی خۆیدا به‌شێوه‌یه‌کی تر ده‌بوو، له‌به‌ر ئه‌وه‌ی سوودێکی تری هه‌یه‌ له‌ ئێستادا چونکه‌ کۆمپانیای گه‌وره‌ گه‌وره‌ی زۆرتر دروست بوون و ڕکه‌به‌ری زیاتر په‌یدابووه‌. له‌به‌ر ئه‌وه‌ ئه‌مه‌ش دووباره‌ و سێ باره‌ ده‌کرێته‌وه‌ له‌ ئێستادا، له‌لایه‌کی تره‌وه‌ جه‌نگ له‌پێناوی به‌کاربردنی کۆمپانیای وه‌به‌ربه‌ری سه‌رمایه‌داری له‌ناوچه‌ی کۆڵۆنیال کراودا، جێ به‌جێ ده‌کراو خاوه‌نانه‌ی بڕیاری جه‌نگ خاوه‌نانی کۆمپانیای دامه‌زراندنانه‌وه‌و وه‌به‌ربه‌ری گه‌وره‌ی جیهانین. له‌به‌ر ئه‌وه‌ جه‌نگ و خاوه‌ن کۆمپانیاکان دوو ڕووی یه‌ک دراون و یه‌ک ته‌واوکاری پرۆسیسی ئه‌و یتریانه‌ چونکه‌ بنه‌ڕه‌تی ڕامیاری ئیمپریالیزم له‌سه‌ر گوێزانه‌وه‌ی سه‌رمایه‌ی گه‌وره‌ی خۆی بۆ ناوچه‌کانن به‌ مه‌به‌ستی به‌کارهێنانی تیایدا بنیات نراوه‌. بێجگه‌ له‌وه‌ی که‌ کۆمپانیا به‌رهه‌مهێنه‌رییه‌کانی ده‌کاته‌ سه‌رچاوه‌ی به‌رهه‌مهێنان له‌ ناوچه‌ی کۆڵۆنیال کراوی نوێدا. 

ئه‌مه‌ش له‌ڕێگه‌ی که‌نارکردنی ڕێکخراوی(NU)و ڕامیاری و ڕامیاری ئاڕاسته‌کراوی جیهانی، خۆی بێجگه‌ له‌وه‌ی که(NU) خۆی به‌رهه‌م و داخوازی وه‌ڵامدانه‌وه‌ی ڕامیاری و ئابووری ئیمپریالیزمی جیهانی بووه. 

له‌لایه‌کی تره‌وه‌ پێکه‌وه‌ لکانی چه‌ند چوارچێوه‌یه‌کی لێک جیاوازی به‌رژه‌وه‌ندی ئابووری، ڕامیاری و له‌گه‌ڵ یه‌کتردا دژو ڕکه‌به‌ری یه‌کتری بوون. هه‌روه‌ها جێگه‌ له‌ق کردن به‌یه‌کتری و باڵا ده‌ستی له‌سه‌ر ئاڕاسته‌ی رامیاری و ئابووری و به‌رژه‌وه‌ندی خۆی له‌ چوارچێوه‌ی (NU)دا. هیچ چوارچێوه‌یه‌کی تری پێک نه‌ده‌هێناو ته‌نها دابه‌شکردنی کارتیلاتی گه‌وه‌ری سه‌رمایه‌داری و تروستی به‌رهه‌مهێنه‌ری گه‌وره‌ی جیهانی به‌سه‌ر ناوچه‌ ئابووری و دارایییه‌کان هیچی تر نه‌بووه‌. هه‌روه‌ها ئه‌و ڕامیارییه‌ به‌شێوه‌ی جیاجیا بوو بووه‌ به‌شێکی گرنگ و سه‌رچاوه‌گرتووی سه‌رده‌می جه‌نگی ساردو دوای جه‌نگی سارد.

ئه‌م دوو لایه‌نه‌ی سه‌رچاوه‌ی ڕامیاری نوێی ئیمپریالیزمی جیهانی، سه‌رچاوه‌ن بۆ دروست بوونی سیسته‌می نوێی ڕامیاری و ئابووری (له‌ ڕووی داڕشتنه‌وه‌ی جووگرافیایی به‌رهه‌مهێنانه‌وه‌)، که‌ ناونیشانی سیسته‌می نوێی جیهانییه‌. هه‌روه‌ها به‌ڕامیاری و ئابووری و کۆمه‌ڵایه‌تی جیهان گیری ناوزه‌ندیش ده‌کرێت. چونکه‌ له‌لایه‌ک پرۆژه‌ی گۆڕانی ڕامیاری (خارﻃە‌ اﻟﻃریق) به‌دیوی پرۆتۆکۆڵی ڕامیاری و ئاسایشی ناوچه‌یی بووه‌ته‌ ڕامیاری نوێی جیهان. ده‌بێته‌ هۆیه‌کی گرنگ له‌ گۆڕانی جیوپۆلیتکی ناوچه‌که‌و دامه‌زراندنی سه‌قامگیری به‌رژه‌وه‌ندییه‌ ستراتیژی و ئابووری و ڕامیارییه‌کانی له‌ ناوچه‌که‌دا. ئه‌مانه‌و له‌ ڕابردووی هه‌وڵه‌کانیاندا ته‌واکه‌رو ووێنه‌کێشی ڕامیاری نوێی جیهانییه‌.

