ئەمە بڵاوبكەوە
FaceBook  Twitter  

پشكا دویێ‌

پرسا گەلێ‌ كورد چما ژبوی توركیا گەلەك هەستیارە:

هەژمارەكا گەلەك مەزن یا كوردان ل توركیا خوەدی هەبوونن و لسەر جه وارێن خوە یێن رەسەن ژیانا خوە دەرباسدكەن، گەلێ‌ كورد گەلەكێ‌ زێندی یە، نها كورد د قوناغەكا هەری باشدانە، بەرێ‌ زێدە نەدكارین بێژین ئەم كوردین و ئەم هەینە، نها ب فەخر و شانازی ڤە دبێژن ئەم كوردین و ئەم هەینە، هەر چەندە ب دژواری كەمالیستان خواستن ئەڤی گەلی ئاسیملەكەن، د ئەنجامدا هەولێن وان شكەستن خوار ئەڤ گەل شیا لسەر پێیان بیت و ب ئیسرار هەبوونا خوە بدەتە حەسباندن.

تەڤگەرێن جودا جودا هەم د قادێن سیاسی دە هەم ژی د قادێن لەشكەری دە، شیان ب جسارەت لهەمبەری سیاسەتا ئینكارێ‌ و سیاسەتا ئاسیملەكرنێ‌ بسەكنن، تەڤگەرێن كوردستانی هەتا ئیرۆ ژی ل باكورێ‌ كوردستانێ‌ وەكە ئورگانیزەیێن سیاسی خوەدی باندورن د جڤاكا كوردستانی دە، توركیا ژڤان پێشڤەچوونان د ترسە، هەبوونا تەڤگەرێن كوردستانی ب گەفە دبینە لسەر ئێكەتیا ئاخا توركیا، هەر لسەر ئەڤان ئەساسان د هەر واری دە گڤاشتنان لسەر خەباتا وان چێدكە، دخوازە ل هەر درێ‌ خوە بكەتە كەلەم د پێشیا تێكوشانا وان دە، هەر وەسا هەول بدەت پێشڤەچوونێن خەباتا وان ب دەتە خەتماندن.

تشتێ‌ سەیر ئەوە، توركیا دبێژیت پێشڤەچوونێن كوردان ل بەشێن دن یێن كوردستانێ‌ مە دئێشینن، دیسان ژی مەترسینە لسەر ئایندەو پاشەرۆژا توركیا، ئەڤێ‌ چەندێ‌ د ئینن زمان بیكو دانپێدانێ‌ ب كوردێن باكور و كوردستانا باكور بكەن، باشە ئەگەر تو ناخوازی هەبوونا ئەڤی بەشی ناسبكەی، زولم و ستەما لسەر وان ژ هولێ‌ راكەی، ب چ زمانێن شارستانی مامەلێ‌ دگەل دە ئەنجام نادەی، تو بێژی ب بەردەوامیا سیاسەتا ئینكارێ‌ هەبوونا وان بدەیە ونداكرن.

د درێژاهیا تەمەنێ‌ دەولەتا خوە دە هەوە سیاسەتا ئینكارێ‌ ب دژواری دایە مەشاندن، شێوازێن ستەمێ‌ نەمانە هەوە لسەر ئەڤی گەلی نەداینە پراكتیزەكرن، سەرەاری هەموو ئەوان گڤاشتن و فشارێن هەوە، كوردستانا باكور هەیە .. كورد هەنە .. زمانێ‌ كوردی هەیە .. ستران و هونەرێ‌ كوردی هەیە .. چاند و كلتور و كەلەپورێ‌ كوردی هەیە .. رەوشەنبیر و سیاسەتمەدار و بیرمەندێن كوردان هەنە، د هەر قادا تێكوشانێ‌ دە كوردێن باكور خوەدی هەبوونن، رەنگە د گەلەك ملان دا ژی تێكوشانا وان یا ئیلهام بەخشە بو بەشێن دن یێن كوردستانێ‌، گەرەكە توركیا ژسەربوران مفا وەرگرتبایە، لجها سیاسەتا ئینكارێ‌ دانپێدان ب هەبوونا كوردان كربایە، لسەر مێزا گفتوگویان پرسگرێكا كورد دابایە گەنگەشەكرن، وی چاخی لجها مامەلا هەستیار دا مامەلا دوستایەتی و برایەتیێ‌ جهێ‌ خوە گریت، بێگومان ئەو ژی دا د خزمەتا هەر دو گەلان بیت.

