ئەمە بڵاوبكەوە
FaceBook  Twitter  

ئازیزم كرستینا: خۆت دەزانی من بە مەبەستی زیاتر فراوانكردنی ئاستی بینین‌و تێگەیشتم لە كوردەكان هاتوومەتە هەرێمی كوردستان‌و شان بە شانی ئەوەش تاكو خۆم دڵخۆش بكەم بە بینینی وڵاتێكی تر‌و گەلێكی تر، بەڵام كە سەیری واقیعی ئێستاو رابردووی گەلی كورد دەكەم خەفەتی زۆر دەخۆم، ئاخر ئەوانە میللەتێكن كلتوری بەیەكەوە ژیانی مەدەنیانە لەناویاندا زۆر لاوازە بەتایبەتی نوخبە سیاسی‌و بگرە نوخبە خوێندەوار‌و رۆشنیرییەكەشیان زۆربەیان رقیان لەیەكترییە.

كرستینای من: لەناوو كوردەكان قسەیەكی باو هەیە دەڵێت ئەو دەرد‌و ئازارەی كە نەتكوژێت دواتر بەهێزت دەكات، هەڵبەت ئەو قسەیە راستە بەڵام كوردەكان هەر دەرد‌و ئازارێك كە تووشیان هاتووە نەك بەهێزی نەكردوون بەڵكو زیاتر لاواز‌و بهێزی كردوون. خۆت دەزانی هەموو شارەزایان‌و پسپۆڕانی بواری سیاسی‌و مێژووی گەلان كۆكن لەسەر ئەوەی كە یەكێك لە فاكتەرە گەورەكانی كە ئیسرائیلی كردە وڵاتێكی بەهێزز حساب بۆكراو لەسەر ئاستی دنیا هۆڵۆكۆست بوو واتا ئەو رەشەكوژییە بوو كە نازییەكان لەناوەڕاستی سەدەی بیستەم لە دژی جولەكە ئەنجامیاندا، چونكە راستە هیتلەری رابەری نازییەكان بە ملیۆن كەسی لە جولەكە كوشت‌و زۆری نەمابوو بە تەواوی قەڵاچۆیان بكات، بەڵام جولەكەكان نەك هەر خۆیان نەدایە دەست ئەو تاوان‌و جینۆسایدە، بەڵكو دواتر لە رێگای بەرنامە‌و ئیرادەیەكی بەرزی رووبەڕووی بوونەوە توانیان دەوڵەتێكی بەهێز‌و خاوەن هەیبەت‌و كاریگەر دروست بكەن‌و دواتر ببینە گەلێكی زیندووی جیهان.

بەڵام كریستینای من داخەكەم كوردەكان وانین‌و بگرە بە پێچەوانەی گەلانی چەوساوە‌و بەشمەینەت هەر كۆست‌و كارەساتێك كە بەسەریان هاتبێت زیاتر لە یەكتری ترازاون‌و دووبەرەكی لە نێوانیان روویداوە، بۆ نموونە سەرەتای هەشتاكانی سەدەی رابردوو لە دەرەنجامی شەڕی عێراق ئێران، حكومەتی سەدام حوسێن لە هەموو رووێكەوە لاواز بوو توانای دەسەڵاتی بەسەر زۆربەی ناوچەكانی كوردستانەوە نەمابوو لەگەڵا ئەوەشدا ئەو حكومەتی سەدان تاوانی دژی گەلی كورد ئەنجامدابوو، كەچی كوردەكان لەو هەل‌و مەرجەدا نەك یەك نەبوون بەڵكو بە وێنەی خێڵە سەرشێتەكانی ئەمازۆن بەربووبوونە گیانی یەكتری‌و شەڕی ناو خۆیان بەرپاكردبوو.

كرستینا، كورد وەكو نەتەوە تا بڵێی باش‌و رێزدار‌و میهرەبانن، بەڵام نوخبە سیاسییەكەیان بەڕاستی هەڵە‌و ناهەقی گەورەیان بەرامبەر گەلەكەیان كردووە.

  • 1