له‌لایه‌کی تره‌وه‌ گۆڕانی بازاڕوو ساغ بوونه‌وه‌ی کاڵا به‌رهه‌م هاتووه‌ جیاجیاکانی ووڵاته‌ جیاوازه‌کان و به‌ بازاڕکردنی ناوچه‌ی کۆڵۆنی کراوو یان به‌سه‌ربازی کراو بۆ هێزی سه‌ربازی کراوی ناوچه‌که‌. ده‌ست گرتن به‌سه‌ر گه‌وره‌ترین سه‌رچاوه‌ی ووزه‌ی ناوچه‌که‌و دووه‌م یه‌ده‌کی نه‌ووتی جیهان.

ئه‌مانه‌ هه‌ر هه‌موویان به‌ یه‌که‌وه‌ ناتوانن ببنه‌ سه‌رچاوه‌ی سه‌قامگیری ڕامیاری و ئابووری و کۆمه‌ڵایه‌تی له‌ ناوچه‌که‌و گێتیدا. چونکه‌ ناتوانێت یان هه‌وڵێک نیه‌ بۆ وه‌ڵام دانه‌وه‌ی پرس و داخوازی پێویستییه‌کانی چینی شۆڕشگێڕی سه‌رده‌می سه‌رمایه‌داری. به‌تایبه‌تی له‌ عێراقدا ناتوانین گۆڕانی ئێستا بۆ ئاینده‌ی دامه‌زراندنی حکومه‌تی کاتی و سه‌ربازی بۆ حکومه‌تی ئاینده‌ی هه‌ڵبژێراو، به‌ گۆڕانێکی چۆنایه‌تی ڕامیاری و کۆمه‌ڵایه‌تی و ئابووری ناوزه‌ند بکه‌ین. چونکه‌ ناتوانێت یان هه‌وڵه‌کانی حکومه‌تی ئاینده‌ له‌پێناوی تێکشکاندنی پایه‌کانی په‌یوه‌ندی کۆمه‌ڵایه‌تی و ئابووری (کارو سه‌رمایه‌) بێت. له‌به‌ر ئه‌وه‌ ناتوانین گۆڕان له‌ عێراق و ده‌ڤه‌ره‌که‌دا به‌ گۆڕانێکی ڕیشه‌یی ناوبنێین، چونکه‌ دیفاکتی گۆڕان لۆجیکی گۆڕانی مێژوویی کۆمه‌ڵایه‌تی چینایه‌تی هه‌ڵنه‌گرتووه‌ یان پیاده‌ ناکات.

به‌یانه‌کانی کۆنگره‌کانی ئۆپۆزسیۆنی ڕابردوو، ڕووه‌کانی ڕامیاری لیبراڵی و دینی له‌ عێراقداو، هه‌روه‌ها به‌یانی ده‌وڵه‌تی ئه‌مریکی و به‌ریتانیش به‌هاوبه‌شی له‌سه‌ر دیموکراتی و ئازاد بوونی عێراق و دامه‌زراندنی ده‌وڵه‌تی عیلمانی و فیدراڵی و به‌شداری هه‌موو تیره‌و تایه‌فه‌ ڕامیاری و ئه‌تنیکی و دینییه‌کان، له‌ ئاینده‌ی عێراقێکی پلورالیستیدا، هیچ شتێک نییه‌ بێجگه‌ له‌ مانه‌وه‌و درێژه‌دان به‌ ده‌سه‌ڵاتی ئابووری و ڕامیاری و کۆمه‌ڵایه‌تی چینایه‌تی سه‌رمایه‌داری له‌ ناوچه‌که‌دا.

