ئەمە بڵاوبكەوە
FaceBook  Twitter  

لە دوای ئەنجامدانی یەکەمین هەڵبژاردنی پەرلەمانی کوردستان لە۱۹-٥-۱۹۹۲ (خەریک بوو بە هۆی تەزویری زۆر ئەنجامەکەی هەڵبوەشێننەوە،بەڵام دوایی هەردوو لایەنی براوە پارتی و یەکێتی لەسەر بنەمای فیفتی فیفتی ڕێککەوتن)، ئەوە بوو لە ٤ی تەمموزی۱۹۹۲ بۆ یەکەمجار پەرلەمانی کوردستان کۆبۆوەو دەنگ لەسەر پێکهێنانی یەکەمین کابینەی حکومەتی هەرێمی کوردستان بە سەرۆکایەتی بەڕێز د. فوئاد مەعسوم درا.

ماوەی سێ چوار ساڵی یەکەم لە تەمەنی حکومەتی هەرێم ،کە خەڵک داواکاری پێشکەش دەکرد،یان دەنگی ناڕەزایەتییان بەرز دەکردەوە،دەیان گوت جارێ حوکمەتەکەمان ساوایە، بەردی گەورەی پێهەڵناگیرێت!!کە هەندێک تێربوو،فەراقە بوو،بووە هەرزەکار،لەژێر سایەیدا هەردو لایەنی پێکهێنەری حکومەت گەورەترین، مەرگەساتئامێزترین، کارەساتبارترین شەڕی ناوخۆیان هەڵگیرساند..بێگومان شەڕەکە لەسەر چەند دوکانێکی قەڵادزێ نەبووە،بەڵکو لەسەر ململانێی حزبی وکۆنەقین و داهاتی ئیبراهیم خەلیل بوو.. لە ئەنجامی ئەم شەڕە ناوخۆییەدا حکومەتی هەرێم، بیلامانێ (زا)بووە دوو حوکمەت،هەرێمیان دابەشکرد بۆ دوو زۆن..ئەم دابەشبوونە تاکو ئێستا بەردەوامە!! کە نەوت دەرهێنراو بازرگانی نەوت دەستی پێکردوبەرژەوەندی هەردوو لا و کۆمپانیاکانی نەوت وای دەخواست ڕێکبکەون.. رێککەوتن لەسەر بنەمای هاوبەشی..لە دوای ڕووخانی ڕژێمی سەدامیش ،کە پارەیەکی زۆر لە بەغدا بۆ هەرێم دەهات،جگە لە داهاتی ناوخۆ،حکومەتی هەرێم لە جیاتی بایەخدان بە هەرسێ بواری کشتوکاڵ و ئاودێری و پیشەسازی و ئاوەدانکردنەوەی گوندەکان..بەهۆی ململانێی حیزبی و لە پێناو دەنگهێنان لە هەڵبژاردنەکاندا..بە بێ پلان و بەبێ ئەوەی دووربین بێت،هەڵسا بە دامەزراندنی بەسەدان هەزار کەس کە دوایی بوونە (بندیوار)دەبوایە فیفتی فیفتی خەڵک بە کۆمەڵ دابمەزرێنن، زۆرینەی خەڵکی گوندەکانیان کردە مووچەخۆرو لە گوندوکاری کشتوکاڵ و بەرهەمهێنان دووریان خستنەوە ..

لە جیاتی دروستکردنی کەمپی زانکۆی سەلاحەددین و نەخۆشخانەی گەورەی نوێ لە شارەکان..لە جیاتی بە دوو سایدکردنی ڕێگا سەرەکییەکانی کوردستان ،لە جیاتی دروستکردنی بەدەیان کارگەی پشت بەستوو بە بەروبوومی کشتوکاڵی..حکومەتی هەرێم سەرەڕای بەشێک لە کارو پڕۆژە باشەکانی، بە پلەی یەکەم بایەخی بە پشتگیریکردن لە وەبەرهێناندا لە بواری نیشتەجێبوون و بە بێ پلان دامەزراندنی دەیان و سەدان باڵەخانەی گەورە،دامەزراندنی دەیان شاروگوندی نوێی نیشتەجێبوون، کە زۆریان بە تەواونەکراوی ماونەتەوە.وەنەبێ ئەمەش لە پێناوی چارەسەرکردنی گرفتی نیشتەجێبوون و لە بەرژەوەندی خەڵکی کەم دەرامەت بووبێت، بەڵکو لە پێناوی قازانج و دەوڵەمەند بوون بوو بۆ توێژێکی بازرگانی سەر بە هەردوو لایەنی دەسەڵات..

