ئەمە بڵاوبكەوە
FaceBook  Twitter  

 

بەشی دووەم

دوای سێ رۆژ دەبوو بچمەوە ماڵی هاوڕێ د. عادل بۆ ئەوەی ئەو بابەتانەی ئامادەمان كردبوو، رەوانەی مەكتەبی مەحەلییان بكەم، مەلا بانگدانی بەیانی لەسەرەتای مانگی ئەیلول چوومە ماڵەكەی حزبیمان و هاوڕێ د. عادل دەرگای لێكردمەوە، چوومە ژوورە تایبەتەیەكەمان و خەوتم، دوای نان خواردنی بەیانی كارم لەسەر ئاكامادەكردنی پۆستەكە كردو، هەموو نووسراوەكانم پێچایەوەو بچوكم كردنەوەو، بەتەواوەتی ئامادەم كردن، دەبوو بۆ ماڵی هاوڕێ مام خاڵۆی شەقڵاوەیی ببمەم، بۆ ئەوەی رەوانەی رەواندوزی بكات و لەوێوە بۆ مەكتەبی مەحەلی كە لە پێشت ئاشان بوو، ماڵی مام خاڵۆ لە ناوچەی پێشەنگاكانی فرۆشتنی سەیارەبوو، تاكو دەوروبەری كاتژمێر یەكی دوای نیوەڕۆ كارەكانم تەواو كرد، هەر لەبەیانی یەوە بیرو هۆشم لەلای هاوڕێیانی ئازادی بوو، بەتایبەتی هاوڕێ خیری قازی و مامۆستا جوهەر و عصام عەلی حسین كەسرەو عبدلواحید و عبدالحمید و مامۆستا ئەحمەد جەزایری و هاوڕێ و برای كۆچكردووم مامۆستا نەوزاد حیدر ئەلعتار،  شەوان كاتی خۆشی دەچووینە یانەی مامۆستایان و مانەوە تادرەنگانی شەو و بەپیادە بۆ گەڕەكی ئازادی دەگەڕاینەوە، فشاری دەروونی زۆرم بۆ دروست بوو، ئارەزوویبێسنوورم لا پەیدابوو، كە دەبێت بچمە سەردانی هاوڕێ مامۆستا(جەوهەر) كە ماڵەكەی لە ماڵكەی حزبیمان نزیك بوو،  هەر نزیكەی یەك كم دەبوو،  بیرەوەری و یادگاری زۆرم لەگەڵیان هەبوو، بەتایبەتی لەماڵەكەیان كاتی خۆی گەڵێك جار دەمامەوە و جێگای تایبەتیم هەبوو، دایكی (لێزان) كە هاوسەری هاوڕێ (جەوهەر تاهیر) و خوشكی هاوڕێیان (عبدلواحید و عبدالحمید)یش بوو، پەیوەندی لەگەڵ هاوڕێیان بتەو و گەرم و گوڕبوو، لەم كاتەدا ماوەی سێ ساڵ بوو لەگەڵ جەوهەر و خێزانە بەڕێزەكەی دابڕابووم، بیرم كردەوە چۆن و بەچ شێوەیەك بچمە سەردانیان؟ و دروستكردنی پەیوەندی حزبی لەگەڵیاندا، من لەم ماوەیەی لەناو شاری هەولێر كاری حزبیم بەڕێوە دەبرد، هیچ كاتێك بەرۆژ لەماڵ دەرنەدەكەوتم، لەبەری ئەوە لەناوشار بەتەواوی ناسرابووم، بەتایبەتی لەگەڕەكی ئازادی كە ماڵەكەمان لەكۆنەوە لەم گەڕەكەدا بوو، نەدەبوو بەرۆژ هاتوچۆ بكەم، بەڵام لەم رۆژەدا نەمتوانی خۆم بگرم و بڕیارمدا بۆ ماڵی هاوڕێ جەوهەر بچم، بەڵام چۆن و بەچ شێوەیەك، ئێمە  لەناوشار جۆرەها جل و بەرگمان دەپۆشی بۆ ئەوەی سەرنجی پیاوانی بەعس بەلای خۆماندا كێش نەكەین، بۆ ئەم نیوەرۆیە بەدلەیەكی كرێكارانی سپیكارانم لەبەر كرد، كە گەچ و تۆزو خۆڵی پێوە دیار بوو، پێڵاوێكی گێچاوی و جەمەدانییەكی كرێكانەم لەسەر بەست و جلی خۆم لەژێر بەدلەكە لەبەردابوو، دەمزانی نیوەڕۆیان و بەتایبەتی لەگەرمەی هاویندا كەس لەماڵەوە نایەنە دەرەوە، بەو شێوەیە لەماڵ دەرچووم و بەرەو شوێنی مەبەست چووم، لەبەر ئەوەی لەگەڕەكی ئازادی شارەزابووم نزیكترین رێگام گرتەبەرو بەبێ ئەوەی تووشی هیچ كەسێك بم، گەیشتمە ماڵی هاوڕێ جەوهەر و بەرێكەوت دەرگای دەرەوەیان كراوەبوو، بەبێ لەدەرگەدان چوومە ژوورەوە،  هاوڕێ (جەوهەر و دایكی لێزان) و هەردوو منداڵەكەیان لێزان و ژووان لە شێونی جاران دانیشتبوون و نانی نیوەڕۆیان دەخوارد، ووتم سڵاو مامۆستا، هاوڕێ جەوهەر سەری بەرزكردەوەو تۆزێك بەمۆڕی و توڕەیی، ووتی سڵاو فەرموو كاكە چیت دەوێ، ووتم، ژوورێكتان هەیە دەتانەوێ سپی بكەین بۆ ئەوە هاتووم، بزانم چۆنەو چی پێویستە بۆ ئەوەی بەیانی بێین بۆتان سپی یكەین، مامۆستا جەوهەر ووتی كاكە بەغەڵەت هاتی ئێمە ژووری وامان نی یە، ووتم مامۆستا ئەوە ماڵی مامۆستا جەوهەر نی یە؟ مامۆستا جەوهەر ووتی با وایە، بەڵام ئێمە ژووری وامان نی یە، كاكە كێ تۆی رەوانە كردووە، دیارە گەمەی پێكردووی، ووتم ئەوەی من رەوانە كردوە ناسیاوێكی خۆتانە، ووتی ئەو ناسیاوەی ئێمە كێیە و ناوی چی یە، من جەمەدانیەكەم هەتاكو سەر برۆیەكانم داخستبوو، ئەویش بە هیچ شێوەیك بیری لەوە نەدەكرەوە من كرێكاری گەچكاری بم، بۆیە نایانناسیم، ووتم مامۆستا ناسیاوەكەی ئێوە ناوی((پ .م .ق))یە مامۆستا (جەوهەر) كە گوێبیستی ناوەكە بوو، یەكەسەر لەشوێنی خۆی هەڵساو لەباوەشی گرتم، سەرەتا نەمانتوانی هیچ قسەیەك بكەین، بێ دەنگی باڵی بەسەر ماڵەكەدا كێشاو (دایكی لێزان) واقی وڕمابوو، بەسەرسوڕمانەوە، سەیری دەكردم، پاشان مامۆستا جەوهەر بەچاوی پڕ لەفرمێسك ووتی هەی خەشیم، من چوزانم بوویتە كرێكاری گەچكاری لای ئێمە و هەموو برادەران وا دەزانین تۆ بوویتە پێشمەرگە، باشە ئەم جارەش بەدیدارت شادبووینەوە، دەی جلەكانت دابنێ و ببەوە مامۆستایەكەی جاران و، هەر بەیادی جاران بانانێك بخۆین، هەر چەندە هاوڕێ پ.م.ق شوێنی دیارە و خۆی دیار نی یە، بێ دەنگ بووم، قسەم بۆ نەكراو، وام هەست كرد كە دووبارە داخكرامەوەو، ووتم بەداخەوە هاوڕێ (پ.م.ق) كۆچی دوایی كردو منیش داخكرام، ژان و ئێش و سفت و سۆی داخكردن بەردەوام دەبێت و كۆتایی نایەیەت، ئەو كەسەی داخنەكرابێت لە ئازاری داخكردی ناگات، تكایە ئەم بابەتە بپێچەوەو چیتر باسی مەكە، دوای نان خواردن، باسی گەلێك بابەتی سیاسی و حزبی و پێشمەرگایەتیمان خستەبەر باس و گفت و گۆو ئاڵوگۆركردنی بیروڕا، لە كۆتاییدا ووتی ئەوە ماڵەكەی خۆتە و بەردەوام دەرگابۆتان كراوەیەو، منیش و ماڵەوە وەكو جاران لە خزمەتی حزب و هاوڕێیانداین، پاشان رێكەوتین بە هێمنی و لەسەرەخۆ پەیوەندی بەهاوڕێیان و دۆستانەوە بكات و، بەشێوەیەكی تاكی پەیوەندییەكان رێكبخات و رێگانەدات هاوڕێیان پەیوەندی لا بەلا دروست بكەن، لەپێناوی پاراستنی هاوڕێیان و دۆستانی حزبیمان، ماڵەكەی هاوڕێ جەوهەر بووە ماڵی حزبی، لەدوای راپەڕینەوە لەكۆنفرانسی مەحەلی بۆ ئەندامیەتی لێژنەی  مەحەلی حزب لە پارێزگای هەولێر هەڵبژێردراو، هەروا لە لیستی حزب لە وەزارەتی پەروەردەی هەرێمی كوردستان بە بەڕێوەبەری گشتی دیاریكرا، بەداخەوە لە ئەنجامی ئەركی وەزارەت لەرێگای  هەولێر- دهۆك بەروداوی هاتوچۆ كۆچی دوایی كرد.

سەربەرزی بۆ مامۆستا جەوهەر تاهیری ئازاو نەترس و دڵسۆزی حزب و گەلەكەی

  • 1