له‌م سۆنگه‌یه‌وه‌ جارێکی تر ده‌چینه‌وه‌ سه‌ر دیدی چه‌پی وورده‌ بۆرژوازی و تێکه‌ڵ بوونییان به‌ ڕامیاری و هزری سوشیال-لیبرالیزمی ئه‌وورووپی. ئه‌وه‌ دووپات ده‌که‌مه‌وه‌ که‌ پرۆتۆکۆڵێکی ستراتیژی چه‌پ، به‌هه‌وڵێکی بچووک و کرده‌یه‌کی ڕامیاری بۆرژوازی و سه‌رمایه‌داران، هه‌مووی تووشی هه‌ڵوه‌شان و داوه‌شان ده‌بێت. ده‌وڵه‌تی دیموکراتی و ئازادی و فیدراڵی له‌ عێراقدا، ناونیشان و سه‌رخه‌تی ڕامیاری و کرده‌ی تێزو میتۆدۆلۆجی ئه‌مریکایه‌، که‌ ناتوانێت ئازادی به‌یان بکات. چونکه‌ ناتوانێت فه‌راهه‌می ده‌ست بردنی که‌سانکۆی ناو عێراق به‌ ده‌سه‌ڵاتی ڕامیاری و ئابووری بکات و ئه‌گه‌ر بیه‌وێت ده‌ست له‌ سیسته‌م بدات و بیگۆڕێت به‌ به‌رژه‌وه‌ندی خۆی، ئازادی ئه‌مریکاو سه‌رمایه‌داران به‌چه‌پکه‌ ڕۆکێتی باروتاوی و یۆرانیۆم کراو وه‌ڵام ده‌داته‌وه‌. هه‌روه‌ها هاوبه‌شیه‌کی له‌گه‌ڵ تێڕوانینه‌کانی چه‌پدا هه‌یه‌. له‌به‌ر ئه‌وه‌ی تێزی چه‌پ سه‌رچاوه‌ی له‌ لیبرالیزمه‌وه‌ هه‌ڵگرتووه‌و تێپه‌ڕی تێزو میتۆدو هزرو فه‌لسه‌فه‌ی لیبرالیزمی ئه‌وورووپای نه‌کردووه‌.

ئازادی، یه‌کسانی له‌گه‌ڵ ده‌سه‌ڵاتی چینێکدا هیچ شتێک نییه‌ بێجگه‌ له‌ تێکه‌ڵ کردن و به‌یانی ڕامیاری و ستراتیژی سۆشیال لیبرالیزمی ئه‌ووروپا، ئه‌م تێزو ستراتیژه‌ هیچ جیاوازییه‌کی ڕیشه‌یییان له‌گه‌ڵ ستراتیژی ئه‌مریکادا نییه‌. ده‌وڵه‌تی عیلمانییه‌که‌یان، عه‌مامه‌ به‌سه‌رێکی دینی به‌یانی ڕه‌سمی له‌سه‌ر ڕاده‌گه‌یه‌نێت، جیاوازی دین ده‌کات له‌ پرۆسه‌ی بیۆس پۆلیتیکوسی حکومه‌ت و ده‌سه‌ڵاتی ڕامیاری ئاینده‌دا. بێگومان ده‌وڵه‌تی عیلمانی و مه‌ده‌نی ئه‌گه‌ر پرۆسه‌ی کاری به‌کرێ تیادا بنه‌بڕنه‌کرێت ناتوانێت ده‌وڵه‌تێکی گوێزراوه‌ی سه‌رمایه‌داری میلیتاری بێت بۆ ده‌وڵه‌تێک که‌ کاری به‌کرێی تیادا پرۆسیس نه‌کرێت. واته‌ ده‌وڵه‌تی عیلمانی له‌گه‌ڵ ده‌وڵه‌تێک که‌ مه‌زهه‌ب تیایدا داڕێژه‌ی ده‌ستوورو سیسته‌می کۆمه‌ڵایه‌تی و په‌یوه‌ندییه‌کانی ده‌بێت، به‌پێ‌ی پێویستی ڕێنوێنی و یاسای به‌رهه‌مهێنانی کۆمه‌ڵایه‌تی ده‌برێت به‌ڕێوه‌، به‌ بڕوای من هه‌ر ده‌وڵه‌تێک یان فرماسوێنێکی کۆمه‌ڵایه‌تی ئه‌گه‌ر بارسووکی له‌سه‌ر شانی چه‌وسانه‌وه‌ی ئابووری و کۆمه‌ڵایه‌تی و چینایه‌تی لانه‌بات، خێرو خۆشییه‌که‌ی بۆ سه‌رمایه‌داران ده‌بێت.

بیرکردنه‌وه‌ له‌ هه‌موو ئه‌و تێزو تێڕوانینانه‌ له‌لای چه‌پ نه‌یده‌توانی دڕبات به‌ڕامیاری له‌وه‌و پێشی وورده‌ بۆرژوازی. ئه‌مانه‌ش سه‌رچاوه‌یان له‌ ته‌نگژه‌ی بیرو هۆشی زانایانی وورده‌ بۆرژوازی چه‌په‌وه‌ گرتبوو. واته‌ ته‌نگژه‌که‌یان به‌هۆی ڕامیارییه‌کی یان هه‌ڵوێستێکی نادروستی چینایه‌تییه‌وه‌ تێنه‌ده‌په‌ڕاند. پرۆتۆکۆڵی ته‌نگژاوی ڕابردوو به‌ ته‌نگژه‌یه‌کی نوێ جێ پێ ده‌گرنه‌وه‌، واته‌ نه‌یان ده‌توانی هه‌نگاوێک به‌ڕابردوو هه‌ڵبگرن و داهاتوویانی پێ ڕووناک بکه‌نه‌وه‌.