بیانوویێن توركیا ل باشورێ‌ كوردستانێ‌ خلاسنابن:

توركیا مادەم كوردان وەكە نەیارێ‌ خوە دبینە، ممكن نینە بیانویێن وێ‌ ل باشورێ‌ كوردستانێ‌ خلاسببن، دەستپێكن سالێن نوتان هێشت ناڤ و هێزا پەكەكێ‌ ل باشورێ‌ كوردستانێ‌ رەنگڤەدانا خوە نەبوو، وی چاخی ژی دگوت: ئەز قەبولناكەم ل كێلەكا مە ستاتویەكا كوردی هەبە، د گەلەك بواران دا گڤاشتن لسەر هەرێما كوردستانێ‌ چێكرن و هەر تم گەفە ژ كوردێن باشور دخواستن، ئەڤ سیاسەتا وێ‌ یا دوژمنداریێ‌ د دەمێن ئەنجامدانا ریفراندومێ‌ دە باشتر هاتە زەلالكرن، باش هاتە خوەیاكرن، كو دوستایەتیا وێ‌ دگەل دەسهەلاتا هەرێمێ‌ مینا دیوارێ‌ لسەر بەفرێ‌ یە.

سالێن نوتان هەر جار دگوت: كەركوك نە كوردستانە بەلكو باژارەكێ‌ ئیراقی یە جهێ‌ توركومانایە، ئەم ناهێلین زوری ل توركمانان بهێتەكرن، دڤی واری دە گەلەك جورێن دەستێوەردانان ژی پێكئینان، رەوشەكا وەسا ئیناپێش ئینتمائا توركومان لجا گرێدایی ئاخێ‌ بیت زێدە هاتە گرێدان بو دەسهەلات و وەلاتێ‌ توركیا، ئەڤ سیاسەتە دبنە ئەگەرێ‌ هندێ‌ بنەكوكا حقد و نەڤیانێ‌ رۆژ ب رۆژ پتر جهێ‌ خوە دناڤا پێكهاتان دە بگریت، ئەڤە ژی پلانێن دەولەتێن داگیركەرە، چونكە پاشان برێكا چێبوونا ناكوكیان د نەقەبا پێكهاتان دا، دێ‌ ئەو ژینگەه هێتە پێش ئەو ب ئاسانی بكارن دەستێوەردانان بكەن.

هەلبەت نها هەموو چاڤ لسەر هندێنە، كو پەكەكە بیانوویا سەرەكییە توركیا ئوپەراسیونێن لەشكەری ل باشورێ‌ كوردستانێ‌ ئەنجامدەتن، ئەگەر نوكە پەكەكە ل چیایێن كوردستانی ژی نەمینیت، دەهان بیانووێن دن دێ‌ ئینیتە پێش، بیانویێن وێ‌ خلاسنابن، هەتا چیایێن كوردستانێ‌ بو بهێنە ڤالاكرن، داخوازێن وان ب داوی ناهێن و بەردەوام دێ‌ هەولدەن ئاستەنگان چێكەن، ئەز دوێ‌ باوەرێدامە ئەگەر چیایێن كوردستانێ‌ دڤالا بانە، بێ‌ دودلی نها دا چەتێن خوە یێن توندرەو ل وان چیایان بنەجهكەت، كو هەتا هەتا ببانە ئارێشە لهەمبەری دروستبوونا ژیانەكا نورمال.

گەلەك جاران ژ ئالیێ‌ هن پارتێن سیاسی ڤە دهێتە گوتن: كو پەكەكە سەرێ‌ كێشێ‌ یە و تاكە بیانوویە بو توركیا، واتە ئەگەر پەكەكە نەبیت توركیا دوستە و فاكتەرێ‌ ئاڤاكرنێ‌ یە، ئەڤ خواندنا شاش یا هن لایەنێن سیاسی گرێدایی رحەكا بەرتەسكا حزبی و كەسی یە، توركیا ب گولێبوونا ناڤێ‌ كورد و كوردستانێ‌ دلتەنگ دبە، ناخوازیت دگەل كوردان چ جاران ببیتە دوست و برا، كورد بلا باش بزانن ئەو نەشێن بیانویێن توركیا خلاسكەن، مادەم كورد هەنە هەبوونا كوردان د هندێ‌ خوە دە ژبوی توركیا سەرئێشیە، توركیا هووسان ژ پرسگرێكێ‌ رە مێزەدكەت، ئەڤ سیاسەتا توركیا یە بلا كەس خوە نە خاپینیت، ئەز دوێ‌ باوەرێ‌ دامە هندی توركیا وەلاتەكێ‌ لەشكەری یێ‌ بهێزبیت ل دەڤەرێ‌ ممكن نینە چ پرسگرێك بهێنە چارەسەركرن ..!

 

  • 1