ئەمە بڵاوبكەوە
FaceBook  Twitter  

هەر لەسەرەتاوە پێت ناڵێم هاوڕێ‌ – رابەر – سەركردە – سكرتێر – ئەمیندار – هێك كامێك لەوانە ناكەمە پێشگری ناوەكەت، چونكە دەبێت هەموو ئەوانەی هەڵگری ئەو ناسنامەن دەبێت لە تۆ فێری خۆنەویستی و لێبوردەیی و خۆراگری و راستگۆی بن.

دۆزینەوەی جوانی لەسروشتدا خۆماندووكردنی ناوێت، بەڵام وردبوونەوەو تێڕامان لە مەغزاو مانا قوڵەكانی ئەو جوانییانە سەلیقەیەكی وردی شاعیرانەو رۆمانسیانەی دەوێت، بۆیەش هەر كاتێك سەیری كەریم ئەحمەد دەكەیت لە رووكەشداو بەرووی دەرەوەدا مرۆڤێكی هیلاك و بەساڵاچوو دەبینی، مرۆڤێك دەبینین بەوێنەی هەڵۆیەك كە تەمەن و ناڕێكی باری تەندروستی پەڕو باڵی وەراندووەو لە ئاسمانەوە كە هەردەم نیشتمانی فڕینی ئەو بووە، كردوویەتی بەزەوی نشین، بەڵام (كەریم ئەحمەد) ئەوەنیە كە ئێمە دەیبینین، بەڵكو ئەو دەریایەكەو دەشڵێن دەریا نهێنییەكانی خۆی بەهەموو كەس ناڵێت، كەریم ئەحمەد پاڵەوانی زیندان و قارەمانی شاخ و خاوەن و خولقێنەری هەڵوێستە بەرزەكانە، مامۆستای خۆنەویستی و بەرژەوەندی گشتی ویستیە، لەوەتە هەیە لە هەوڵی تێكدانی ئەو نەخشە جوگرافیە سیاسیەدایە كە دوژمنان كردوویانەتە چوار لەت و زیاتریش. دەشێت لاوێتی و پتەوی جەستەیی و زانینی هونەرەكانی یاری وەرزش مرۆڤ بكاتە یاریزانێكی لێوەشاوە، دەشێت شارەزایی لە بنەماكانی هونەری تابلۆ بیكاتە هونەرمەندی شێوەكاری، دەشێت خەیاڵی قووڵ و فەنتازیای ناسك و تێڕامان لە جوانییەكان بیكاتە شاعیر.

دەشێت لێزانی و شارەزایت لە هونەری راگرتنی هاوسەنگی وات لێ بكات بەسەر تەنافدا بڕۆی، دەشێت مەلەوانێكی هێندە كارامە بیت بچیتە قوڵایی دەریایی عوممان و دووڕو مەرجان دەربهێنیت، دەشێت خاوەنی هەموو ئەو بەهرانەبیت، بەڵام لە ئاستی ناسینی (كەریم ئەحمەد)ی بەهەیبەت كۆلەوارو دەست و پێ سپی بیت، هەرگیز چاوەڕوانی ناسینی كەریم ئەحمەد لەوانە ناكرێت كە بەردەوام بەدوای گوێدا دەگەڕێن و رقیان لەزمانە، وەكو زەرافە ملیان درێژەو هەموو شتەكان دەبیننن و بەڵام قسە ناكەن، شاعیری گەورە شێركۆ بێكەس دەڵێت: هەرگیز داوای ئەوەم لێ مەكەن پێناسەی شیعر بكەم، بەڵكو لێم بپرسن چۆن دەڕوانیتە شیعر، ئەو دوو رۆژەی كە لە پرسەی كۆچی دوایی خاتوو (بەیان)ی كچە خەباتگێڕەكەت وەكو پیرێكی بەویقار چەناگەی نورانیت خستبووە سەر گۆچانی هێمای هەیبەت و بەساڵاچوون، دەزانم بەوێنەی دارو بەروێكی باڵا بەرز لەناخەوە ئاگرت گرتبوو، بەڵام شۆڕشگێری گیڤارایانەت و لێبوردەی غاندیانەت ئەوەی لەناخت شاردبووەوە.

دەشزانم و خۆشت هەستت كرد پرسەكەت ساردو سڕە، بەڵام نیگەران مەبە، چونكە لەنێوان زیندوو مردووەكانی وڵاتەكەم تاڵە موێك هەیە، خەڵكانێك بە نوێژی نیوەڕۆ یەكتری دەكوژن و لەتاریكیش یەكتری ماچ دەكەن، ببورە كەریم ئەحمەد ئەگەر كەسانێك لە گەورەیت تێ نەگەن، چونكە تێگەیشتن لە تۆ ئاكاری گەورەكانە.

  • 1