ئه‌مه‌ش زیاتر باسه‌که‌ی له‌ناو تێزی ڕوون و ئاشکراکانی په‌رتۆکه‌که‌دا ده‌بینین. چه‌پ له‌ ساته‌وه‌ختی ته‌نگژه‌ی نێوان ده‌سه‌ڵاتی عێراق له‌لایه‌ک و ئه‌مریکاو به‌ریتانیا له‌لایه‌کی تر، به‌هێزو بیری خاوو خلیچکی خۆیان بانگه‌وازی کاری هاوبه‌شی که‌سایه‌تی و ڕێکخراوه‌ چه‌په‌کانیان ده‌کرد، که‌ خۆی له‌خۆیدا کاری هاوبه‌ش هه‌ڵگری چه‌ند لایه‌نێکی ته‌نگژه‌ی ڕامیاری و کۆمه‌ڵایه‌تی و چینایه‌تی ببوو. بابه‌تی ناو ڕۆژنامه‌که‌شیان دیسان بابه‌ت گه‌لێکی چاره‌سه‌ر سازنه‌بووه‌ (به‌مانای ڕیفۆرم نا)، گووتاری بێ چاره‌سه‌ری ناو ڕۆژنامه‌که‌یان به‌ناوی (کاری هاوبه‌ش)ه‌وه‌ ناتوانێت وه‌ڵامێک بداته‌وه‌. چونکه‌ ناکرێت کاری هاوبه‌شی چه‌ند لاشه‌و تێزو دیدێک، کرده‌یه‌کی به‌ به‌رهه‌می لێوه‌ سه‌وزبێت. ئه‌گه‌ر نه‌چنه‌ سه‌ر یه‌ک سکه‌ی ماددی بابه‌تی‌و شیکاری ماددی مێژوویی به‌ دیدێکی ماددی دیالێکتیکی و یه‌ک ته‌رزی له‌ڕیزی هزرو فه‌لسه‌فه‌کانیاندا نه‌بێت. له‌به‌ر ئه‌وه‌ی نه‌یان توانیوه‌ یه‌ک تێزو یه‌ک هزرو یه‌ک فه‌لسه‌فه‌ی پراکتیک بده‌ن به‌ پرۆسیسی کاری ڕامیارییان. تۆوی ئه‌م بیرۆکه‌یه‌ ناتوانێت چرۆو ڕه‌گ بکات. له‌ ڕابردوودا دیدی خۆم له‌ نووسینه‌کانی پێشووتردا ڕوون و ئاشکرا کردووه‌، وه‌ک نووسراوی (چه‌پ و مێژوو له‌ کوێدان).

بێگومان ده‌بێت یه‌ک فه‌لسه‌فه‌یی بۆ یه‌ک ئامانجی و پراکتیکی ڕامیاری و خه‌باتی چینایه‌تی بێت. به‌ڵام شوێن بینی (یان شوێن داخوازی) یه‌کێک له‌ لایه‌نه‌ ده‌روونی و کاریگه‌ره‌کانی بزاوتی چه‌پی وورده‌ بۆرژوازی بووه‌. له‌به‌ر ئه‌وه‌ ناتوانێت پراکتیکێکی ڕامیاری کاریگه‌ر له‌سه‌ر ڕه‌ووشه‌کان به‌ ده‌ربخات و بخشێت له‌سه‌ر زه‌وی و گۆڕه‌پانی عێراق. ئه‌مه‌ش مێژوویه‌ک دروست ناکات و ناتوانێت ساتێکی مێژوویی دروست بکات له‌ چوارچێوه‌ی بزاوتنه‌کانی گۆڕه‌پانی ڕامیاری و چینایه‌تیدا (به‌مانای مێژووی به‌ به‌رهه‌م).