حکومەتی هەرێم ئەگەر دووربا لە گەندەڵی ،ئەگەر پشتی بەتواناکانی خەڵکی شارەزا ببەستایە، ئەگەر خاوەن بودجەی ساڵانەو پلان بوایە، دەیتوانی بەو بودجەیەی لە بەغدا بۆی دەهات، بە داهاتی نەوت و ناوخۆ..هەرێمی کوردوستانی پێنج ملیۆن کەسی بکاتە هەرێمێکی زۆر پێشکەوتو..

بەڵام بەداخەوە لە ئەنجامی نەبوونی پلانی دروست،لە ئەنجامی دانەنانی کەسی شیاو لە شوێنی شیاو،لە ئەنجامی گەندەڵی، لە ئەنجامی ململانێی بەردەوامی حزبی،لە ئەنجامی پەیوەندییە دەمدەمییە ناجێگیرەکانی لەگەل بەغدا،لە هەمووشی کارەساتبارتر لە ئەنجامی سیاسەتی شکستخواردووی ئابووری سەربەخۆو ڕێککەوتننامە پەنجا ساڵییە گوماناویەکەی لەگەل تورکیا.. حکومەتی هەرێم دوای ۲۸ ساڵ لە دامەزراندنی، ئێستا ۲۷ ملیار دۆلار قەرزارە،لەو کاتەی رۆژانە دەوروبەری٥۰۰ هەزار بەرمیل نەوت له هەرێمی کوردستان دەرهێنراوەو فرۆشراوە،جگە لەو پارە زۆرەی ماوەی چەند ساڵ لە بەغدا دەهات،جگە لە داهاتی بێ ژماری ناوخۆ..(خەڵکێکی سادەو ڕاستگۆ دەڵێن ئەگەر حکومەتی هەرێم نەوتی نەفرۆشتبا نەوتی بکڕیبوایە ئەوەندە قەرزار نەدەبوو)

ئێستا بارودۆخی دەسەڵاتی هەرێم(غەدرە پێی بوترێ حکومەت) گەیشتۆتە قۆناغێک ،مانگی تەمموزە، تاکو ئێستا مووچەخۆرانی زۆرینەی وەزەرەتەکان مووچەی مانگی شوباتیان وەرنەگرتووە.پڕۆژەکان هەموو وەستێنراون، حکومەت خاوەن بانکێکی ناوەندی نەبووە تا پاشەکەوتێکی بۆ ڕۆژی ڕەش لێهەڵگرتبا..خەمێکی تریش ئەوەیە حکومەتی هەرێم مانگانە مووچەی نزیکەی چوارسەد هەزار هێزی چەکداردەدات،کەچی سنوورەکانمان بەڕووی داگیڕکەرانی کوردستان لەسەرپشتن، وا بە ڕۆژی رووناک خاکی هەرێم داگیردەکرێت، حکومەتی هەرێم دەست و هەست و دەمی لەبەرانبەر داگیرکەرانی دوژمنی کوردکوردستان بەستراوە.. بەڵام ئەگەر چل پەنجا کەسی چالاکوانی مەدەنی لە پایتەختی هەرێم بیانەوێ بچنە سەرشەقام یان پێش یوئێن ناڕەزایی دەرببڕن، ئەوە بەسەدان لە هێزە ئەمنییەکانی ئەم حوکمەتە لەبەردەمیان دەبنە شێروپاڵەوان و ڕاپێچی زیندانیان دەکەن،هەروەکو لە۱٥-٦-۲۰۲۰ لە هەولێر ڕوویدا. 

لە کۆتاییدا دەڵێم بەداخەوە هەرگیز چاوەڕوان نەبووین حکومەتی کوردی بەمجۆرو مۆدێلە بێت..

 

  • 1