ئەمە بڵاوبكەوە
FaceBook  Twitter  

ئەوەی دەیبنین لەمڕۆدا ناڕەزایەتی زۆرینەی هاووڵاتییانە لە مۆدێلی حکومڕانی، ئەم ناڕەزایەتییانە بە یەک شێواز و دەربڕین نین، بەڵکو بە شێوازی جیاواز، بەپێی شوێن و کات و دەرفەتەکانی هەلومەرجی بابەتی و خودی، گوزارشت لە ڕەتکردنەوەی مۆدێلی حکومڕانی سیستەمی سەرمایەداری نوێ دەکەن .

شەپۆڵى ناڕەزایەتییەکان لە کاتێکدایە، هیچ کات بە‌هێندەی مێژووی ئێستا لە سایەی سیستەمی سەرمایەداریدا دابەشبوونی چینایەتی لە هەڵکشاندا نەبووە  و سامان لە دەستى  چەند کەسێک چڕ و کەڵەکە نەبووە، کە بەپێى دوایین ڕاپۆرتى ڕێکخراوەکان ڕێژەی سامان و داهاتی ١٪ی چینی سەرمایەدار، داهاتی ٤٥٪ی مرۆڤایەتى لەژێر دەستدایە، لە بەرانبەریشدا زۆرینەیەکی هەژار و پەراوێزخراوی تازەی دروستکردووە.

ئەم ناکۆکییە چینایەتییە لە زۆربەی شوێنەکان بەشێوەی شۆڕش و تەقینەوە جەماوەرییەکان دەبینرێ، وەک ئەوەی لە بەشێک لە وڵاتانی ئەوروپی و عەرەبی لە ڕۆژهەڵاتی ناوەڕاست و باکوری ئەفریقیا بەتایبەتیش لە لوبنان و عێراق و ئێران لە لوتکەدایە، لە دنیاى ڕۆژهەڵاتدا ئەو قەیرانە هاوکاتە لەگەڵ کۆمەڵێک ئیشکالیەتى لۆکاڵى لە بەڕێوەبردندا، بە تایبەتمەندى هەر وڵاتێک، بە مەفهومە مارکسییەکەى وەک ڕەنگدانەوەى تایبەتمەندى و جیاوازى لە شێوازى بەرهەمهێناندایە لەم ناوچەیەدا .

ڕۆڵى چەپ لە ناڕەزایەتییەکان و چوارچێوەى هەماهەنگییەکان بۆ بەدیهێنانى دنیایەکى باشتر، بابەتێکە و پێویستە لە چەندین ڕەهەندەوە خوێندنەوەى بۆ بکەین .

 2

شەپۆڵى ناڕەزایەتییەکان وەک بەشێک لە خەبات و تێکۆشانى جەماوەرى لە فەرەنساوە بۆ عێراق بە شێوەى جیاواز توانیویەتى چەندین مەرج و گۆڕانکارى بەسەر دەوڵەتەکاندا فەرز بکات. هەرێمى کوردستان دابڕاو نییە لەوەها دۆخێکدا، بەڵام بەماناى ئەوەش نییە جۆرێک لە بێهیوایى و هەست پێ نەکرێت لە تێکۆشانى جەماوەرى، وەک ئەنجامێک لە مامەڵەى هێزە ئۆپۆزسیۆنەکانى ڕابردوو لەگەڵ ناڕەزایەتییەکان بەهۆى کورتکردنەوەى ناڕەزایەتى و چەمکى ئۆپۆزسیۆن لە کارى پەرلەمانى و کارى پۆپۆلیستى، دۆخى ئەمڕۆ لەژێر کاریگەرى دوێنێ بەدەر نییە. کاتێک باسى لێکەوتەکانى عەقڵیەت و کارى بەرهەڵستکارى دوێنێ دەکەین، ئەوە ماناى ئەوە ناگەیەنێت  ڕازى ببین  بە کارى  ئەمڕۆى هێزە ئۆپۆزسیۆنەکان، مەبەستم هەندێک لە  (ئۆپۆزسیۆنى چەپ)ە، کە بەناوى (سیاسەتى  پراگماتیکى) لەگەڵ واقیعدا لە لێوارى تەسلیمبوون بەو واقیعە نزیکى کردوونەتەوە، ئەوەش لە کاتێکدایە کارى هێزى سیاسى گۆڕینى واقیعە نەک تەسلیم بوون، لێرەدا مەبەست ئەوە نییە فکری سۆسیالیستی وەک کۆنسێپتێکی موجەرەدی بەرهەمی عەقڵێکی دیاریکراو ببینین بە دابڕانی لە واقعێکی ماتریالیستی مێژوویی.

 3

 بەپێى جیاواى هەلومەرجى بابەتى و خودى  لە هەر شوێنێکدا و هەڵکشانى مەدى رادیکالیەتى کۆمەڵگا، لێکەوتەکانى لەسەر هێزە چەپەکان دەبێت وەک بابەتێکى دوولایەنە، بەڵام هێزى چەپ سەرەڕاى غیابى ئەو مەدە لە کاتێکى دیاریکراودا، نابێت وابیر بکاتەوە ڕەوتى مێژوو تەنیا بریتییە لە ئەمڕۆ و تووشى نەخۆشى بینینى مێژوو بێت لە دۆخى وەستاودا، دوور لە بنەماکانى فکرى سۆسیالیستى.  ئەم هاوکێشەیە بەڕوونى ڕەنگدانەوەى دەبینین لەسەر ژیانى خەڵک و کارەکانى دەسەڵات، کە ڕۆژ لە دواى ڕۆژ پێشێلکارییەکان لەسەر ماف و ئازادییەکان زیاتر دەبێت، دۆخ و گۆڕەپانەکە بۆ ئەوان  بەجۆرێکى لێهاتووە بەشێکى پاکێجى سیاسەتى نیولیبرالیزمیان بەناوى چاکسازى لە ڕێگاى پەرلەمانەوە ساغ بکەنەوە و ( ئێمەش) باوەڕیان پێ بکەین ؟!

لە بارەى قەیرانە بەردەوامەکانى سیستەم و هەڵکشانى مەدى ناڕەزایەتییەکان و هەلومەرجى ئەمڕۆمان، پرۆفیسۆر دەیڤید هارڤەی دەڵێت: ئێمە لە چرکەساتێکداین کە هەموو شت دەتوانێت بەرەو چەپ یان ڕاست بڕوات." لەبەرئەوەی شەپۆڵێکی گەورەی ناڕەزایەتی لە کۆمەڵە جیاوازەکاندا بوونی هەیە و ئێمە بینەری یاخیبوونی جۆراوجۆرین". لێرەدا پرسیارێک دێتەکایەوە، ئایا (ئێمەى چەپ) پرۆژەیەکى سەربەخۆمان هەیە، بەرەو کام لادا، کام پرۆژە، بەڵام بە چەپ یان ڕاستدا دەڕۆین؟.

  • 1