له‌م سۆنگه‌یه‌وه‌ ئه‌وه‌ ده‌بینین که‌ له‌ ته‌نگژه‌ی ڕامیاری و هزری بزاوتنی چه‌پدا، وه‌ڵامه‌که‌ی به‌ ته‌نگژه‌ ئامێزێکی ڕامیاری و هزری تر ده‌درێته‌وه‌. واته‌ پێکوته‌ی چه‌پ له‌ شوێنی خۆیدا له‌ بێ سه‌رچاوه‌یی له‌ هزری و فه‌لسه‌فی چینایه‌تی چینی کرێکاره‌وه‌ ته‌نگژه‌ به‌ ته‌نگژه‌یه‌کی نوێتر له‌ ڕووکارو کلاسیک له‌ میتۆددا، وه‌لام ده‌داته‌وه‌. ئه‌مه‌ش هه‌نگاوه‌کان له‌ شوێنی خۆیاندا پێگیر ده‌کرێت له‌ لیته‌یه‌کی کوژه‌ردا، چه‌پ و که‌سایه‌تییه‌کانیان له‌ خاوو خلیچکی هزرو دیدگاکانیانه‌وه‌، ووته‌و بێژانی سه‌یرو سه‌مه‌ره‌ له‌ مه‌ڕ ئه‌وه‌ ده‌که‌ن که‌ گوایه‌ ته‌نها له‌سه‌ر چه‌پ ده‌نووسم و په‌یڤین ده‌که‌م. به‌ڕاستی ئه‌م دیده‌ ته‌نها له‌ خاوو خلیچکی هزرو دیدی چه‌ند ئه‌ندامێکی چه‌پدا بوونیان هه‌یه‌. ئه‌مه‌ش به‌ڕاستی تێ نه‌گه‌یشتنه‌ له‌ نووسراو و بیروهۆشی ئه‌ندامانی کۆمه‌ڵ و ناو بزووتنه‌وه‌که‌. لێره‌وه‌ ئه‌وه‌ش ڕاده‌گه‌یه‌نم که‌ نووسراوه‌کان و بیرو تێزه‌کانی ناویان که‌ هه‌ڵگری ناونیشانی منی پێوه‌یه‌ به‌شێک نییه‌ له‌ بزووتنه‌وه‌ی چه‌پ و لایه‌نگرانی، به‌ڵکو به‌شێک له‌ تێزو هزری ناو فه‌لسه‌فه‌ی مارکسیزم و ڕێبازی تێکۆشانییه‌تی. کاتێک که‌ په‌یڤین له‌سه‌ر چه‌پ ده‌که‌ین له‌ هه‌مان کاتدا په‌یڤین له‌سه‌ر ڕاست و سه‌رمایه‌داریش ده‌که‌ین. چونکه‌ ئێمه‌ ده‌مامکی چه‌پ به‌ ترسناکتر ده‌زانین تا ئه‌وه‌ی که‌ ڕووه‌کان ده‌مامکیان نه‌بێت. له‌به‌ر ئه‌وه‌ی له‌ چاره‌سه‌رکردن و ڕه‌خنه‌گرتنی چه‌پ، ئاڕاسته‌کردنی تێزی شۆڕشگێرانه‌ی ئێمه‌یه‌ که‌ به‌ره‌و ڕه‌گی ژیانی سه‌رمایه‌داری ده‌کرێت.

له‌به‌ر ئه‌وه‌ چه‌ند له‌سه‌ر چه‌پ ده‌ئاخافێم ئه‌وه‌نده‌ش به‌ردو تیر ده‌گرینه‌ ڕاست. چونکه‌ چه‌پ په‌یڤی بۆ ڕاست به‌ئه‌نجام ده‌گه‌یه‌نێت. ئه‌وه‌ش له‌هه‌موو لایه‌ن و تێڕوانینه‌کانی ناو چه‌پدا ڕوون و ئاشکران. له‌به‌ر ئه‌وه‌ ئه‌و دیدگایه‌ی چه‌پ به‌ شێوه‌یه‌کی ناڕۆشن بینی ئه‌وان ده‌زانم و کاڵ فامیه‌کی پێوه‌ دیاره‌ که‌ هیچ ئاگایه‌کیان له‌سه‌ر تێزو فه‌لسه‌فه‌ی مارکسیزم نییه‌. هه‌ر بۆیه‌ کاری ئێمه‌ ئه‌وه‌یه‌ که‌لایه‌نێک هه‌ڵگری هزری مارکسیزم نییه‌، له‌ڕووکاری ده‌ره‌وه‌شیدا به‌یانی به‌ناوی مارکسیزمه‌وه‌ ئه‌کات، ئه‌گه‌ر کردی ئه‌وه‌ له‌سه‌ر شانی ئێمه‌ی مارکسیسته‌کان پێویسته‌ له‌هه‌موو لایه‌نه‌کانی تر زیاتر له‌سه‌ریان بدوێین بۆ ئه‌وه‌ی ناونیشانی مارکسیزم نه‌بێت به‌هۆیه‌ک بۆ شاردنه‌وه‌ی ده‌ستێکی ژه‌هراوی له‌خه‌بات و تێکۆشانی چینایه‌تی چینی کرێکاردا. واته‌ هه‌ڵگری ناونیشانی ده‌ره‌وه‌ی حیزبه‌کان ناتوانن له‌گه‌ڵ تێزو میتۆدۆلۆجی مارکسیزمدا جووت بن. له‌به‌ر ئه‌وه‌ ئه‌رکی هه‌موو مارکسیستێکه‌ که‌ به‌ قورسترین و به‌هێزترین چه‌کی هزرو فه‌لسه‌فه‌ی مارکسیزم له‌و هێزه‌ نامۆو پێچه‌وانه‌به‌ خه‌بات و تێکۆشانی حیزبی چینی کرێکارو مارکسیزم ده‌ست بکاته‌وه‌.

