ئەم هەواڵە بڵاوبكەوە
FaceBook  Twitter  

یەك لە حەزو ویستەكانی منی بەنگلادیشی ئەوەبوو كە زانیاری لەبارەی رەمزو سەركردە سیاسییەكانی كورد وەربگرم و بزانم ئایا كوردیش وەكو نەتەوەكانی تری جیهان رەمزی سیاسی گەورەیان هەیە؟ حەمە شۆفڵ دراوسێی ئەو ماڵە بوو كە من تیایدا كارم دەكردو دیاربوو كەسێكی دەوڵەمەندو دەست رۆیشتووی یەك لە حزبەكانی كوردستانیش بوو، رۆژێك لێم پرسی دەكرێت ناوی ئەو كەسایەتی و رەمزە سیاسیانەم پێ بڵێی كە ئێوەی كورد هەتانە؟

چونكە من ناوی مەلیك مەحمودو قازی محەمەدو مەلا مەستەفای بارزانیم بیستووە، حەمە شۆفڵ قسەی پێ بڕیم و گووتی: پێویست ناكات خۆت ماندوو بكەی با من باسی هەرسێكیان بكەم، مەلیك مەحموود پیاوێكی نەزانی دواكەوتوو بوو هەر هیچ نەبوو، قازی محەمەد پیاوێكی ترسنۆك بوو بەبێ‌ تەقە خۆی دایە دەستی لەشكری ئێران، مەلا مستەفای بارزانیش پیاوێكی خێڵەكی بوو هیچی تر. منیش گوتم: تەواو هەر ئەوەندە؟ گووتی: بەڵی ئەوەندە، دواتر خۆم چوومە ناو وردەكارییەكانی مێژووی ئەو سێ‌ سەركردەیەو بۆم بەدیاركەوت هەرسێكیان لە سێ‌ قۆناغی جیاواز رابەرو سەركردەی كورد بوونەو توانیویانە لە سەختترین و هەستیارترین قۆناغی مێژووییدا رابەری بزوتنەوەی رزگاریخوازی گەلەكەمان بكەن.

دواتر حەمە شۆفڵم بینیەوەو پێم گووت: ئەوەی تۆ لەبارەی ئەو سەركردانە گووتت راست نەبوو مێژووی ئەوان شتێكی تری پێ گوتم؟ پێم سەیرە تۆ ئاوا هێڵێكی راست و چەپت بەسەر مێژووی ئەوانەدا هێنا؟ گووتی: كابرای بەنگلادیشی ئەوەی من دەیڵێم ئەوا راستە، دواتر لە حەمە شۆفڵم پرسی ئەی لەبارەی شیوعییەكانی كورستان چی دەڵێی؟ گوتی وازیان لێ بێنە ئەوانە هەموویان كافرن!!!

جا خوێنەرانی بەڕێز دەزانن حەمە شۆفڵ كێ بوو؟ سێ‌ جار لەسەر دزینی مافوورو كۆمباری مزگەوتنەكان گیرابوو، نوێژیشی نەدەكردو كوردەواری گووتەنی سەی بە پێستەوە دەخواردو كەچی دەیگووت شیوعییەكان كافرن، حەمە شۆفڵ كاتی خۆی لەلاوازیان پێیان دەگووت حەمە رێوی، بەڵام لە سایەی حزبەكەی هێندە قەڵەو بوو بوو ناویان نابوو حەمە شۆفڵ.

  • 1