لێره‌دا ده‌چمه‌ سه‌ر به‌شه‌کانی ناو په‌رتوو که‌که‌ که‌ له‌ یازده‌ به‌ش پێک هاتووه‌و هه‌ر به‌شه‌ چاره‌سه‌رێکی گونجاووی ماددی بابه‌تی دواکه‌وتووی حیزب و خه‌باتی چینایه‌تی چینی کرێکار ده‌کات،و وه‌ڵام به‌ کۆمه‌لێک کێشه‌ی ڕیشه‌یی نه‌چوونه‌ پێشی خه‌باتی چینی کرێکارو کۆمۆنیسته‌ زانستییه‌کان ده‌داته‌وه‌. به‌ڕاستی ئه‌و یازده‌ به‌شه‌ی په‌رتۆکه‌که‌ زۆر گرنگن ، چونکه‌ هه‌ر به‌شه‌و چاره‌سه‌ری لایه‌نێکی چوونه‌ پێشه‌وه‌ی بزووتنه‌وه‌ی چینی کرێکارو خه‌باتی پارتایه‌تی ئه‌و چینه‌یه‌، بۆ به‌ده‌ست هێنانی ده‌سه‌ڵاتی چینایه‌تی خۆیی و دامه‌زراندنی په‌یوه‌ندی کۆمه‌ڵایه‌تی ئازادی و یه‌کسانی و دادپه‌روه‌ری کۆمه‌ڵایه‌تی له‌نێوان مرۆڤه‌کاندا. واته‌ هه‌ربه‌شه‌ به‌شێکن له‌ گشتی کێشه‌ جۆراوجۆره‌کانی یه‌ک بزووتنه‌وه‌ی چینایه‌تی.

به‌شی یه‌که‌م، که‌ ( هێڵی سیاسی – پراکتیک له‌ بزووتنه‌وه‌که‌دا) ئه‌م لایه‌نه‌ گرنگی تایبه‌تی خۆی هه‌یه‌ له‌ پرۆسیسی ژیانی ڕامیاری حیزب و بزووتنه‌وه‌ی شۆڕشگێردا ده‌وورو نه‌خشی خۆی هه‌یه‌، چونکه‌ هێڵی ڕامیاری کاریگه‌ری خۆی هه‌یه‌، له‌سه‌ر ڕاست و دروست ئاڕاسته‌کردنی خه‌بات و بزووتنه‌وه‌ی چینی کرێکارو ئه‌نجامی پراکتیکی ئه‌و حیزب و بزووتنه‌وه‌یه‌، هه‌روه‌ها کاریگه‌ری هه‌یه‌ له‌سه‌ر به‌شی دووه‌می په‌رتۆکه‌که‌و جیابوونه‌وه‌ی بزووتنه‌وه‌کان له‌ یه‌کتری. به‌شی دووه‌م که‌ (جیاوازییه‌کان له‌سه‌ر ئاستی سیاسی دیدێکی میتافیزیکی یه) ده‌بێت به‌ بوون بێت له‌ به‌رامبه‌ر هه‌موو بزووتنه‌وه‌که‌دا. بۆ ئه‌وه‌ی ئاڕاسته‌ی خه‌باتی خۆی به‌ ته‌واوی جیاواز بکاته‌وه‌ له‌هه‌موو لایه‌نه‌کانی تری ناو کایه‌ی کۆمه‌ڵایه‌تی و ڕامیاری و ئابووری کۆمه‌ڵگا، واته‌ ئه‌م به‌شه‌ش گرنگی خۆی هه‌یه‌، هه‌روه‌ها ئه‌مه‌ش کاریگه‌ری دووباره‌ له‌سه‌ر فۆرمی جیاوازی حیزبی کۆمۆنیست هه‌یه‌، له‌ناو بزووتنه‌وه‌ی چینی کرێکاردا.

له‌م سۆنگه‌یه‌وه‌ به‌شی سێیه‌م له‌ په‌رتۆکه‌که‌دا (فۆرمی دروست بوونی حیزبی کۆمۆنیست)، دیسانه‌وه‌ هێڵه‌ ڕامیاری و پراکتیکی و جیاوازییه‌ ڕامیارییه‌که‌ی ده‌ست نیشانی جیاوازی فۆرمی حیزبی بوون ده‌کات له‌ناو چینی کرێکاردا، دیسانه‌وه‌ ئه‌مه‌ش دووباره‌و سێ باره‌ گرنگی خۆی هه‌یه‌ له‌ په‌یڕه‌وی خه‌بات و تێکۆشانی چینی کرێکار له‌ گێتی سه‌رمایه‌داریدا.بۆ ئه‌م لایه‌نه‌و چوونه‌ پێشه‌وه‌ی به‌شه‌کانی تریش ڕابه‌ر ته‌یار کراو یان بارگه‌بووی هزرو ئاوه‌زی به‌ هزرو میتۆدی فه‌لسه‌فی مارکسیزم و ئاشنایی و شاره‌زایی له‌ میتۆدو هزرو فه‌لسه‌فه‌ی ئه‌و فه‌لسه‌فه‌یه‌دا، گرنگی خۆی هه‌یه‌ له‌ ئاڕاسته‌کردنیبزاوتنی حیزبی چینی کرێکارو بزووتنه‌وه‌کانیاندا. هه‌روه‌ها له‌سه‌ر هه‌ڵدێروو به‌ره‌و ئامانج بردنی ڕامیاری ئه‌و حیزبانه‌و ڕامیاری بزووتنه‌وه‌ی چینی کرێکار کاریگه‌ری داده‌نێت.واته‌ به‌شی چواره‌م که‌ به‌ناوی (ڕابه‌ر له‌ حیزب دا) په‌یوه‌ندییه‌کی گرنگی ماددی و دیالێکتیکییان هه‌یه‌ به‌یه‌که‌وه‌ له‌گه‌ڵ به‌شی سێهه‌م دا.

(جیابوونه‌وه‌و دانه‌بڕان) که‌ به‌شی پێنجه‌می په‌رتۆکه‌که‌یه‌، ده‌ردێکی کوشنده‌یه‌ له‌ناو بزووتنه‌وی چه‌پی کوردستان و هه‌تا به‌شێکیش له‌ عێراقدا بوونیان هه‌یه‌، ئه‌مه‌ش لایه‌نێکی خراپی پراکتیک کردن و ناوازه‌ی هزری و ڕامیاری که‌سانکۆی چه‌په‌. پێویسته‌تێ‌ی بپه‌ڕێنین و تووڕی بده‌ین بۆ ئه‌وه‌ی به‌رگی دیالێکتیکی و ماددی خۆی بده‌ین به‌ بزووتنه‌وه‌که‌. زیاتر ئه‌م به‌شه‌ش بۆ ناو په‌رتۆکه‌که‌ هه‌ڵده‌گرین.

ئه‌م جاره‌ش به‌شی شه‌شه‌مین تا ڕێژه‌یه‌ک په‌یوه‌ندی هه‌یه‌ به‌ به‌شی پێنجه‌مه‌وه‌و به‌ڵام ئه‌مه‌ش بۆ خۆی له‌ هه‌ندێک ڕووی تره‌وه‌ جیاوازن و، هه‌مدیسان ده‌گه‌ڕێته‌وه‌ بۆ لایه‌نی که‌م درکی و کاڵ فامی هزری و ڕامیاری له‌سه‌ر گۆڕه‌پانی ڕامیاری بزووتنه‌وه‌که‌و خراپی به‌کارهێنانی به‌هاکانی فه‌لسه‌فه‌و هزری مارکسیزم، به‌ڕاستی ده‌ردێکی کوشنده‌یه‌ ئه‌م پراکتیکه‌ی چه‌پ.

به‌شێکی گرنگ و ژیانیتر له‌سه‌ر ئاڕاسته‌کردنی بزووتنه‌وه‌که‌ که‌ په‌یوه‌ندی دیالێکتیکییان به‌ حیزب و بزوتنه‌وه‌که‌وه‌ هه‌یه‌ (په‌یوه‌ندی تیۆرو پراکتیک له‌ حیزبی کۆمۆنیست دا) ئه‌مه‌شیان له‌به‌شی حه‌وته‌مدا به‌ ووردی قسه‌و باسمان له‌سه‌رکردووه‌. له‌ مێژووی ڕابردوودا هه‌روابووه‌، تیۆر گرنگی خۆی هه‌بووه‌ له‌ پراکتیک کردن و هه‌نگاو هه‌ڵهێنان به‌ بزووتنه‌وه‌ی چینایه‌تی چینی کرێکاردا. هه‌روه‌ها ئه‌گه‌ر پراکتیکیش به‌بوون نه‌هاتایه‌، ئه‌وا تیۆر یان بێوس تێوریتیکوس بێ گیان ده‌بوو. واته‌ هه‌موو ئه‌مه‌ش گرنگی خۆی هه‌یه‌ که‌ زیاتر له‌ ناو په‌رتۆکه‌که‌دا ئه‌وه‌ ده‌ست نیشان ده‌که‌ین و لێره‌دا له‌سه‌ری زۆر نادوێین.

به‌شی هه‌شته‌میش هه‌مدیسان گرنگی خۆی هه‌یه‌، چونکه‌ هه‌ر کێشه‌یه‌ک دێته‌ پێش پێویسته‌ حیزبه‌کان به‌ ئاڕاسته‌ی سوود و قازانج به‌ بزووتنه‌وه‌ی چینی کرێکار بێت، له‌به‌ر ئه‌وه‌ ده‌بێت له‌ ستراتیژی چاک کردنی کێشه‌کان به‌ سوودی بزووتنه‌وه‌ی چینی کرێکار و خه‌باتی چینایه‌تی کرێکاردا بێت. هه‌مدیسان په‌یوه‌ندی به‌ به‌شه‌کانی تره‌وه‌ هه‌یه‌ واته‌ هه‌ر هه‌موو به‌شه‌کان په‌یوه‌ندییه‌کیان به‌ یه‌که‌وه‌ هه‌یه‌ که‌ دیالێکتیکییه‌.له‌به‌ر ئه‌وه‌ی (ئه‌لته‌رناتیڤ و حیزبه‌کان) دیسان ئاڕاسته‌ ڕامیارییه‌که‌ی ده‌ست نیشانی ئه‌ڵته‌رناتیڤی چینایه‌تی خۆی ده‌کات له‌به‌رامبه‌ر ڕه‌وه‌نده‌کانی تردا، واته‌ به‌شی نۆیه‌میش وه‌کو به‌شه‌کان به‌یه‌که‌وه‌ گرێ دراون و په‌یوه‌ندییه‌کی پێکه‌وه‌یی دیالێکتیکییان هه‌یه‌.

به‌شی ده‌یه‌میش، له‌به‌ر ئه‌وه‌ی چونکه‌ دروشمه‌کان ڕامیارییه‌ جیاوازه‌کان دروستیان ده‌کات، ده‌بێت ئێمه‌ ئه‌و ئه‌نجامه‌ به‌ده‌ست بهێنین له‌ هه‌وڵه‌کانماندا پرۆسیسی بکه‌ین که‌ دروشمی جیاوازی خۆمان هه‌بێت. ئه‌ویش له‌ تێزی جیاوازو هزرو فه‌لسه‌فه‌و میتۆدی جیاوازه‌وه‌ به‌ ده‌ست دێت.

به‌شی کۆتاییش که‌ به‌شی یازده‌هه‌مه‌، ڕۆژنامه‌ش گرنگی خۆی هه‌یه‌ له‌ بڵاوکردنه‌وه‌ی هه‌موو ئه‌و ڕووداوو هه‌ڵوێسته‌ ڕۆژانه‌یه‌و ده‌رخستنی به‌شێکی کورت کراوه‌ی هه‌موو به‌شه‌کانی تری ئه‌م په‌رتۆکه‌و چه‌ند هه‌وڵێکی تری جوڵانی پارتایه‌تییه‌. به‌ڵام ئه‌مه‌ش ناکاته‌ ئه‌وه‌ی که‌ ڕۆژنامه‌ هه‌موو شتێک بێت له‌ ژیانی پارتایه‌تی و بزووتنه‌وه‌ی چینی کرێکاردا، چونکه‌ به‌شێکه‌ له‌ به‌شه‌ زۆرو زه‌وه‌نده‌کانی تری ناو کوره‌ی خه‌باتی چینایه‌تی چینی کرێکارو بزووتنه‌وه‌که‌ی.

لێره‌وه‌ ده‌گه‌ینه‌ ئه‌و ده‌رئه‌نجامه‌ی که‌ هه‌موو به‌شه‌کانی ئه‌م په‌رتۆکه‌ یه‌ک به‌دوای یه‌کدا په‌یوه‌ندی گرنگ و دیالێکتیکییان پێکه‌وه‌ هه‌یه‌ له‌ بیۆس پۆلیتیکوس و بیۆس تیۆریتیکوس و پارتایه‌تی ناو بزووتنه‌وه‌ی چینی کرێکاردا، هه‌ر بۆیه‌ ئه‌م هه‌وڵه‌ی ئێمه‌ له‌ ئێستاشدا گرنگی خۆی هه‌یه‌. بۆ ئه‌وه‌ی بتوانین ئاڕاسته‌یه‌کی نوێ بده‌ین له‌ گۆڕانێکی نوێی ناوچه‌که‌دا، به‌ خه‌بات و تێکۆشانی بزووتنه‌وه‌ی چینی کرێکاردا، ئه‌وه‌ له‌ به‌رچاوبگرین که‌ له‌گه‌ڵ پێشکه‌وتووترین ته‌کنیک و ته‌کنۆلۆجیادا پێشکه‌وتووترین بزووتنه‌وه‌ی چینایه‌تی به‌ڕێوه‌ به‌رین و به‌ده‌ست بهێنین. له‌به‌ر ئه‌وه‌ی له‌ ته‌پ و تلان و له‌ناو ته‌پووتۆزی ئه‌م سه‌رده‌مه‌دا وون و خۆڵاوی نه‌بین.

نەجمەدین فارس

15/5/2003

  • 1